Okonaghya abhantö abha Waryobha
5
Bhoono nkushumaasha ndë na bhëënyu abhaghaaka abha ekanisa.
Öni m-moghaaka murikyënyu ndë,
ono naamaaha na amaiso aghaane bhono Kiristo yaatëësirwë.
Ghwiki öni m-mosangi murikyënyu ndë,
uwa ubhuhika bhono bhoraamaahekane bhöngö hano.
Ku bhuyö nkobhasaasaama ndë igha,
2 mobhe abhakaraabhërri abha heene abha ekanisa eno mwaahaanwa na Waryobha.
Ghwiki ni-igha,
monaghi ekanisa kwa enkoro inshiiya kya bhono Waryobha akutuna,
kasi te-kwa ukusingʼirribhwa hë.
Motakaakora emeremo ighyënyu kwa oronamba oroghogho urwa ukunyoora seehera,
kasi mobhe na omotono.
3 Motakaabha abhakaraabhërri abharörö ko bhano mokotangata,
kasi öbhömënyi ubhwënyu,
bhobhe ëkërëngyö ikiiya ko-bhantö.
4 Hano Yëësu Kiristo Omokaraabhërri Omonene uwa ekanisa aremaahekana harabhu igho,
murituhwa ituho iya ubhuhika.
Ituho eno etakughunda.
5 Ghwiki na bhëënyu abhamura,
ni-igha mosooke abhaghaaka abha ekanisa.
Bhëënyu bhonswe igho abhaghaaka na abhamura,
ighoigho.
Mobhe abhantö abhahaabhu,
mutighinkaneranenga.
Mokore igho,
ko bhoora Amaandeko Amahörëëru gharaghamba igha,
“Waryobha nkwanga arë abhantö bhano hakwiheema,
kasi örööbhö urwaye na-bhahaabhu akohaana.”a
6 Mbe,
mwisuuhi mobhe hansë iya obhotoro ubhwa Waryobha,
narebhariinia hano enkaagha iyaaye irihika.
7 Moteghere Waryobha inyanko iyëënyu yonswe igho,
ko bhoora nkobhaighwera arë öbhörrö bhököngʼu.
Kumya Waryobha wange Oghosambwa
8 Mwiraarerre,
mobhe maiso nkaagha syonswe igho,
ko bhoora umubhisa uwëënyu,
Oghosambwa,
b nkwinaaranaara ghörë kya ëndwë eno ikuruma,
eratuna ömöntö yaakere.
9 Mbe,
mwange amangʼana agha Oghosambwa.
Morebherre Oghosambwa ko okonaghya umukumo ughwënyu ku-Waryobha.
Momanye igha,
abhakumya bharikyënyu ahasë honswe igho ko-kebhara kono,
nkunyankibhwa bharë kya bhëënyu.
10 Waryobha uwa örööbhö rwonswe igho,
yaabhabherekera,
okore moghootane nawe ku-bhuhika ubhwaye ubhwa amakora ghonswe igho,
ko bhoora ntoona öbhömwë na Yëësu Kiristo.
Moraanyanke akabhagha akake igho,
kasi we narebhatogheka,
abhahaane singuru,
na okobhaimererra.
11 Waryobha we aana obhotoro amakora ghonswe igho!
Amina.
Amakëërërryö
12 Siriwanoc umukumya murikyëtö ono öni manyirë bhuuya igha,
m-möntö uwa heene,
we antöörëëyi okobhandekera ritashandighi iryëngʼë reno.
Nkutuna ndë mbatërëmi ko okobhatëëbhya obhoheene igha,
amangʼana ghano,
obhoheene nö-rööbhö urwa Waryobha.
Ku bhuyö ni-igha monaghe ko okohetera örööbhö ruyö!
13 Abhakumya bharikyënyu abha ekanisa eno ërëngë Bhaabhëëri,
d abhaahorwa bharikyënyu,
bharabhakëërya.
Omoona uwaane uwa ku-mukumo ono akobherekerwa igha Maariko,
wonswe nkobhakëërya arë.
14 Mokeerani ku righonshe irya heene.
e
Abhakumya abha Kiristo, omorembe ghobhe kö-bhëënyu bhonswe igho.