Yëësu Kiristo we ëkërëngyö ikyëtö
12
Mbe,
ko bhoora rikomo rinene riyö irya abhaimërërri nditwinaarrë igho,
turuusi-ho kera engʼana eno ekotorebherra,
na ëkëbhë keno kikwangoha ukutwitanga.
Tokenye kö ököghömërrya mu-rikenya reno Waryobha yaatotoorra-ho.
2 Tomaahere ku-Yëësu,
ömösëmöri uwa umukumo ughwëtö na we areghohekerania.
Uyö we yaaghömërrëëyi uruku urwa ko-mosarabha,
tiyaarööshë igha në-nsöni okohanekwa ko-mosarabha hë.
Yaakörrë igho,
ko okoghera iya ukushomerwa kono kwaarë mbere iyaaye.
Bhoono igho naikaayë bhoryo ubhwa ikitumbë ikya ekekama ikya Waryobha.
3 Mwitegherre ghayö ghaanyöörrë Yëësu,
na bhono yaaghömërrëëyi amangʼana agha okorebherrwa bhököngʼu na abhaköri abha ëbhëbhë.
Ku bhuyö motakaakwa omotwe,
kora motakaarosa ukukumya Waryobha.
4 Nokaanyoora moona omotono ughwa okobhaaha ëbhëbhë,
kasi temoraitana riihë na ëbhëbhë okohekera ukukwa ukwënyu.
5 Kanaa,
mwebha amangʼana agha Waryobha ghano akobhakaania kinyabhaana abhaaye igha,
“Moona uwaane,
otakaasera ukuhiinywa na Omonene Waryobha.
Otakaakwa omotwe hano akokaanëri engʼana.
6 Ko bhoora kera ono Omonene Waryobha ahanshirë,
nkumuhiinya arë.
Nkushibhya arë kera ono akwikërrya igha,
Waryobha n-Suwaabho.”a
7 Möghömërringa hano mwahiinywa na Waryobha.
Nkobhakorra arë igho,
ko bhoora m-baana abhaaye mörë.
Taaho omoona ono atakuhiinywa na suwaabho hë.
8 Waryobha nkuhiinya arë abhaana abhaaye bhonswe igho.
Mbe,
hano Waryobha araange okobhahiinya,
momanye igha,
bhëënyu te-bhaana abhaaye mörë hë.
9 Ghwiki ni-igha,
bhëëtö bhonswe igho,
ntwaarë na bhaataata abha kinyamöbhërë,
bhayö mbaatuhiinyanga,
na bhëëtö ntwaabhaighweranga.
Mbe,
bhoono ti-bhuuya bhököngʼu ukwitoora mo-mabhoko agha Taata uwa senkoro isyëtö,
okore tobhe abhahöru?
10 Bhaataata abha kinyamöbhërë,
mbaatuhiinyanga ku-ribhagha ike igho,
kya bhono abheene bhaamaahanga igha m-buuya.
Kasi Waryobha umwene,
nkutuhiinya arë ko okoghera iya ehoorohooro iyëëtö,
okore tosange nawe öbhöhörëëru ubhwaye.
11 Hano ömöntö yahiinywa,
takushomerwa hë,
nkobhaabhayera arë.
Kasi abhantö bhano bhaahiinywa,
bhëëghibhwa.
Bhayö,
nkobha bharë na öbhömënyi ubhwa heene na ubhwa omorembe.
12 Mbe,
bhoono ni-igha mwëngëri singuru mo-mabhoko aghëënyu ghano ghöröhirë,
na amaru aghëënyu ghano ghanyööhërëëyë.b
13 Moghendenga ko-senshera sëndöngë,
c okore ëkëntö eketengʼo,
ketakaanyahaareka,
kasi kihwënibhwinga.
Amakaanio ko abhakumya
14 Mbe,
bhoono ni-igha mokore omotono ughwa okobha na omorembe ko-bhantö bhonswe igho,
na öbhöhörëëru bhwonswe,
ko bhoora taaho ömöntö ono aremaahana na Omonene,
ataana öbhöhörëëru bhuyö.
15 Mwiyangarre bhököngʼu,
ömöntö wowonswe oora atakaabhorwa örööbhö urwa Waryobha.
