Öbhömënyi bhono bhukushomera Waryobha
4
Mbe,
ko bhoora Yëësu Kiristo yaatëësirwë kö-möbhërë ughwaye,
bhëënyu bhonswe mwisëëmi okoteeseka kya we.
Nkoghamba ndë igho,
ko bhoora igha,
ömöntö ono amarrë koteeseka kö-möbhërë ughwaye,
uyö takobhaahwa na ëbhëbhë hë.
2 Ku bhuyö ömöntö kya uyö,
öbhömënyi ubhwa öbhöhöru ubhwaye bhonswe igho bhono akeenabho ko-kebhara kono,
naraakorenga amangʼana ghano Waryobha akutuna,
taabhe na oronamba oroghogho hë.
3 Kare hayö,
mwaarenga na oronamba oroghogho,
obhosooraare,
na ubhunywi ubhwa amarwa.
Mwaahanshirë sinyangi isya okorya,
ubhunywi ubhwa okoheterania,
na okosengerra ëbhëtöndö,
engʼana iyö m-mughiro ku-Waryobha.
Amangʼana ghayö mwaaghakörrë ibhagha itambë bhököngʼu.
Bhoono motakaaghëndërrya ghwiki okokora igho.
4 Bhoono abhantö bhano bhatamanyirë Waryobha,
nkoroghoora bharë,
hano bhamaaha igha,
temokosanga nabho ghwiki okokora amangʼana amaghogho ghaara,
ku bhuyö,
nkobhatoka bharë.
5 Kasi ni-igha,
abhantö bhayö na-bheene bharikoorerra ku-Waryobha.
Waryobha amarrë ukwisëëmya igha,
abhotorre ibhiina abhantö bhonswe igho,
abhahöru na bhano bhaakwa.
6 Kiyö nkyo ikibhuno keno kyaaghërrë abhantö bhano bhaakuurë,
bhakaraarekerwa Amangʼana Amaiya.
Mbaaraarëkëëywë,
okore nokaanyoora igha bhaabhotorrwa ibhiina kö-bhömënyi ubhwabho kya abhandë,
kasi ko obhotoro ubhwa Umwika Ömöhörëëru,
bhabhe abhahöru kya bhono Waryobha arëngë möhöru.
7 Umuhiko ughwa amangʼana ghonswe igho,
ghwaahikirë haangʼë.
Ku bhuyö,
mongʼainihe na ukwiyangarra ko-mangʼana ghonswe igho,
okore mosaasaamenga.
8 Engʼana enene okokera ghonswe igho,
ni-igha mohanshane bhököngʼu,
hano moraahanshane,
moraabherane bhököngʼu obhosarya ubhwënyu bhono mokokorrana.a
9 Mösërëëninga bharikyënyu motakwibhëmbëërya.
10 Kera ömöntö naana ituho iyaaye eno yaahaanwa na Waryobha.
Bhoono ni-igha aghekorre emeremo bhuuya ko ökötöörrya bharikyaye.
Akorenga igho kya umwimërërri umuuya uwa örööbhö urwa Waryobha urwa seteemo nsharu.
11 Hano ömöntö aana amangʼana agha okoghamba,
aghambe ko obhotoro bhono bhuruurë ku-Waryobha.
Na hano araakorre bharikyaye emeremo,
abhakorre ko obhotoro bhono bhukurwa ku-Waryobha.
Hano moraakore igho,
Waryobha naraakumibhwi ko amangʼana ghonswe igho,
ko okoghera iya Yëësu Kiristo,
uyö we aana ubhuhika na öbhötöngi ko makora na amakora.
Amina.
Ukunyankera Yëësu
12 Abhaghonshe abhaane,
motakaaroghoora ko okoghera iya inyaanyi indito eno mukunyoora,
iyö nu-mukumo ughwënyu ikushaashya.
Motakaakanya igha engʼana iyö ekobhanyoora ne-ehya.
13 Kasi bhoono bhëënyu mushomerwe igha,
nkunyoora mörë inyaanyi,
kya bhoora Kiristo yaanyöörrë.
Bhoono ni-igha,
mushomerwenga,
okore muushe kushomerwa bhököngʼu,
hano ariisha na ubhuhika ubhwaye bhötöörwë harabhu igho.
14 Hano moraatokwe ko okoghera iya iriina irya Yëësu Kiristo,
momanye igha mmoraangʼoorwe.
Engʼana iyö nköbhöörökya ërë igha,
Umwika uwa Waryobha uwa ubhuhika,
hamwë arë na bhëënyu.
15 Mbe,
ömöntö atakaanyoora inyaanyi ko okoghera iya ubhwiti ubhwa abhantö,
ubhwibhi,
okokora amangʼana amaghogho handë okosarekania abhantö.
16 Ömöntö wowonswe ono araanyoore inyaanyi ko bhoora igha m-mosoorani uwa Yëësu Kiristo,
atakaasooka.
Kasi atööni Waryobha igha,
ni-riina riyö akobherekerrwa.
17 Momanye igha,
enkaagha iya okobhotora ibhiina ihikirë,
na Waryobha naraasimi okobhotorra ibhiina abhantö abhaaye.
Mbe,
hano okobhotora ibhiina koraasimiri kö-bhëëtö abhantö abhaaye,
bhoono iyakë erebha ko bhano bhakwanga Amangʼana Amaiya agha Waryobha?
18 Amaandeko Amahörëëru gharaghamba igha,
“Hano oraanyoore igha n-këköngʼu ko abhantö abha heene ökötööribhwa,
bhoono iyakë erebha ko-bhantö abha ëbhëbhë bhano bhatakwighwera Waryobha?”b
19 Ku bhuyö,
bhano bhakunyoora inyaanyi ko okokora ghano Waryobha akutuna,
bhamanye igha,
Waryobha m-Möbhömbi uwa heene.
Ku bhuyö,
bho bhaitoore mo-mabhoko aghaaye,
bhaghëndërri okokora amangʼana amaiya.