Ekebhara ekehya
21
Hano ghayö ghaahööyë,
nkamaaha mu-ryobha ahahya na ekebhara ekehya,
ko bhoora mu-ryobha aha mbere na ekebhara ikya mbere,
bhyaarenga bhisikiibhwi,
kora inyansha tiyaare-ho ghwiki hë.
2 Mbe,
nkamaaha umughi ömöhörëëru,
ghoraika ukurwa mu-ryobha,
ku-Waryobha,
ghuyö ngo Yërusarëëmu omohya.
Umughi ghuyö,
ngwaakönirwë kya bhono umwenga yasëëmibhwa araghanya ömötëti.
3 Nkaighwa engamba enene,
erarwera ku-kitumbë ikya ekekama eraghamba igha,
“Taighwa!
Waryobha hamwë amënyirë na abhantö abhaaye.
Naraaikare hamwë nabho.
Mbaraabhe abhantö abhaaye,
wonswe naraabhe Waryobha uwaabho.
4 Narebheeya amaisöri.
Enkaagha iyö,
uruku terorebha-ho hë,
kora okobhaabhayera tekorebha-ho hë.
Ikikuuro tekerebha-ho hë handë ukunyahaareka,
ko bhoora amangʼana agha kare ghaara,
nurinyoora ghaahwa.”
5 Mbe,
oora yaarenga aikaayë ku-kitumbë ikya ekekama akaghamba igha,
“Bhoono ëkëntö kyokyonswe igho,
nkokekora ndë bhohya!”
Mbe,
ghwiki akantëëbhya igha,
“Andeka amangʼana ghayö,
ko bhoora n-ga ukukumibhwa na n-ga obhoheene.”
6 Ghwiki akantëëbhya igha,
“Ghahekeraini!
Öni nö-öni Esemoko na Umuhiko,
a nö-öni nkosemora amangʼana ghonswe igho na okoghamarërrya.
Kera ömöntö ono aana inyonta,
nendaamohaane amanshë agha bhosa anywe,
ghano ghakurwa mo-bheseekaani ibhya amanshë agha öbhöhöru.
7 Ömöntö wowonswe ono araakere,
nendaamohaane ghayö ghonswe igho.
Naraabhe omoona uwaane,
na öni wonswe nendaabhe Waryobha uwaaye.
8 Kasi bhoono abhoobha,
bhano bhatakukumya Waryobha,
bhano bhakösësëëbhya enkoro iya Waryobha,
abhaiti,
abhasooraare,
abhaturutumbi,
bhano bhakosengerra ëbhëtöndö,
na abharongo,
bhonswe igho bhayö,
mbaretoorwa mu-nyansha eno ikwibhugha omorro,
na ubhurutu ubhwa ikibhiriiti.
Na ruyö ndwo uruku urwa kabhërë.”
Yërusarëëmu eehya
9 Ho ömwë uwa abhamaraika muhungatë bhaara bhaarë na amabhaköri muhungatë ghano ghaishööyë ibhyateko muhungatë ibhya umuhiko,
akaasha akantëëbhya igha,
“Nshö hano nkwöröki umwenga,
ono araabhe mokaa Omoona Ringʼöndi.”
10 Mbe,
Umwika Ömöhörëëru akanyitoomera,
maraika uyö akanhira ku-nguku enene,
entambë.
Akaanyörökya Yërusarëëmu umughi ömöhörëëru,
ghoraika ukurwa ighörö mu-ryobha,
ku-Waryobha.
11 Umughi ghuyö,
ngwaarë na emerengaari ighya Waryobha ghesekanirë,
ko bhoora igha ngyaamekamekanga kya reghena irya öbhöghöri reno rekobherekerwa igha yasipi,
reramësya kya ikyowa.
12 Ghwaarë na obhogho obhotambë bhököngʼu,
na ibhihiita ikömi na bhibhërë.
Kera ikihiita,
nkyaarendwanga na maraika,
na nkyaandëkirwë iriina irya ekabhira ëmwë,
mo-makabhira ikömi na abhërë agha Isiraëri.
13 Kera orobhareka,
rwaarë na ibhihiita bhitatö,
röghörö,
ghöösi,
syömya,
na nyansha.
14 Obhogho ubhwa umughi ghuyö,
mbwaarenga bhohaghaashirwë ko-maghena ikömi na abhërë,
agha umusingi.
Na kera reghena,
ndyaandëkirwë-ko iriina irya omotomwa ömwë,
mo-bhatomwa ikömi na bhabhërë bhaara abha Omoona Ringʼöndi.
