Yëësu Kiristo we akotosabhera
2
Bhëënyu abhaana abhaane abhaghonshe,
nkobhandekera ndë amangʼana ghano,
okore motakaakora ëbhëbhë.
Kasi ömöntö wowonswe igho hano araakore ëbhëbhë,
amanye igha ntoona ono akotosabhera ko-Taata Waryobha.
Uyö we Yëësu Kiristo,
ömöntö uwa heene.
2 Uyö we ikimwenso ikya ukutwighwerrania na Waryobha ku ukuruusya-ho ëbhëbhë ibhyëtö.
Ghwiki të-bhëbhë ibhyëtö ibhyene igho hë,
kasi kora na ëbhëbhë ibhya abhantö bhonswe igho abha ko-kebhara kono.
3 Mbe,
kasi engʼana eno ikwörökya igha ntomanyirë Waryobha,
no-kosooka imighiro ighyaye.
4 Ömöntö wowonswe igho ono akoghamba igha namanyirë Waryobha,
kasi takoghoota imighiro ighya Waryobha hë,
m-morongo,
tamanyirë obhoheene hë.
5 Kasi ömöntö ono akosooka engʼana iya Waryobha,
uyö we aishööyë righonshe irya Waryobha.
Ni-igho tokomanya igha ntoona öbhömwë na Waryobha.
6 Hano ömöntö yaghamba igha aana öbhömwë na Waryobha,
ni-igha abhe kya bhono Yëësu yaarë.
Umughiro ughwa okohanshana
7 Abhaghonshe abhaane,
umughiro ghono nkobhandekera te-mohya hë,
kasi nu-ghwa kare ghooraghoora,
ghono mwaarenga momanyirë ukurwa hano mwaasimiri ukukumya Yëësu Kiristo.
a Umughiro ughwa kare ghuyö,
ngo engʼana iya okohanshana eno mwaighwa.
8 Nokaanyoora ngambirë igha,
umughiro ghuyö nkobhandekera n-gwa kare,
kasi ghwiki m-mohya.
Obhoheene ubhwa obhohya ubhwa umughiro ghuyö,
bhwaamaahekana kö-bhömënyi ubhwa Yëësu Kiristo.
Öbhömënyi bhono bhëënyu moonabho,
bhonswe nkwörökya bhörë igha,
m-maheene umughiro ghuyö m-mohya.
Ngambirë igho,
ko bhoora igha,
ikisuntë ikya obhoghogho na ukwanga okomanya,
nkwihëënia bhërë,
na obhorabhu ubhwa heene bhomarrë okorabherra.
9 Ömöntö wowonswe igho ono akoghamba igha mo-bhorabhu arë,
na eno arëghirë umukumya murikyaye,
uyö mu-kisuntë akërë.
10 Ömöntö wowonswe igho,
ono ahanshirë umukumya murikyaye,
uyö mo-bhorabhu arë.
Taana engʼana mo-nkoro iyaaye,
eno eraamutimbe akore ëbhëbhë.
11 Kasi ono arëghirë umukumya murikyaye,
mu-kisuntë akërë.
Kora mu-kisuntë akoghenda.
Tamanyirë hasë akughya hë,
ko bhoora ikisuntë kyaamukundikirya amaiso.
12 Bhëënyu abhaana abhaane abhaghonshe,
nkobhandekera ndë,
ko bhoora mwaabherwa ëbhëbhë ibhyënyu ko okohetera ku-Yëësu Kiristo.
13 Bhëënyu bhaataata,
nkobhandekera ndë
ko bhoora momanyirë Yëësu Kiristo,
ono yaarenga-ho ukurwa okosemoka.
Nkobhandekera ndë bhëënyu abhamura,
ko bhoora mwabhaaha Oghosambwa.
b
Nkobhaadekera ndë bhare abhaana,
ko bhoora mmomanyirë Taata Waryobha.
14 Nkobhandekera ndë bhëënyu bhaataata,
ko bhoora mmomanyirë Yëësu Kiristo,
ono yaarenga-ho ukurwa okosemoka.
Nkobhandekera ndë bhëënyu abhamura,
ko bhoora moona singuru,
kora nköghëndërrya mörë okoghoota engʼana iya Waryobha,
mwabhaaha na Oghosambwa.
15 Motakaahansha okokora amangʼana amaghogho kya abhantö bhano bhatakwighwera Waryobha.
Ndakyorra okobhatëëbhya igha,
motakaahansha obhoghogho bhwobhwonswe bhoora ubhwa ko-kebhara kono.
c Ömöntö ono ahanshirë amangʼana amaghogho agha ko-kebhara kono,
taatore okohansha Taata Waryobha hë.
