10
Mbe,
amaraghërryö agha Mosa ghayö ni-tuubho iya amangʼana amaiya ghano ghariisha.
Amaraghërryö tegharëngë igha ngo obhoheene hë.
Ku bhuyö ibhimwenso bheno bhikuruusibhwa kera omooka,
tebheetore kora hake hë okosaabhuura abhasaasaami.
2 Singa ibhimwenso bhiyö bhekaabhaayë na obhotoro ubhwa okosaabhuura abhasaasaami,
ukumwensa tekokaaghëndërrëëyi okobha-ho hë.
Ko bhoora abhantö bhayö singa bhaamara kosaabhuurwa,
kora tebhakaaiyighuurë ghwiki igha,
bhaana ëbhëbhë.
3 Kasi ibhimwenso ibhya kera omooka bhiyö,
mbyaahëëtökyanga abhantö ëbhëbhë ibhyabho.
4 Ko bhoora amaanyinga agha seghaini na sëmböri,
teghakotora ukuruusya-ho ëbhëbhë hë.
5 Ku bhuyö ekaghera hano Yëësu Kiristo yaaishirë ko-kebhara kono,
yaatëëbhëri Waryobha igha,
“Tuwatunirë ibhimwenso ibhya situgho hë,
handë esadaaka,
kasi nö-möbhërë ughwane waasëëmëri.
6 Tuwashömëëywë na ibhimwenso ibhya ukusikibhwaa hë,
kora na ibhimwenso ko okoghera iya ëbhëbhë.
7 Hayö bhoono ho naaghambirë igha,
‘Tamaaha nishirë Waryobha,
okore nkore bhono ukutuna,
kya bhono Amaandeko Amahörëëru ghakoghamba.’ ”b
8 Ekembere yaaghambirë igha,
“Ibhimwenso ibhya situgho,
hamwë na ibhimwenso ibhya ukusikibhwa kora na ibhimwenso ko okoghera iya ëbhëbhë,
tibhyakushömëëyë hë,”
nokaanyoora amaraghërryö ghaaraghërrëëyi igha bhekorwe.
9 Mbe,
ghwiki akaghamba igha,
“Tamaaha nishirë Waryobha,
okore nkore bhono ukutuna.”
Yaaruusiri-ho Imuuma iya mbere eera,
okore atoore-ho iya kabhërë.
10 Ko bhoora Yëësu Kiristo yaakoranga bhono Waryobha yaatunanga,
ku bhuyö Waryobha nkotosaabhuura arë ëbhëbhë ibhyëtö okohetera ku kimwenso ikya ömöbhërë ughwa Yëësu Kiristo ghono yaairuusiri kamwë igho.
11 Kera urusikö ömösëngëri uwa Imuuma iya Kare,
yaamwensanga ibhimwenso bheerabheera hare kaaru,
bheno bhetakotora ukuruusya-ho ëbhëbhë kora hake hë.
12 Kasi Yëësu Kiristo umwene yaaimwënsirë kamwë igho ko okoghera iya ëbhëbhë.
Uyö we ikimwenso ikya amakora ghonswe igho.
Akaikara bhoryo ubhwa Waryobha.
13 Bhoono nkoghanya arë okohekera hano Waryobha arekora atashere hansë abhabhisa abhaaye.
14 Ko bhoora ku ikimwenso ëkëmwë ikyene kiyö,
ahekeraini amakora ghonswe igho bhano bhakosaabhuurwa.
15 Umwika Ömöhörëëru wonswe nkwimererra arë amangʼana ghayö ko okoghamba igha,
16 “Omonene Waryobha yaaghambirë igha,
‘Eno yo imuuma iyaane,
eno ndiikererrania na abhantö abhaane enkaagha iyö ikuusha.
Nendetoora amaraghërryö aghaane mo-senkoro isyabho,
kora ngandeke mo-maitegherro aghaabho.’”c
17 Akëngërërrya okoghamba igha,
“Ëbhëbhë ibhyabho na öbhötëëyu ubhwabho,
tindibhihiita ghwiki hë.”d
18 Mbe,
hano okomaaha igha Waryobha yaaruusya-ho ëbhëbhë ibhya abhantö,
ghwiki ikimwenso ikyëndë tekeeho hë.
Ntoona öbhötöönööni ubhwa ukughya ku-Waryobha
19 Abhakumya bharikyane,
momanye igha,
toona obhokarë ubhwa okosoha Ahasë Ahahörëëru aha Ahahörëëru,
ko okohetera amaanyinga agha Yëësu Kiristo.
