Amangʼana agha Imuuma iya Kare
9
Imuuma iya mbere eera,
yaarenga na amaraghërryö ghano ghaaghootwanga na abhasëngëri enkaagha eno bhaasengerranga Waryobha.
Kora ghwiki imuuma iyö,
yaarë na Ahasë Ahahörëëru aha okosengerra-ho Waryobha ko-kebhara kono.
2 Righutu irya okosengerra-mo Waryobha,
ryaakörrwë rekabha na ibhinyumba bhibhërë.
Ikinyumba ikya mbere,
kyaarë na ebhetangora ibhya okotoora-ko setara,
na emeeza iya okotoora-ko emekaate ëmëhörëëru.
Ikinyumba kiyö,
nkyo kyaabherekerwanga Ahasë Ahahörëëru.
3 Ripazia irya mu-righutu muyö,
ryaahokanianga Ahasë Ahahörëëru hayö na ikinyumba ikya kabhërë,
keno kekobherekerwa igha,
Ahasë Ahahörëëru aha Ahahörëëru.
4 Mu-kinyumba kiyö,
ryaare-mo riighyö irya okosambera-ko ëkörösö,
reno ryaahakirwë-ko esahaabhu.
Ghwiki ryaare-mo Risandeko irya Imuuma,
a reno ryaarenga rehakirwë esahaabhu sembareka syonswe igho.
Mwi-sandeko muyö,
kaarenga-mo akanyöngö aka ekeghera ikya esahaabhu,
kano kaarë na ibhyakorya bheno bhyaabherekerwanga igha,
emana.
Ghwiki yaare-mo inyimbo iya Haruuni eno yaasëbhökirë,
na sembaau ibhërë isya amaghena seno syaarenga syandëkirwë-ko imighiro ighya Waryobha.b
5 Kwi-sandeko kuyö,
bhyaare-ko ebhesosa ibhya amakërubhi abhërë agha ukwörökya okobha-ho ukwa Waryobha,
bhano amabhabha aghaabho ghaakundikiiyi kwi-sandeko kuyö ahasë hano hakobherekerwa igha,
ikitumbë ikya ikyabhera.
Kasi bhoono tetoona umweya ughwa ukushumaashera ensonga iya amangʼana ghayö ghonswe igho.c
6 Mbe,
ni-igho amangʼana ghaasëëmibhwanga.
Hano ësëëmyö yaahwanga,
ho bhoono abhasëngëri bhaasohanga kera urusikö mu-kinyumba ikya mbere keera ikya righutu riyö,
ukutighinkana-mo na emeremo ighya öbhösëngëri.
7 Kasi omonene uwa abhasëngëri umwene igho,
we yaasohanga mu-kinyumba keera ikya kabhërë,
kamwë igho ko-mooka.
Yaasohanga-mo aghëghirë amaanyinga agha itugho.
Amaanyinga ghayö,
ngo ghaabhanga ikimwenso ku-Waryobha,
ko okoghera iya ëbhëbhë ibhyaye,
na ibhya abhantö abhandë bhano waanyooranga bhasarri bhatamanyirë.
8 Umwika Ömöhörëëru nkutwörökya arë ko amangʼana ghayö ghonswe igho igha,
umweya ughwa abhantö abhandë okosoha Ahasë Ahahörëëru aha Ahahörëëru,
tuwaanyöörrë ghoraabha-ho hë,
ko bhoora righutu irya mbere waanyöörrë rekeeho.
9 Amangʼana ghayö ghonswe igho ghaakorwanga,
në-kërëngyö ikya amangʼana agha reero eno.
Nkwörökya gharë igha,
ibhimwenso bheno bhyaamwenswanga,
tibhyatoranga ukwöghya amaitegherro agha omosaasaami.
10 Amangʼana ghayö,
na-agha kinyamöbhërë ghaarë,
agha ibhyakorya,
ëbhëntö ibhya ukunywebhwa,
na ukwisaabhuura ëmëbhërë.
Amangʼana ghayö,
ngaatöörrwë-ho okohekera hano amangʼana gharekorwa bhohya.
11 Kasi bhoono Yëësu Kiristo,
yaasha abhe Omonene uwa abhasëngëri uwa amangʼana amaiya ghano ghaasha.
d We akokora emeremo ighya öbhösëngëri mu-righutu iriiya bhököngʼu,
rihekeranu okokera irya mbere reera.
Righutu riyö,
tiryakorwa na abhantö hë,
ensonga yaamo ni-igha,
righutu riyö,
ti-irya ko-kebhara kono hë.
12 Hano Yëësu yaasöhirë Ahasë Ahahörëëru aha Ahahörëëru,
tiyaasöhirë-ho na amaanyinga agha sëmböri handë agha ëbhëkööhë.
Kasi na-maanyinga aghaaye umwene,
ngo yaasöhirë nagho kamwë igho,
Ahasë Ahahörëëru aha Ahahörëëru,
akatutungurya amakora ghonswe igho.
13 Ko okorengʼaana na amaraghërryö agha Mosa,
abhasëngëri mbaaminshanga amaanyinga agha seghaini na agha sëmböri na riibhu irya rikööhë ko-bhantö bhano bhaarë mu-bhumwamu,
okore bhasaabhuurwe.