16 Ngambirë igho ko bhoora igha,
obhoghogho ubhwa ko-kebhara kono,
tibhukurwa ku-Waryobha hë,
nko-kebhara kono bhukurwa.
Obhoghogho bhuyö,
n-kya oronamba urwa ömöbhërë,
ukwighomba okobha na kyokyonswe igho keno okomaaha,
na ikiheemere ikya ubhwamë.
17 Ekebhara hamwë na oronamba urwa abhantö mberaahete,
kasi wowonswe igho ono akokora ghano ghakushomera Waryobha,
naraabhe na öbhöhöru ubhwa amakora ghonswe igho.
Mwiraarerrenga abhabhisa abha Yëësu Kiristo hobharë
18 Bhëënyu abhaana abhaane abhaghonshe,
seno nsyo sinsikö isya umuhiko!
Mwaatëëbhibhwa igha umubhisa uwa Kiristod nkuusha arë,
na kora bhoono igho,
abhabhisa abhaaru abha Yëësu Kiristo bhaamara ukuusha.
Amangʼana ghayö,
ngo ghakoghera toramanya igha,
seno nsyo sinsikö isya umuhiko.
19 Abhantö bhayö,
mo-makanisa aghëëtö bhaarwa,
kasi tebhaarë na öbhömwë ubhwa heene na bhëëtö hë.
Singa bhaarë na öbhömwë ubhwa heene na bhëëtö,
mbakaatighaayë kö-bhëëtö.
Kasi mbaatanora,
ekabha harabhu igho igha,
tebhaarë na öbhömwë na bhëëtö hë.
20 Kasi bhëënyu,
Yëësu Ömöhörëëru yaabhahaana Umwika uwaaye,
e bhoono bhëënyu bhonswe igho,
mmomanyirë obhoheene.
21 Tenkobhandekera ritashandighi reno ko bhoora igha,
temomanyirë obhoheene hë.
Kasi nkobhandekera ndë ko bhoora igha,
mmobhomanyirë bhuuya.
Ghwiki mmomanyirë igha,
tebhooho obhorongo bhwobhwonswe igho,
bhono bhukurwa mo-bhoheene hë.
22 Ömöntö omorongo nö-öhë?
Ömöntö omorongo no-ono akoghamba igha,
Yëësu ti-Kiristof hë.
Ömöntö ono akwanga Taata Waryobha,
na Yëësu Omoona uwaaye,
uyö we umubhisa uwa Kiristo.
23 Ömöntö ono akwanga Omoona uwa Waryobha,
uyö taana öbhömwë na Taata Waryobha hë.
Kasi,
ono akwikërrya Omoona uyö ko-bhantö,
uyö naana öbhömwë na Taata Waryobha.
24 Bhoono,
möghëndërri okonaghya mo-senkoro isyënyu amangʼana ghaara mwëëghibhwa ukurwa hano mwaasimiri ukukumya Yëësu Kiristo.
Hano moraaghëndërri okoghoota amëëghyö ghayö,
ho moraabhe na öbhömwë na Omoona uwa Waryobha,
na Taata Waryobha.
25 Riraghano reno yaatoraghaini ni-igha,
tunyoore öbhöhöru ubhwa amakora ghonswe igho.
26 Nkobhandekera ndë amangʼana ghayö,
okore mbakaani ko amangʼana agha abhantö bhaara bhakushaashya okobhasirya.
27 Kasi bhëënyu,
Yëësu Kiristo yaabhahaana Umwika Ömöhörëëru,
ono akwikara mö-bhëënyu.
Uyö we aköbhöörökërrya ghonswe igho,
na amëëghyö aghaaye na-agha obhoheene,
te-agha obhorongo hë.
Ku bhuyö,
taaho ömöntö uwöndë uwa ököbhöörökërrya,
g kya bhono Umwika aköbhëëghya,
möghëndërri okobha na öbhömwë na Yëësu Kiristo.
28 Bhëënyu abhaana abhaane abhaghonshe,
möghëndërri okobha na öbhömwë na Yëësu Kiristo.
Möghëndërri igho,
okore enkaagha eno arikyora,
tokarehe,
totakaasha okosooka.
29 Mmomanyirë igha,
Yëësu Kiristo n-wa heene.
Ku bhuyö momanye igha,
wowonswe igho ono akokora amangʼana agha heene,
uyö we omoona uwa Waryobha.