Okokera ëbhëbhë
5
Ömöntö wowonswe igho ono akukumya Yëësu igha n-Kiristo,
uyö we omoona uwa Waryobha.
Ömöntö wowonswe igho ono ahanshirë umwibhöri,
nkohansha arë kora na omoona uwa umwibhöri uyö.
2 Nkomanya törë igha ntohanshirë abhaana abha Waryobha,
ko okohansha Waryobha na okoghoota imighiro ighyaye.
3 Ko bhoora hano ömöntö yahansha Waryobha,
nkoghoota arë imighiro ighyaye.
Kora imighiro ighyaye të-mëköngʼu ighya okoghoota hë.
4 Nkoghamba ndë igho ko bhoora igha,
kera omoona uwa Waryobha,
naana obhotoro ubhwa ukwanga obhoghogho ubhwa ko-kebhara kono.
Obhoghogho bhuyö,
nkubhwanga törë ku ukukumya Yëësu Kiristo.
5 Bhoono n-nawë aana obhotoro ubhwa ukwanga obhoghogho ubhwa ko-kebhara kono?
No-oora akukumya igha,
Yëësu Kiristo m-Moona uwa Waryobha.
Obhoheene ubhwa amangʼana agha Yëësu Kiristo
6 Yëësu Kiristo yaahonyorwa igha we m-Moona uwa Waryobha,
ko enshera iya amanshë agha obhobhatiisyo ubhwaye,
na ko-maanyinga agha ukukwa ukwaye.
Tiyöörökëri ko obhobhatiisyo na amanshë ibhyene igho hë,
kasi kora na ukwëtëkya amaanyinga aghaaye ko-mosarabha.
7 Umwika Ömöhörëëru we akwimererra ghayö igha m-maheene,
ko bhoora we obhoheene.
8 Bhaaho abhaimërërri bhatatö bhano bhakwimererra obhoheene ubhwa amangʼana agha Yëësu Kiristo,
[mu-ryobha iyö,
n-Taata,
Engʼana,
na Umwika Ömöhörëëru,
abhatatö bhayö n-këntö këmwë.
9 Ghwiki ghaaho amangʼana atatö ghano ghakwimererra ko-kebhara kono,]
a Umwika,
amanshë,
na amaanyinga,
atatö ghayö ghonswe igho,
ngo ghakwikererrania ko-kebhara kono.
Nyoore torakumya ubhwimërërri ubhwa abhantö,
ubhwimërërri ubhwa Waryobha,
mboona ubhurito bhököngʼu,
ko bhoora bhuyö,
mbo obhoheene bhono Waryobha yaatoora-ho,
ko mangʼana agha Omoona uwaaye.
10 Ömöntö wowonswe igho ono akukumya Omoona uwa Waryobha,
uyö nkunyoora örë akumiri igha,
ubhwimërërri bhuyö,
nu-bhwa obhoheene.
Kasi ono atakukumya Waryobha,
nkomokora arë morongo,
ko bhoora akwanga ukukumya obhoheene bhono Waryobha yaaghamba ko amangʼana agha Omoona uwaaye.
11 Keno kekoghera torabha na obhoheene ubhwa ghano Waryobha yaatötëëbhëri igha m-maheene,
nö-bhöhöru ubhwa amakora ghonswe igho bhono yaatohaana.
Öbhöhöru bhuyö,
ntwaabhunyoora ko okoghera iya ukukumya Omoona uwaaye.
12 Ömöntö wowonswe igho ono aana öbhömwë na Omoona uwa Waryobha,
uyö naana öbhöhöru bhuyö.
Kasi ono ataana öbhömwë na Omoona uwa Waryobha,
uyö taana öbhöhöru hë.
Obhokarë ku-Waryobha
13 Mbandëkëëyë amangʼana ghayö,
bhëënyu bhano mukukumya Omoona uwa Waryobha,
okore momanye igha,
mmoona öbhöhöru ubhwa amakora ghonswe igho.
14 Bhëëtö nkokareha törë bhököngʼu ukuhika haangʼë Waryobha,
ko bhoora ntomanyirë igha,
nkutwighwa arë hano twamosabha ryoryonswe igho okorengʼaana na righonshe iryaye.
15 Mbe,
ntomanyirë igha,
nkutwitegherra arë,
hano twamosabha kyokyonswe igho,
kiyö nkyo kekoghera torabha na obhoheene igha naraatohaane ghano tokomosabha.
16 Bheeho ëbhëbhë ibhyëndë bheno bhetakotoora ömöntö hare na Waryobha,
amakora ghonswe igho.
Hano ömöntö wowonswe igho araamaahe umukumya murikyaye arakora ëbhëbhë kya bhiyö,
amosabhere ku-Waryobha.
Waryobha naraamohaane öbhöhöru.
Ni-igho ekobha ko bhano bhakokora ëbhëbhë kya bhiyö.
Kasi bheeho ëbhëbhë ibhyëndë,
bheno bhikwahora ömöntö abha hare na Waryobha,
amakora ghonswe igho.
Öni tenkoghamba igha,
asabhere ömököri uwa ëbhëbhë kya bhiyö ku-Waryobha.
17 Okokora engʼana yoyonswe igho eno etaingʼarëëyi ku-Waryobha,
nko okokora ëbhëbhë.
Kasi hamwë na ghayö,
bheeho ëbhëbhë ibhyëndë bheno bhetakwahora ömöntö abhe hare na Waryobha amakora ghonswe igho.
18 Ntomanyirë igha,
omoona uwa Waryobha taköghëndërrya okokora ëbhëbhë hë.
b Keno kekoghera ataköghëndërrya okokora ëbhëbhë,
n-ko bhoora Yëësu Kiristo akomorenda.
c Ku bhuyö Oghosambwa teghokomokora ngʼana hë.
19 Ntomanyirë igha,
bhëëtö m-baana abha Waryobha törë.
Kasi abhantö abhandë bhonswe igho bhano bhatakwighwera Waryobha,
bhayö nkobhaahwa bharë na Oghosambwa.
20 Ghwiki ntomanyirë igha,
Omoona uwa Waryobha yaamara ukuusha ko-kebhara kono,
yaatohaana obhongʼaini ubhwa okomanya Waryobha ubhwa heene.
Ntoona öbhömwë na Waryobha uwa heene,
ko okohetera kö-bhömwë ubhwëtö na Yëësu Kiristo Omoona uwaaye.
Yëësu Kiristo uyö,
we Waryobha uwa heene,
na uwa öbhöhöru ubhwa amakora ghonswe igho.
21 Bhëënyu abhaana abhaane abhaghonshe,
mwiyangarrenga motakaasengerra ëbhëtöndö.d