20 Yëësu yaatweghorra enshera eehya iya öbhöhöru iya okohetera kwi-pazia,
ripazia riyö,
nö-möbhërë ughwaye umwene.
21 Mbe,
ku bhuyö tomanye igha,
ntoona Omonene uwa abhasëngëri uwa inyumba iya Waryobha.e
22 Ku bhuyö ni-igha tusuntare ku-Waryobha kwa nkoro nyihöötu na umukumo omohekeranu,
ko bhoora Waryobha asaabhuurrë senkoro isyëtö ko amaanyinga agha Yëësu Kiristo,
okore totakaabha na amaitegherro amaghogho.
Kora atwisaabhëri ëmëbhërë ighyëtö mo-manshë ghano ghatabhöröngökirë.
23 Tonaghi ubhweseghe ubhwëtö bhono twaaikërëëyi,
ko bhoora Waryobha ono yaaraghania,
n-wa heene.
24 Twangarrane na okokangʼasërrania ku righonshe na ko amangʼana amaiya.
25 Totakatigha ukwikomania hamwë,
kya igho abhandë bhatigha ukwikomania.
Tokaananinga,
na töghëndërringa okokora igho,
ko bhoora mokomaaha igha urusikö urwa ukukyora ukwa Omonene uwëëtö Yëësu Kiristo haangʼë rörë.
26 Hano toraaghëndërri okokora ëbhëbhë kwa okohansha,
na ambe tomarrë okomanya obhoheene,
tekeeho ghwiki ikimwenso ikya ëbhëbhë hë.
27 Kasi keno ukunyoora kitighaayë,
no-kobha na entarëki iya okobhotorrwa ikiina na omorro ghono ghurisikya abhabhisa abha Waryobha.
28 Ömöntö ono yaaseranga amaraghërryö agha Mosa,
yaakwanga igho ikyabhera ketaaho,
hano abhaimërërri abhabhërë handë abhatatö bharaaghambe igha m-maheene ghayö ghakoghambwa kö-möntö uyö.
29 Mbe,
bhoono morakanya igha m-bushibhu ubhwa iyakë bhono araanyoore ömöntö ono akotashera hansë Omoona uwa Waryobha,
na okomaaha igha amaanyinga agha Imuuma ghano ghaamosaabhuura te-ngʼana hë,
na okokorra ikisiraani Umwika Ömöhörëëru?
30 Ko bhoora ntomanyirë igha,
Waryobha we yaaghambirë igha,
“Okohaka ikisiiyomba,
ghuyö m-moremo ughwane,
nendaahake.”
Na ghwiki igha,
“Omonene narebhotorra ikiina abhantö abhaaye.”f
31 Engʼana iya okoobhoha,
nö-möntö okoghwa mo-mabhoko agha Waryobha ömöhöru.
32 Kasi muhiite sinsikö isya mbere seera,
hano mwaasimiri ukukumya Yëësu Kiristo.
Nokaanyoora mwaanyöörrë inyaanyi indito,
kasi mwaaghëghömërryanga.
33 Senkaagha isyëndë mwaatökirwë,
na mokateeswa harabhu igho.
Senkaagha isyëndë mwaatöörryanga bhano bhaateeswanga kya bhëënyu.
34 Mwaarenga na ikyabhera ko bhano bhaarenga bhabhöhirwë.
Mwaaikërëëyi kora hano mwaaruusibhwanga ëbhëntö ibhyënyu,
mwaashomerwanga.
Mwaakörrë igho momanyirë igha,
mo-senkoro isyënyu,
mmoona ëbhëntö ibhya ubhwera obhonene bhököngʼu,
bheno bhetakusika röndë.
35 Mbe,
motakaasha ukutigha obhokarë ubhwënyu bhuyö,
ko bhoora mboreghera mutuhwe bhököngʼu.
36 Keno kikutunwa kö-bhëënyu,
nö-bhöghömërrya,
okore hano moremara okokora bhono Waryobha akutuna,
munyoore keera yaabharaghaini.
37 Amaandeko Amahörëëru gharaghamba igha,
“Enkaagha ne-nke igho eno itighaayë,
iya uyö akuusha aashe,
kora taateghete hë.g
38 Kasi ömöntö uwaane uwa heene,
naraamenye mu-mukumo ughwaye ghono aanagho.
Kasi hano araantighe,
tantëghëri hë.”h
39 Bhëëtö tëtörëngë mo-bhano bhakutigha Waryobha,
bhasira,
kasi ntörëngë mo-bhano bhaana umukumo ghono ghökötötöörya.