Obhotoro ubhwa umukumo ughwa abhantö abha kare
11
Mbe,
umukumo,
no-kobha na obhoheene ubhwa amangʼana ghano ukwitengʼera,
na no-komanya amangʼana ghano ghatakomaahwa ko bhoono igho.
2 Umukumo,
ghwaaghërrë abhakörö abhëëtö bhakatëghërya Waryobha.
3 Umukumo ngo ghokoghera toramanya igha,
Waryobha yaabhömbirë ekebhara keno okohetera ko engʼana iyaaye.
Ëbhëntö bheno bhekomaahwa,
mbyaabhömbirwë ukurwa mö-bhëntö bheno bhetakomaahwa.
4 Umukumo,
ghwaaghërrë Abhëëri akamwensera Waryobha ikimwenso ikiiya okokera keno Kaini yaamwënsirë.
Ku bhuyö Abhëëri akatëghërya Waryobha,
kora akabharwa igha n-wa heene.
Waryobha yaaikërëëyi ikimwenso ikya Abhëëri,
ku bhuyö nokaanyoora igha yaakwa,
kasi umukumo ughwaye nköghëndërrya ghökërë okobha ëkërëngyö ikiiya na wanyareero.
5 Umukumo,
ghwaaghërrë Henooko akangʼaanyibhwa ukurwa ko-kebhara kono igho atakuurë.
Tiyaarööshwë na ömöntö ghwiki hë,
ko bhoora Waryobha yaamöghëghirë ukughya mu-ryobha.
Kora Amaandeko Amahörëëru nkumwimererra gharë igha,
enkaagha eno waanyöörrë ataraagheghwa,
yaatëghëryanga Waryobha.a
6 Ömöntö taatore ökötëghërya Waryobha hano ataana umukumo.
Ko bhoora ni-igha,
ömöntö ono akosengerra Waryobha,
ni-igha akumi igha,
Waryobha ho arë,
na ghwiki igha,
we akohaana abhantö ituho,
bhano bhaana omotono ughwa okomomanya.
7 Umukumo,
ghwaaghërrë Nuhu akaighwera Waryobha,
hano yaamoraghërrëëyi ko amangʼana ghano ghakaaishirë,
ghano ghataarenga gharaamaahekana enkaagha iyö.
Ku bhuyö akakora esafina,
okore ahöni abhantö abhaaye.
Ko okoghera iya engʼana iyö,
akabhotorra abhantö ikiina,
akabha ömöntö uwa heene ku-Waryobha ko koghera iya umukumo ughwaye.
8 Umukumo,
ghwaaghërrë Ibhurahimu akaighwera Waryobha,
enkaagha eno yaamöbhërëkëëyë,
akamötëëbhya igha,
aghende ahasë hano araahaanwe habhe umwandö ughwaye.
Akeemoka,
akatanora ukughya ahasë hano atamanyirë.b
9 Umukumo,
ghwaaghërrë Ibhurahimu akamenya kya ömöghëni mu-kyaro ikya riraghano.
Yaamënyirë mwi-ghutu hamwë na Isaaka na Yaakobho,
abhari abha umwandö ghooraghoora ughwa riraghano hamwë nawe.
10 Ibhurahimu yaakörrë igho,
ko bhoora yaitengʼeranga umughi ughwa imisingi emehangarru,
umughi ghono ghwaasëëmibhwa na okohaghaashwa na Waryobha umwene.
11 Umukumo,
ghwaaghërrë Saara akanyoora obhotoro ubhwa ukwimokya enda,
nokaanyoora yaarenga aghötirë.
Iyö,
m-boora yaamanyirë igha,
Waryobha ono yaamoraghaini,
n-wa heene.c
12 Mbe ku bhuyö,
ukurwa kö-möntö ömwë Ibhurahimu,
uyö yaarenga aghötirë bhököngʼu,
bhakeebhorwa-ko abhantö abhaaru kya sinyota isya ighörö iyö,
kora ghwiki bhakabha kya omosense ughwa ku-nyansha ghono ömöntö ataatore okobhara.
