Amaraghërryö ko abhakari na abhashaasha
3
1-2 Na bhëënyu abhakari bhonswe,
ni-igha mwighwere bhashaasha abhëënyu,
okore nyoore bhaaho abhashaasha bhano bhatakosoorana amëëghyö agha Waryobha,
bharutwe na eteemo iyëënyu inshiiya.
Ku bhuyö bharatora ukukumya Waryobha bhatatëëbhiibhwi engʼana.
3 Motakaabha abhantö abha ubhwikööni bhono bhokomaahwa ubhwene igho,
kya ubhwa ukusuka situukya,
okotoora ëbhëntö ibhya esahaabhu,
handë singibho isya öbhöghöri obhonene.
4 Kasi ubhwikööni ubhwënyu,
bhusimiri mo-senkoro isyënyu.
Ubhwikööni bhono bhotakosareka,
handë okoghota.
Ubhwikööni bhuyö,
no-kobha na enkoro inshiiya na obhohaabhu,
bhuyö mbo ubhwikööni bhono bhoona ubhwera obhonene ku-Waryobha.
5 Ni-igho bhaaikoonanga kare,
abhakari bhano bhaaitengʼeranga Waryobha na ukwighwera bhashaasha abhaabho.
6 Saara mokaa Ibhurahimu,
a we ëkërëngyö.
Yaaighweranga mushaasha uwaaye,
kora yaamobherekeranga igha,
“Omonene uwaane.”
Kora bhëënyu bhonswe,
hano moraakorenga amangʼana amaiya motakoobhoha kyokyonswe igho,
hayö noraanyoore mobhaayë urwebhoro urwa Saara.
7 Na bhëënyu abhashaasha,
ni-igha mwikarane na abhakari abhëënyu kwa bhongʼaini,
momanye igha,
tebhaana singuru kya seno monasyo.
Mwikare na bhakëënyu kwa okosookana,
ko bhoora bhonswe mbarerya umwandö ughwa örööbhö urwa öbhöhöru.
Ku bhuyö abhashaasha mokore igho,
okore amasabhi aghëënyu,
ghatakaarebherrwa.
Mokore omotono ughwa okokora amangʼana amaiya
8 Ko okomarërrya,
nkobhatëëbhya ndë bhonswe igho igha,
mobhe kiina këmwë,
motakaabha na amaitegherro abhërë.
Mohanshane kya abhantö abha enda ëmwë,
mwabheranenga kora mwihootenga.
9 Motakaahakanga ikisiiyomba ko abhantö,
handë okotoka ömöntö ono akötökirë,
kasi engʼana inshiiya ko-bhantö kya bhayö,
no-kobhakorra ubhwa heene.
Ghayö ngo mwaabherekerrwa igha mokore,
okore mongʼoorwe.
10 N-kya bhono Amaandeko Amahörëëru ghakoghamba igha,
“Hano ömöntö araatune igha amenye bhuuya na ashomerwe,
atakaangʼaina abhantö na okobhaghamba bhoghogho.
11 Ghwiki ni-igha atakaakora amangʼana amaghogho,
akore amangʼana amaiya.
Akore omotono ughwa ukwikarana bhuuya na bharikyaye ko omorembe,
12 ko bhoora Omonene Waryobha nkomaaha arë abhantö bhano bhakokora bhwaheene,
kora nkwighwa arë amasabhi aghaabho.
Kasi bhano bhakokora amangʼana amaghogho,
bhayö nkobhahërrya arë enkoonwe.”b
13 Hano moraakore omotono ughwa okokora amangʼana amaiya,
nawë araabhanyanki?
14 Kasi hano moraanyankibhwi ko okoghera iya okokora amangʼana agha heene,
Waryobha naraabhangʼoore.
Ku bhuyö,
motakaabha na entarëki handë okoobhoha bhano bhakobhanyankya.
Mötööninga Yëësu Kiristo,
uyö we Omonene uwa öbhöhöru ubhwënyu.
15 Mwisëëmi nkaagha syonswe igho okohonshora ömöntö wowonswe ono araabhabhööri keno mukwesegha.
Mokorenga igho kwa obhohaabhu na esooko,
16 kora mobhenga na amaitegherro amaiya,
okore hano bharaabhahange engʼana ko amangʼana ghayö mokokora ko okoghera iya Kiristo,
bhasooke abheene.
17 Nyakara ömöntö unyankibhwi ko okoghera iya okokora amangʼana amaiya,
hano oraanyoore Waryobha ni-igho akutuna,
kasi otakaanyankibhwa ko okoghera iya okokora amangʼana amaghogho.
18 Yëësu Kiristo wonswe n-kamwë igho yaakuurë ko okoghera iya ëbhëbhë ibhyëtö,
okore atwighwerrani na Waryobha,
kasi tiyaarë na ëbhëbhë bhyobhyonswe igho hë.
M-möntö uwa heene yaarë.
Yaaitirwë kinyamöbhërë,
kasi ko obhotoro ubhwa Umwika Ömöhörëëru,
akanyoora ghwiki öbhöhöru.
19 Na ko obhotoro ubhwa Umwika Ömöhörëëru,
akaghya okoraarekera senkoro seno syaarë mo-kebhohe,
isya abhantö bhano bhaakwa.
20 Senkoro siyö ni-isya abhantö bhano bhataighwërëëyë Waryobha,
enkaagha eno Nuhu yaahaghaashanga esafina.
Waryobha yaaghömërrëëyi obhoghogho ubhwabho okohekera hano esafina yaahaghaashirwë,
kasi bhano bhahönirë ku-muhiko ughwa ëhöörö iyö,
m-bake igho bhaarë,
abhantö monaane abheene igho.
21 Amanshë agha ëhöörö iyö në-kërëngyö ikya obhobhatiisyo bhono bhokobhatöörya bhëënyu reero eno,
ti-igha nu-kuruusya ubhunyanku kö-möbhërë hë,
kasi no-kobha na enkoro inshiiya ku-Waryobha.
Amangʼana ghayö,
nkobha gharë okohetera ukuryoka ukwa Yëësu Kiristo.
22 Yëësu Kiristo yaaghëëyë mu-ryobha,
na bhoono igho,
naikaayë okobhoko ukwa bhoryo ubhwa Waryobha,
ahasë hano hakosookwa bhököngʼu.
Nkotonga arë abhamaraika,
ëbhëntö ëbhëtöngi bhyonswe igho,
na bheno bheena obhotoro.