Ritashandighi irya mbere irya
Yohana
Yëësu we engʼana iya öbhöhöru
1
Nkobharaarekera törë amangʼana agha ono akobherekerwa igha,
Engʼana iya öbhöhöru,
ono yaarenga-ho ukurwa okosemoka.
a Bhëëtö ntwaamwighuurë,
kora tokamomaaha na amaiso aghëëtö abheene.
Tokamwitaaha,
kora tokamoghootaghoota na amabhoko aghëëtö.
2 Engʼana iya öbhöhöru uyö,
we Waryobha yaahönyööyë ko-bhantö,
kora bhëëtö bhonswe ntwaamörööshë.
Ku bhuyö ghano tokobhatëëbhya,
no-bhoheene ubhwa amangʼana aghaaye.
Torabhatëëbhya igha,
ömöntö uyö akohaana abhantö öbhöhöru,
ho arë amakora ghonswe igho.
Ömöntö uyö,
yaarenga hamwë na Taata Waryobha,
kasi bhoono Waryobha yamohonyora kö-bhëëtö.b
3 Uyö twaamaaha na ukumwighwa,
we tokobharaarekera amangʼana aghaaye.
Torabharaarekera,
okore mobhe na öbhömwë na bhëëtö ubhwa ukumukumya.
Bhëëtö ntoona öbhömwë na Taata Waryobha,
bhaana Omoona uwaaye Yëësu Kiristo.c
4 Nkobhandekera törë ghano,
okore bhëëtö bhonswe igho tushomerwe bhököngʼu.
Okomenya mo-bhorabhu
5 Mbe,
engʼana eno Yëësu Kiristo yaatötëëbhya,
yo tokobharaarekera igha,
Waryobha we obhorabhu,
ikisuntë tëkërëngë mu-Waryobha hë.
6 Ku bhuyö hano toraaghambe igha ntoona öbhömwë na Waryobha,
eno toraghëndërrya okomenya mu-kisuntë ikya obhoghogho,
hayö nkorongoha törë.
Ghwiki hayö noraanyoore tutighirë okokora amangʼana agha obhoheene.
7 Kasi hano oraanyoore mo-bhorabhu tömënyirë,
kya bhono Waryobha amënyirë-mo,
hayö ntoraabhe na öbhömwë bhëëtö abheene ko bheene.
Kora hayö ho ukunyoora amaanyinga agha Omoona uwaaye Yëësu Kiristo gharatosaabhuura ëbhëbhë ibhyëtö bhyonswe igho.
8 Hano toraaghambe igha tetoona ëbhëbhë bhyobhyonswe igho hë,
hayö noraanyoore toraingʼaina bhëëtö abheene,
kora tetomanyirë obhoheene hë.
9 Kasi hano toraatëëbhi Waryobha igha twaakora ëbhëbhë,
Waryobha naraatwabhere ëbhëbhë ibhyëtö.
Naraatosaabhuure obhoghogho ubhwëtö bhwonswe igho,
ko bhoora we n-wa heene,
kora nkokora arë ubhwa heene.
10 Hano toraaghambe igha tetwakakörrë ëbhëbhë,
hayö n-kya hano toraaghambe igha,
Waryobha m-morongo.
Kora noraanyoore twikaanirë engʼana iyaaye.