13 Abhantö bhayö bhonswe igho,
mbaakuurë bharëngë ku-mukumo ughwabho.
Tebhaanyöörrë amangʼana agha riraghano reera hë,
kasi mbaagharööshë kwa hare,
bhakashenga.
Abhantö bhayö mbaaikërëëyi igha,
m-baghëni bhahëti bhaarë,
tebhaarë abhamënyi abha ko-kebhara kono hë.
14 Abhantö bhayö bhakoghamba amangʼana kya ghayö,
nkwörökya bharë igha,
ni ikyaro ikyabho bhakutuna.
15 Singa mbaatemeranga omotwe ikyaro keera bhaaruurë-mo,
umweya ughwa ukukyora-mo ngokaatöökirë.
16 Kasi bhoono abhantö bhayö,
ni-kyaro ikiiya bhököngʼu,
nkyo bhaaighombanga igha bhanyoore.
Ikyaro kiyö,
mmu-ryobha.
Ku bhuyö,
Waryobha takosooka okobherekerwa igha,
we Waryobha uwaabho,
ko bhoora we yaabhasëëmërya iyö umughi.
17 Umukumo,
ghwaaghërrë Ibhurahimu hano yaashaashirwë na Waryobha,
akaruusya Isaaka abhe ikimwenso.
Ibhurahimu,
we Waryobha yaahaayë riraghano,
kasi yaaikërëëyi akaruusya omoona uwaaye umumwëmwë,
abhe ikimwenso ku-Waryobha.d
18 Ni-igho yaakörrë,
nokaanyoora Waryobha yaarenga amötëëbhëri igha,
“Urwebhoro urwaho,
nku-Isaaka roresemoka ukurwa.”e
19 Ibhurahimu yaakumiri igha,
Waryobha aratora kora ukuryökya Isaaka ukurwa mo-bhaku,
mbe,
akakyörribhwa Isaaka,
akabha kya ömöntö ono aryökiibhwi.
20 Umukumo,
ghwaaghërrë Isaaka akangʼoora Yaakobho bhaana Esaau,
ko okoghera iya amangʼana ghano ghariisha mbere iyö.
21 Umukumo,
ghwaaghërrë Yaakobho hano yaahikirë-ho ukukwa,
akangʼoora abhaana abha Yusufu bhonswe igho,
akasaasaama Waryobha na eno ahighimarrëëyë inyimbo iyaaye iya ukwitimbaghërya.
22 Umukumo,
ghwaaghërrë Yusufu hano yaahikirë-ho ukukwa,
akaghamba igha,
Abhaisiraëri mbareheemora ukurwa Miisiri.
Ghwiki akaraghërrya igha,
bhatakaasha kutigha-yo amaghuha aghaaye,
bhaashe kwemoka nagho,
bhaghende koghabheeka Kaanaani.f
23 Umukumo,
ghwaaghërrë abhaibhöri abha Mosa bhakamobheserra imyëri etatö,
hano yaaibhööywë.
Mbaakörrë igho,
ko bhoora bhaarööshë igha m-muuya,
kora tëbhööbhöhirë amangʼana ghano waanyöörrë omokama aghambirë.
24 Umukumo,
ghwaaghërrë Mosa uyö hano yaahërrë,
akaanga igha,
tarëngë mumura uwa mwisëkë uwa Farao hë.
25 Mosa yaarööshë igha,
nyakara anyoore inyanko hamwë na abhantö abha Waryobha,
okokera ukushomerwa mo-mangʼana agha ëbhëbhë ku-ribhagha ike igho.
26 Yaarööshë igha,
m-buuya ukunyoora inyanko ko okoghera iya Kiristo,
g bhuyö nu-bhwamë bhono bhokokera ëbhëntö ibhya Miisiri.