15 Mbe,
maraika uyö yaashumaashanga na öni,
yaarë na orotanka urwa esahaabhu urwa okorengera ëbhëntö.
Yaarë naro,
okore arenge umughi ghuyö,
ebhesaku ibhyagho,
na obhogho ubhwagho.
16 Mbe,
akarenga umughi ghuyö,
obhotambë na obhoghare ubhwa umughi ghuyö mbyaarengʼaini.
Akanyoora igha,
n-sikiromiita ëbhëkwë bhibhërë na amaghana ane.
17 Akarenga obhoghare ubhwa obhogho bhuyö,
akanyoora igha,
na-makubha righana imwë merongo ene na inye.
Yaarengeranga ekerengero keno kyaamanyekaini ko-bhantö.
18 Obhogho bhuyö bhwaarenga bhohaghaashëëywë amaghena agha öbhöghöri agha yasipi iya erangë iya urunyënyi.
Umughi ghuyö,
ngwaarenga ghohaghaashëëywë esahaabhu inshiiya,
iya okomekameka kya ikyowa.
19 Obhorosa ubhwa obhogho ubhwa umughi ghuyö,
mbwaakönirwë na amaghena agha öbhöghöri agha seteemo nsharu.
Reghena irya mbere ryaarë irya yasipi iya erangë iya urunyënyi,
irya kabhërë,
ni-irya yakuuti iya erangë iya ubhurru,
irya katatö,
irya karikedoni iya erangë iya urunyënyi.
Reghena irya kane,
ryaarë irya izumaridi iya erangë iya urunyënyi,
20 irya kataano,
rerabherekerwa igha,
saridöniki iya erangë enkangaaru,
irya kasansabha,
rerabherekerwa igha,
akiki iya erangë enkangaaru.
Reghena irya muhungatë,
ryaarë kirisorito iya erangë iya mayaai,
irya monaane,
rerabherekerwa igha,
zabharajadi iya erangë iya ubhurru bhono bhwishooghaini na erangë iya urunyënyi.
Reghena irya kenda,
rerabherekerwa igha,
yakuuti iya mayaayi,
irya ikömi,
rerabherekerwa igha,
kirisopiraso iya erangë iya urunyënyi inkwerranu,
irya ikömi na kamwë,
rerabherekerwa igha,
hiakinito iya erangë enkangaaru eno ishooghaini na iya amashungwa,
na irya ikömi na kabhërë,
rerabherekerwa igha,
ametisito iya erangë këësërö.
21 Ibhihiita ikömi na bhibhërë bhiyö bhyonswe igho,
ni-ibhya iruuru bhyaarë.
Kera ekesaku kyaakörëëywë iruuru ëmwë igho!
Omohanda omonene ughwa mu-mughi muyö,
ghwaakörëëywë esahaabhu inshiiya,
eno ekomekameka kya ikyowa.
22 Mu-mughi muyö tenaarööshë-mo inyumba iya Waryobha hë,
ko bhoora Omonene Waryobha uwa obhotoro bhwonswe igho na Omoona Ringʼöndi mmu-mughi muyö bhamënyirë.
Ku bhuyö inyumba iya Waryobha teena ubhwera hë.
23 Umughi ghuyö,
tëghötöndörrëywë na emerengaari ighya iryobha handë ighya umwëri,
ko bhoora ubhuhika ubhwa Waryobha,
mbwo bhokobharra umughi ghuyö,
na Omoona Ringʼöndi we ëkëmörë.
24 Abhantö abha ibhyaro bhyonswe igho,
mbariikara mo-bhorabhu ubhwa emerengaari ighya umughi ghuyö,
na abhakama abha ko-kebhara mbarihira-mo ëbhëntö ibhyabho ibhya öbhöghöri.
25 Ibhihiita bhyonswe igho ibhya umughi ghuyö,
tibhirisiikwanga hë,
ko bhoora ubhutikö tebhorebhanga-ho hë.
26 Abhantö bhonswe igho abha ko-kebhara kono,
mbarihira ubhwamë ubhwabho na ëbhëntö ibhyabho ibhya öbhöghöri mu-mughi muyö.
27 Kasi ikinyanku kyokyonswe keera,
tekeresoha mu-mughi muyö hë.
Ömöntö wowonswe uwa amanyënyëëri handë omorongo,
uyö taresoha-mo hë.
Kasi abhantö bhano bharesoha mu-mughi ghuyö,
m-baara urinyoora amariina aghaabho ghaandekwa mo-Ketabho ikya Öbhöhöru ikya Omoona Ringʼöndi.