Atakeebhoka-ho ömöntö mö-bhëënyu,
ono anga kya umuri ömörörö.
d Ömöntö kya uyö,
naraabhanyanki na ukunyankuhya senkoro isya abhantö abhaaru.
16 Mwiyangarre mö-bhëënyu,
atakaabha-mo omosooraare,
handë ömöntö ono atakosaasaama Waryobha kya bhono Esaau atasaasaamanga Waryobha.
Esaau uyö,
yaaghörri obhoheene ubhwa obhotangi ubhwaye,
ko okoghera iya okorya ökömwë igho.e
17 Mmomanyirë bhuuya igha,
hano Esaau yaatunirë okorya umwandö ughwa obhongʼoore,
umweya ghuyö,
teghwatöökirë hë.
Ko bhoora tiyaanyöörrë umweya ughwa okohongora ëbhëbhë ibhyaye,
nokaanyoora igha yaatunirë umweya ghuyö rwa amaisöri.f
18 Bhëënyu temwahika ku-nguku eno yookanga omorro,
eno ömöntö akotora ukukunia,
kya eera iya Sinai.
Kora temwahika ku-risaarö rimwamu,
ikisuntë na omosoke.
19 Kora temwahika ahasë aha ukwighwa orotera roraghamba bhököngʼu,
handë engamba iya amangʼana agha ukwöbhöhya ghano Abhaisiraëri bhaaighuurë Waryobha araghamba,
bhakasaasaama igha,
bhatakaatëëbhibhwa ghwiki engʼana iyëndë.g
20 Mbaaghambirë igho,
ko bhoora tebhaatörrë ököghömërrya umughiro ghono bharaghërribhwi igha,
“Kora itugho handë ityënyi eno eraahike ku-nguku iyö,
ni-igha etemwe na amaghena.”h
21 Amangʼana ghayö bhaarööshë,
n-ga kyöbhöhërryö ghaarë,
kora ghakaghera Mosa akaghamba igha,
“Mbaayë na entarëki,
kora ndighitirë.”i
22 Kasi bhëënyu,
muhikirë ku-nguku iya Sayuuni,
mu-mughi ughwa Waryobha ömöhöru,
Yërusarëëmu iya mu-ryobha,
ahasë hano abhamaraika ëbhëkwë na ëbhëkwë bhaikomaini.
23 Muhikirë ko-sango iya abhatangi abha Waryobha,
bhano bhandëkirwë mu-ryobha iyö.
Mwishirë ku-Waryobha,
ono akobhotorra ibhiina abhantö bhonswe igho.
Mwishirë ahasë hano senkoro isya abhantö abha heene,
bhano bhahekeranibhwa sërëngë.
24 Muhikirë ku-Yëësu,
umwighwerrania uwa Imuuma Eehya,
ko-maanyinga aghaaye ghano gheeteka.
Amaanyinga ghayö,
teghanga kya amaanyinga agha Abhëëri ghano ghaatunanga okohaka ikisiiyomba,
kasi gho na-maabhë ghakushumaashera.j
25 Mwangarre motakaanga omoghambi.
Abhaisiraëri tebhaaibhashirë ubhushibhu hano bhaangirë ono yaabhakaanianga ko-kebhara kono.
Bhoono bhëëtö bho,
ntohona hano toraange ukwighwera uyö akotokaania ukurwa mu-ryobha iyö?
26 Enkaagha eno Waryobha yaaghambirë ukurwera mu-nguku iya Sinai,
ikirighiti nkyaabhaayë ko-kebhara kono.
Kasi bhoono araghaini igha,
“N-kamwë igho ghwiki ndaasingisi,
te-kebhara ikyene igho hë,
kasi na mu-ryobha honswe.”k
27 Mbe,
engʼana eno igha,
“N-kamwë igho ghwiki,”
nkwörökya ërë ukuruusibhwa-ho ukwa ëbhëntö bheno bhikusingisa,
ëbhëntö bheno bhyaabhombwa,
okore bhetame ëbhëntö bheno bhetakusingisa.
28 Ku bhuyö tukuminga Waryobha,
ko bhoora atwikërëëyi tobhe mo-Bhokama ubhwaye bhono bhotakusingisa.
Tosaasaamenga Waryobha,
ko nshera eno ikumushomera iya ubhwihöötu na okomosooka.
29 Ko bhoora Waryobha uwëëtö,
no-morro ghono ghukusikya.l