Mosa uyö,
yaaitengʼeranga ukunyoora ituho ukurwa ku-Waryobha sinsikö isya mbere iyö.
27 Umukumo,
ghwaaghërrë Mosa akarwa Miisiri,
tiyööbhöhirë okorerra ukwa omokama.
Yaaghömërrëëyi,
ko bhoora yaabhaayë kya ono akomaaha ono atakomaahwa na amaiso agha kinyamöbhërë.
28 Umukumo,
ghwaaghërrë Mosa akakora inyangi iya Epasaka,
akatëëbhya Abhaisiraëri igha bhahake amaanyinga ko-mekango ighya ebhesaku,
okore hano maraika umusikya araashe,
atakaakunia abhaana abhatangi abha Abhaisiraëri.h
29 Umukumo,
ghwaaghërrë Abhaisiraëri bhakaheta ghatëghatë iya inyansha iya Shaamu,
kya bhano bhakoghenda ahasë ahöömö hano hataana amanshë.
Kasi Abhamiisiri hano bhaashaashirë okoheta-mo,
inyansha ekamëërya,
bhakakwera mo-manshë muyö.i
30 Umukumo,
ghwaaghërrë Abhaisiraëri bhakainaaranaara obhogho obhoghare ubhwa umughi ughwa Yërikö,
ku-sinsikö muhungatë,
bhokaihöngörrya hansë.j
31 Umukumo,
ghwaaghërrë Rahaabhu,
omokari omosooraare oora,
akahona,
tiyasikiibhwi hamwë na abhatëëyu bhaara hë,
ko bhoora yaasërëënëri abhashamishi abha Abhaisiraëri ko omorembe.k
32 Bhoono nkë ghwiki ndaaghambe okokera ghayö?
Teneena umweya ughwa ukushumaashera amangʼana agha Ghidiöni,
agha Bharaaki,
agha Samusööni na agha Yefuta,
agha Daudi,
agha Samwëri bheena agha abharööti.
33 Ko okoghera iya umukumo ughwabho,
mbaaitaini riihë bhakabhaaha abhakama abha ibhyaro ibhyëndë.
Mbaakörrë amangʼana agha heene,
bhakahaanwa ghano Waryobha yaabharaghaini.
Mbaaghubhirë iminywa ighya sëndwë.
34 Bhaarimiri omorro ömörörö kai,
bhaatööriibhwi bhatakaitwa rwa imishonge.
Hano bhaahwerwanga singuru,
Waryobha yaabhakoranga bhakongʼa ku-riihë,
kora bharughya abhasirikare bhano bhaaruurë mu-bhyaro ibhyëndë.
35 Umukumo,
ghwaaghërrë abhakari nyabhorebhe,
bhakanyoora ghwiki abhantö abhaabho bhano waanyöörrë bhaakwa kasi bhakaryoka.
Abhandë mbaanyahaarrwë bhököngʼu,
kora bhakaitwa,
kasi tebhaikërëëyi okotashorwa,
ko bhoora bhaaitengʼeranga igha,
Waryobha nakaabharyökëri,
okore bhanyoore öbhöhöru ubhwa ubhwera.
36 Abhandë mbaasheerwanga na okotemwa na imishariti.
Abhandë mbaabhöhirwë ebheraangʼani bhakatoorwa mo-kebhohe.
37 Abhandë mbaatëmirwë na amaghena.
Abhandë mbaakëngirwë na imisumeeno.
Abhandë mbaashaashirwë,
l abhandë mbaaitirwë na imishonge.
Abhandë mbaainaaranaaranga bhaibhöhirë amaseero agha amangʼöndi na agha sëmböri.
Mbaarë na obhohabhë,
mbaatëësirwë,
mbaakörëëywë amangʼana amaghogho.
38 Abhantö bhayö,
mbaainaaranaaranga ku-riköngö,
mu-singuku,
kora mbaangʼoseranga mo-masana na mo-maina.
Ekebhara tikyaingʼarëëyi okobha na abhantö bhayö hë.