14 Kasi bhoono amaanyinga agha Yëësu Kiristo,
ngaana ubhwera bhököngʼu,
okokera agha situgho ghayö.
Uyö we yaairuusiri umwene ko obhotoro ubhwa Umwika uwa amakora ghonswe igho,
okore abhe ikimwenso keno ketaana risoro ku-Waryobha.
Ikimwenso ikya amaanyinga aghaaye,
nkyo kikutwöghya amaitegherro aghëëtöe gharwe mo-mangʼana ghano ghakoreeta uruku,
okore tosaasaamenga Waryobha ömöhöru.
15 Ko okoghera iya ghayö,
Yëësu we akwighwerrania abhantö na Waryobha okohetera ku-Muuma Eehya,
okore abhantö bhano Waryobha yaahora,
bhanyoore öbhöhöru ubhwa amakora na amakora,
bhono yaaraghaini okobhahaana.
Ghayö nkotora gharë okobha,
ko bhoora Yëësu yaakuurë,
okore ahaane abhantö öbhötöönööni ubhwa ukurwa mö-bhököri ubhwa ëbhëbhë,
bheno bhyaakorwanga ko-nkaagha iya Imuuma iya Kare.
16 Amangʼana agha ukuruusya umwandö,
ghano ömöntö akoghamba ataraakwa,
nkobha gharë na ubhurito hano waanyoora ömöntö uyö akuurë.
17 Momanye igha riraghaniö irya ömöntö okohaanwa umwandö,
terekobha na obhotoro,
hano waanyoora uyö yaaruusya umwandö ghuyö,
ataraakwa.
Kasi hano akuurë,
nkobha rërë na obhotoro.
18 Kiyö nkyo kyaaghërrë kora Imuuma eera iya mbere,
yaakörrwë ku ukwëtëkya amaanyinga.
19 Hano Mosa yaamarrë okoraarekera abhantö bhonswe igho imighiro ghyonswe igho ighya Waryobha,
yaaghëghirë amaanyinga agha rikööhë na agha eghorohe,
akaishooghania na amanshë.
Akaghoota amaghaasu amakangaaru,
akaghananerra kö-rötë urwa ömötë ghono ghokobherekerwa igha umuhisopo,
akashabhya mu-mwishooghaniö ghuyö,
akaminshirya eketabho na abhantö bhonswe igho.
20 Mosa akatëëbhya abhantö bhayö bhonswe igho igha,
“Ghano na-maanyinga agha imuuma eno mwaaraghërribhwa na Waryobha.”f
21 Amaanyinga ghayö,
Mosa yaaghaminshiiyi kora na ku-righutu reera,
na ëbhëntö ibhya ukumwensera bhyonswe igho.
22 Mo-maraghërryö agha Mosa,
amaanyinga ngo ghaasaabhuuranga ëbhëntö bhyonswe igho.
Hano amaanyinga ghataitëkirë,
ukwabherwa ëbhëbhë tekooho hë.
Ukwiruusya ukwa Yëësu Kiristo
23 Ëbhëntö bhiyö ibhya ko-kebhara kono ni-igho bhyaasaabhuurwanga,
nabhyo ni ituubho iya amangʼana agha mu-ryobha.
Kasi ëbhëntö ibhya mu-ryobha bhiyö,
bheratuna ikimwenso ikiiya okokera amaanyinga agha situgho.
24 Ko bhoora Yëësu Kiristo,
tiyaasöhirë Ahasë Ahahörëëru aha Ahahörëëru,
haara haana ituubho iya aha mu-ryobha,
hano haakorwa na abhantö,
kasi yaasöhirë mu-ryobha aheeneheene,
okore amaahekane ku-Waryobha ko okoghera iya bhëëtö.
25 Omonene uwa abhasëngëri yaasohanga Ahasë Ahahörëëru aha Ahahörëëru,
kamwë igho kera omooka aghëghirë amaanyinga agha situgho.
Kiristo tiyaasöhirë mu-ryobha okore airuusiri hare kaaru,
kasi yaabhaayë ikimwenso ku ukwiruusya kamwë igho.
26 Singa etaabhaayë igho,
Kiristo nakaatëësirwë hare kaaru ukurwa okosemoka ukwa ekebhara keno.
Kasi bhoono yaasha kamwë igho ko-senkaagha isya umuhiko seno,
okore aruusi-ho ëbhëbhë ku ukwiruusya umwene kamwë igho abhe ikimwenso.
27 Mbe,
kya bhoora abhantö bhaatoorerwa-ho ukukwa kamwë igho,
na hano ömöntö amarrë ukukwa,
keno keekoroobhera,
no-kobhotorrwa ikiina.
28 Amangʼana ni-ighoigho gharë igha,
Yëësu Kiristo wonswe,
yaakörrwë ikimwenso kamwë igho,
okore agheghe ëbhëbhë ibhya abhantö abhaaru.
Kasi hano ariisha urwa kabhërë,
të-bhëbhë ariisha komara-ho hë,
kasi nö-bhöhönia arereeta ko bhano bhaana omotono ughwa okomoghanya.