Okomenya kya abhaana abha Waryobha
3
Momaahe bhono Taata Waryobha atohanshirë bhököngʼu,
igha bhëëtö tobherekerwe igha,
m-baana abhaaye törë!
Obhoheene ni-igho törë.
Kasi keno kekoghera abhantö abha ko-kebhara kono,
bhano bhatakwighwera Waryobha bhatamanyirë igha m-baana abhaaye törë,
n-ko bhoora bhatamanyirë Waryobha.
2 Abhaghonshe abhaane,
ntomanyirë igha,
bhoono m-baana abha Waryobha törë,
kasi teraamanyekana bhuuya kya bhono torebha hë.
Keno tomanyirë ni-igha,
hano Yëësu Kiristo arikyora ko-kebhara kono,
nturituubhana nawe,
ko bhoora ntoremomaaha bhono arë.
3 Ömöntö wowonswe igho ono akwitengʼera igha atuubhane na Yëësu Kiristo,
aisaabhuure,
abhe ömöhörëëru kya Yëësu Kiristo.
4 Ömöntö wowonswe igho ono akokora ëbhëbhë,
uyö nkosarya arë amaraghërryö agha Waryobha.
Nkoghamba ndë igho,
ko bhoora okokora ëbhëbhë,
nko okosarya amaraghërryö.
5 Mmomanyirë igha Yëësu Kiristo yaaishirë ko-kebhara kono,
okore aruusi-ho ëbhëbhë ibhyëtö.
Ghwiki we taana ëkëbhë kyokyonswe keera hë.
6 Ömöntö wowonswe ono aköghëndërrya okobha na öbhömwë na Yëësu Kiristo,
taatore ököghëndërrya okokora ëbhëbhë.
Kasi ömöntö wowonswe igho ono aköghëndërrya okokora ëbhëbhë,
uyö tamanyirë obhotoro ubhwa Yëësu Kiristo hë.
7 Bhoono abhaana abhaane abhaghonshe,
motakaikërrya ömöntö wowonswe igho abhangʼaine.
Ömöntö wowonswe ono akokora amangʼana agha obhoheene,
uyö m-möntö uwa heene ku-Waryobha kya bhono Yëësu Kiristo arëngë uwa heene.
8 Kasi ömöntö wowonswe ono aköghëndërrya okokora ëbhëbhë,
uyö m-möntö uwa Oghosambwa.
Ntomanyirë igho,
ko bhoora Oghosambwa n-gököri ughwa ëbhëbhë ukurwa kare.
Kiyö nkyo ikibhuno keno kyaaghërrë Omoona uwa Waryobha akaasha ko-kebhara kono,
okore asari emeremo ighya Oghosambwa.
9 Ömöntö wowonswe ono yaamara okobha omoona uwa Waryobha,
taköghëndërrya okokora ëbhëbhë hë,
ko bhoora naana eteemo iya Waryobha.
Taköghëndërrya okokora ëbhëbhë,
ko bhoora m-moona uwa Waryobha.
10 Kasi ömöntö ono atakokora amangʼana agha heene,
handë ono atahanshirë umukumya murikyaye,
uyö temoona uwa Waryobha hë.
Ni-igho tokomanyërrya abhaana abha Waryobha bhono bharë,
bheena abhaana abha Oghosambwa bhono bharë.
Okohanshana ukwa Abhakiristo
11 Ukurwa hano mwaasimiri ukukumya Yëësu Kiristo,
mwaaighuurë engʼana eno igha,
Abhakiristo ni-igha tohanshane.
12 Totakaabha kya Kaini,
ömöntö uwa Oghosambwa,
oora yaaitirë mura waabho omoke.
a N-kwakë yaamwitirë?
Yaamwitirë ko bhoora ghano Kaini yaakoranga,
m-maghogho ghaarë,
kasi ghano mura uwaabho omoke uyö yaakoranga,
n-ga heene ghaarë.
13 Ku bhuyö abhakumya bharikyane,
motakaaroghoora hano abhantö bhano bhatakwighwera Waryobha bharaabhareghe.
14 Bhëëtö ntomanyirë igha,
twaarwa mu-singuru isya uruku,
na bhoono ntoona öbhöhöru ubhwa amakora ghonswe igho.
Ntomanyirë igho,
ko bhoora ntohanshirë abhakumya bharikyëtö.
Ömöntö wowonswe igho ono ataana righonshe,
uyö nakëghöötërëëywë na singuru isya uruku.
15 Ömöntö wowonswe igho ono akoregha umukumya murikyaye,
uyö nu-mwiti.
Mmomanyirë bhuuya igha,
taaho umwiti ono aana öbhöhöru ubhwa amakora ghonswe igho hë.
16 Hano Yëësu Kiristo yaaruusiri öbhöhöru ubhwaye ko okoghera iya bhëëtö,
yaatwörökëri righonshe irya obhoheene.
Kora bhëëtö bhonswe ni-igha turuusi öbhöhöru ubhwëtö,
ko okoghera iya abhakumya bharikyëtö.
17 Ömöntö wowonswe igho ono aana ëbhëntö ibhya ko-kebhara kono,
hano araamaahe umukumya murikyaye aana obhohabhë,
ni-igha amötöörri.
Kasi hano araange ökötöörrya uwa obhohabhë uyö,
ömöntö kya uyö,
atakaghamba igha aana righonshe irya Waryobha.
18 Bhëënyu abhaana abhaane abhaghonshe,
totakaahanshana ko mangʼana agheene igho hë,
kasi tohanshane këmwëkëmwë ko okokorrana ubhwa heene.
19 Hano toraahanshane igho,
ho toraabhe na obhoheene igha m-bantö abha heene törë,
kora senkoro isyëtö nseraatereme ku-Waryobha.
20 Nokaanyoora torashuutwa mo-senkoro isyëtö igha m-ba ëbhëbhë törë,
kasi ntoona omorembe,
ko bhoora ntomanyirë igha Waryobha,
we omonene okokera senkoro isyëtö,
kora namanyirë amangʼana ghonswe igho.
21 Abhaghonshe abhaane,
hano oraanyoore totakushuutwa mo-senkoro isyëtö,
ntoraakarehe ukuhika haangʼë Waryobha.
22 Kora kyokyonswe igho keno tokomosabha,
nkotohaana arë,
ko bhoora nkwighwera törë amaraghërryö aghaaye,
kora nkokora törë amangʼana ghano ghakumushomera.
23 Umughiro ughwaye ngo ghono igha,
totakanga ukukumya Yëësu Kiristo,
Omoona uwaaye,
kora tohanshane kya bhoora yaatoraghërrëëyi.
24 Ömöntö wowonswe igho ono akwighwera imighiro ighya Waryobha,
uyö naana öbhömwë nawe.
Waryobha wonswe naana öbhömwë na ömöntö kya uyö.
Ntomanyirë igha,
Waryobha naana öbhömwë na bhëëtö,
ko okohetera Umwika Ömöhörëëru ono yaatohaana.