Okoneghora amëëghyö agha obhorongo na agha obhoheene
4
Abhaghonshe abhaane,
motakaakumya kera ömöntö ono akoghamba igha aana Umwika Ömöhörëëru uwa Waryobha.
Kasi mumwitaahe bhuuya,
momaahe nyoore aana Umwika Ömöhörëëru uwa Waryobha.
Ni-igha momanyërri obhoheene bhuyö,
ko bhoora abharööti abhaaru abha obhorongo,
bhaibhoka ko-kebhara kono.
2 Enshera iya okomanya igha ömöntö nyabhorebhe nkotangatwa arë na Umwika uwa Waryobha,
ni-igha ërë.
Ömöntö wowonswe ono akwikërrya igha Yëësu Kiristo yaasha ko-kebhara kono aana ömöbhërë kya gheno tonaghyo,
uyö we akotangatwa na Umwika Ömöhörëëru uwa Waryobha.
3 Kasi ömöntö wowonswe ono atakwikërrya igha,
Yëësu Kiristo yaarë na ömöbhërë kya gheno tonaghyo,
uyö takotangatwa na Umwika Ömöhörëëru uwa Waryobha hë.
Ömöntö kya uyö,
nkotangatwa arë na ëkëhwë ikya umubhisa uwa Kiristo.
Na bhëënyu mwaighwa igha,
ëkëhwë kiyö,
nkuusha kërë,
kasi bhoono kyaamara ukuusha ko-kebhara kono.
4 Bhëënyu abhaana abhaane abhaghonshe,
m-baana abha Waryobha mörë.
Kora mwaanga amangʼana agha abharööti abha obhorongo bhayö.
Mwaanyoora obhotoro ubhwa okokora igho,
ko bhoora Umwika Ömöhörëëru uwa Waryobha mö-bhëënyu arë.
Umwika Ömöhörëëru uyö,
we aana obhotoro okokera ëkëhwë ikya Oghosambwa,
kiyö kekotangata abhantö bhano bhatakwighwera Waryobha.
5 Abharööti abha obhorongo bhayö,
m-ba ko-kebhara kono,
ku bhuyö nkoghamba bharë amangʼana agha bhunyakyaro.
Abhantö abha ko-kebhara kono bhano bhatakwighwera Waryobha,
nkobhaitegherra bharë.
6 Bhëëtö m-baana abha Waryobha törë.
Ömöntö wowonswe ono amanyirë Waryobha,
nkutwitegherra arë.
Kasi ono atarë omoona uwa Waryobha,
takutwitegherra hë.
Ku bhuyö ni-igho tokotora okomanya na ukwahora abhantö bhano bhakotangatwa na Umwika Ömöhörëëru uwa obhoheene,
na bhano bhakotangatwa na ëkëhwë ikya obhorongo.
Righonshe irya Waryobha
7 Abhaghonshe abhaane,
tohanshane,
ko bhoora righonshe nku-Waryobha rikurwa.
Ömöntö wowonswe ono akohansha bharikyaye,
uyö nkobha arë omoona uwa Waryobha,
kora namanyirë Waryobha.
8 Kasi ömöntö wowonswe igho ono atahanshirë bharikyaye,
uyö tamanyirë Waryobha hë,
ko bhoora Waryobha we arëngë righonshe.
9 Waryobha yöörökya righonshe iryaye kö-bhëëtö,
ko okotoma Omoona uwaaye umumwëmwë ko-kebhara kono.
Yaakörrë igho,
okore okohetera ku-uyö,
tunyoore öbhöhöru ubhwa amakora ghonswe igho.
10 Righonshe rërëngë igha,
ti-igha m-bëëtö twaatangatirë okohansha Waryobha,
kasi we yaatangatirë okotohansha.
Righonshe riyö,
ndyo ryaaghërrë akatoma Omoona uwaaye,
okore abhe ikimwenso ikya ukutwighwerrania na Waryobha,
ku ukuruusya-ho ëbhëbhë ibhyëtö.
11 Abhaghonshe abhaane,
ko bhoora igha Waryobha ni-igho yaatohanshirë,
na bhëëtö bhonswe ni-igha tohanshane.
12 Taaho ömöntö ono yaakarööshë Waryobha hë.
Kasi hano toraahanshane,
Waryobha nkobha arë na öbhömwë na bhëëtö,
na righonshe iryaye,
nkohekerana rërë mö-bhëëtö.
13 Bhëëtö ntoona öbhömwë na Waryobha,
umwene wonswe naana öbhömwë na bhëëtö.
Ntomanyirë igho,
ko bhoora yatohaana Umwika uwaaye.
14 Bhëëtö twaamaaha Omoona uwa Waryobha,
kora nkötëëbhya törë abhantö abhandë obhoheene igha,
Taata Waryobha yaatömirë Omoona uwaaye ko-kebhara kono,
okore abhe Ömötöörya uwa abhantö bhonswe igho.
15 Ömöntö wowonswe igho ono akwikërrya igha,
Yëësu Kiristo m-Moona uwa Waryobha,
uyö naana öbhömwë na Waryobha,
na Waryobha wonswe,
naana öbhömwë na ömöntö kya uyö.
16 Bhëëtö ntomanyirë,
kora nkukumya törë igha,
Waryobha natohanshirë.
Waryobha we righonshe.
Ömöntö wowonswe igho ono akobha na righonshe,
we aana öbhömwë na Waryobha,
na Waryobha wonswe,
nkobha arë na öbhömwë na ömöntö kya uyö.
17 Ni-igho righonshe rekohekerana mö-bhëëtö,
okore tuushe okobha na obhokarë urusikö roora urwa okobhotorrwa ikiina.
Ko bhoora öbhömënyi ubhwëtö ko-kebhara kono,
mbutuubhaini kya bhoora Yëësu yaamënyirë ko-kebhara kono.
18 Ömöntö ono aana righonshe,
uyö taana entarëki hë.
Righonshe irya obhoheene,
nkwata rërë entarëki yonswe igho,
ko bhoora obhoobha ubhwa okobhotorrwa ikiina,
mbo bhokoghera abhantö bhabha na entarëki.
Ömöntö ono aana entarëki,
uyö righonshe tereraahekerana ko-we hë.
19 Bhëëtö ntohanshirë Waryobha,
kora bharikyëtö bhonswe ntobhahanshirë,
ko bhoora Waryobha,
we yaatangatirë okotohansha.
20 Hano ömöntö wowonswe igho araaghambe igha nahanshirë Waryobha,
na ambe narëghirë umukumya murikyaye,
uyö m-morongo.
Keno kekoghera toramanya igha m-morongo,
n-ko bhoora atahanshirë umukumya murikyaye ono akomaaha,
kasi araghamba igha,
nahanshirë Waryobha ono ataakarööshë.
21 Mbe,
Waryobha atohaayë umughiro igha,
ömöntö wowonswe igho ono ahanshirë Waryobha,
ni-igha ahanshe umukumya murikyaye.a