Bhono Waryobha akötëghëribhwa
13
Möghëndërri okohanshana kya bhono ikutunwa ko abhakumya.
2 Motakeebha ökösërëënia abhaghëni,
ko bhoora ökösërëënia kuyö,
nkwo kwaaghërrë abhandë bhakasërëënia abhamaraika bhatamanyirë igha m-bamaraika bhakösërëënia.
3 Muhiitenga bhayö bhabhöhirwë mo-kebhohe,
mobhe kya bhano mmöbhöhirwë hamwë nabho,
muhiitenga na bhano bhakunyankibhwa,
mobhe kya bhano mukunyankibhwa hamwë nabho.
4 Öbhötëti ne-ngʼana iya okosookwa na abhantö bhonswe igho.
Obhosooraare,
bhwibhashwe,
ko bhoora Waryobha narebhotorra ikiina abhasooraare na abha sintwara.
5 Motakaabha na eteemo iya okohansha seehera,
mwiswe na bheno moonabhyo,
ko bhoora Waryobha umwene yaaghamba igha,
“Tinkutighe hë,
tinkusuuhe kora hake hë.”a
6 Kiyö nkyo kekoghera torabha na obhokarë ubhwa okoghamba igha,
“Omonene Waryobha we aköntöörrya,
tenoobhohe ëkëntö hë.
Kanaa,
ömöntö n-kë araankore?”b
7 Muhiite bhano bhaabhatangatanga,
bhano bhaabharaghërrëëyi engʼana iya Waryobha.
Mwangarre eteemo iyaabho bhono ëtëëmirë mö-bhömënyi ubhwabho,
mweghe umukumo ughwabho.
8 Yëësu Kiristo no-oora oora,
isho,
reero,
na amakora ghonswe igho.
9 Motakaarutwa na amëëghyö aghandëghandë igho amaghëni,
ko bhoora m-buuya enkoro ëtërëmibhwi kö örööbhö urwa Waryobha,
kasi te-ko okoghera iya seteemo isya amaraghërryö agha ibhyakorya.
Abhantö bhano bhaaghoota amangʼana ghayö,
tebhanyoora ehoorohooro yoyonswe eera hë.
10 Bhëëtö ntoona riighyö reno abhasëngëri bhano bhakutighinkanera Waryobha mu-righutu,
tebhakwikërërribhwa okorya ëbhëntö ibhya-ko.
11 Omonene uwa abhasëngëri nkoghegha arë amaanyinga agha situgho,
aghasöhya Ahasë Ahahörëëru aha Ahahörëëru,
ghabha ikimwenso ko okoghera iya ëbhëbhë.
Kasi sinyama isya situgho siyö,
nkosamberwa sërë kebhara iya umughi,
sisikibhwa.
12 Mbe,
ko okoghera iya ghayö,
Yëësu Kiristo wonswe,
yaatësëëywë kebhara iya ikihiita ikya umughi,
okore asaabhuure abhantö okohetera ko amaanyinga aghaaye umwene.
13 Bhoono ni-igha tughi ku-Yëësu Kiristo kebhara iya umughi,
na eno twitëëkirë okoserwa ukwaye.
14 Ngambirë igho,
ko bhoora tetoona umughi ghono ghoraaghëndërri okobha-ho igho kuya iyö,
kasi nu-mughi ghono ghukuusha ngo tukwitengʼera.
15 Mbe,
töghëndërri ukukumya Waryobha okohetera ku-Yëësu Kiristo.
Ko bhoora amangʼana aghëëtö agha ukukumya iriina iryaye,
nkobha gharë kya ikimwenso keno tukumumwensera.
16 Motakeebha okokora amangʼana amaiya na okoghootana tobhe këntö këmwë,
ko bhoora ikimwenso kya kiyö,
nkyo këkötëghërya Waryobha.
17 Mwighwere abhatangati abhëënyu,
kora mobhasooke.
Bhayö n-senkoro isyënyu bhakunyankera,
ko bhoora mbo bhareghamba amangʼana aghëënyu mbere iya Waryobha.
Mobhaighwere,
okore bhakorenga emeremo ighyabho bhashömëëywë.
Bhatakaabhaabhayeranga,
ko bhoora hano bharaabhaabhayere,
timunyoore ehoorohooro yoyonswe igho hë.
18 Motosabherenga,
ko bhoora nkukumya törë igha,
ntoona amaitegherro amaiya,
kora nkutuna törë tobhe abhantö abha heene ku kyokyonswe keera toraakore.
19 Ndabhasaasaama bhököngʼu igha,
monsabhere ku-Waryobha,
okore nangohe ukukyora kö-bhëënyu hayö.
Amangʼana agha okomarërrya
20 Mbe,
Waryobha ono akohaana abhantö omorembe,
yaaryökëri Omonene uwëëtö Yëësu Kiristo.
Uyö we Omokaraabhërri uwa amangʼöndi Omonene,
okohetera ko-nshera iya ukwëtëkya amaanyinga aghaaye agha imuuma iya amakora ghonswe igho.
21 Waryobha abhakore mohekerane ko amangʼana amaiya ghonswe igho,
okore mokorenga bhono akutuna.
Hayö ho araakore mö-bhëëtö keno kikumushomera ko okohetera ku-Yëësu Kiristo,
aghëndërri okobha na ubhuhika ubhwa amakora ghonswe igho.
Amina.
22 Ndabhasaasaama bhëënyu abhakumya bharikyane,
moghoote amangʼana ghayö mbaaraghërrëëyi,
ko bhoora ritashandighi reno,
nku-bhwëngʼë igho mbandëkëëyë.
23 Nkutuna ndë momanye igha,
Timoteo umukumya murikyëtö,
yaahaaterwa ukurwa mo-kebhohe.
Hano araangohe ukuusha hano,
nendaashe nawe kö-bhëënyu iyö.