Omonene uwa abhasëngëri uwa Imuuma Eehya
8
Engʼana enene ko-ghonswe igho ghayö,
yo eno igha,
ntoona Omonene uwa abhasëngëri ono arëngë bhoryo ubhwa ikitumbë ikya ekekama ikya Waryobha uwa obhotoro,
mu-ryobha iyö.
2 Mu-ryobha iyö,
Yëësu Kiristo nkokora arë-yo emeremo ighya Omonene uwa abhasëngëri ko-Ahasë Ahahörëëru,
mu-righutu irya nyaheene,
reno retahaghaashwa na ömöntö,
kasi no-Monene umwene we yaarehaghaasha.
3 Kera Omonene uwa abhasëngëri nkotoorwa arë-ho,
okore amwensere Waryobha,
ku bhuyö Omonene uwa abhasëngëri uwëëtö ono,
wonswe ni-igha abhe na ikimwenso ikya ukumwensera Waryobha.
4 Okaanyöörrë igha Yëësu nko-kebhara kono arë,
takaabhaayë Omonene uwa abhasëngëri hë,
ko bhoora hobharë bhano bhakumwensa kya bhono amaraghërryö agha Mosa ghakoraghërrya.
5 Amangʼana ghano abhasëngëri bhakokora,
ni-kiiriiri ikya ghano gharëngë mu-ryobha iyö.
Nkyo kekoghera hano Mosa yaangʼatirë okohaghaasha righutu,
Waryobha akamötëëbhya igha,
“Wangarre,
okore amangʼana ghonswe igho kya bhono wörökiibhwi mu-nguku haara.”a
6 Kasi Waryobha ahaayë Yëësu Kiristo emeremo ighya öbhösëngëri ubhwa ubhwera obhonene,
okokera gheera ighya abhasëngëri bhano bhaatangatirë okobha-ho.
Yëësu we akwighwerrania abhantö na Waryobha,
ko okohetera Imuuma iya ubhwera obhonene okokera iya mbere eera.
Kora Imuuma iyö,
n-kya ëkëntö keno kehaghaashirwë ku-musingi umurito,
kuyö nko okoghamba igha,
n-ko amaraghanio amaiya bhököngʼu okokera agha Imuuma iya Kare eera.
7 Singa Imuuma eera iya mbere ne-hekeranu yaarë,
umweya ughwa Imuuma iya kabhërë,
teghokaatunirwë hë.
8 Kasi hano yatema amasoro abhantö,
nkoghamba arë igha,
“Öni Omonene Waryobha ndaghamba igha,
Momaahe!
Enkaagha eraasha,
eno ndaakore bhohya imuuma na Abhaisiraëri,
hamwë na abhantö abha Yuuda.
9 Imuuma Eehya iyö,
terebha kya eera naakörrë na abhakörö abhaabho,
enkaagha eno naabhaghöötërrëëyë amabhoko nkabharuusya mu-kyaro ikya Miisiri.
Tebhaabhaayë abha heene ko okoghoota Imuuma iyö hë,
öni wonswe nkabhatigha ighoigho.
Ni-igho Omonene Waryobha akoghamba.
10 Imuuma Eehya,
eno ndekora na Abhaisiraëri ko-nkaagha iyö ikuusha,
yo eno,
nendetoora amaraghërryö aghaane mo-maitegherro aghaabho,
nendeghaandeka mo-senkoro isyabho.
Hayö ho ndebha Waryobha uwaabho,
nabho mbarebha abhantö abhaane.
Ni-igho Omonene Waryobha akoghamba.
11 Tarebha-ho ömöntö uwa ukwörökërrya murikyaye hë,
handë ömöntö uwa ukwörökërrya muhiiri uwaaye igha,
‘Omanye Omonene Waryobha,’
ko bhoora bhonswe igho,
ukusimirya omoke okohekera ko-monene uwaabho,
mbaremmanya.
12 Mbaremmanya ko bhoora nendebhaabhera obhosarya ubhwabho bhwonswe igho,
na ëbhëbhë ibhyabho,
tindibhihiita ghwiki hë.”b
13 Ku ukushumaashera Imuuma Eehya iyö,
Waryobha hayö nkwörökya arë igha,
Imuuma iya mbere eera,
yaghötirë.
Mbe,
ëkëntö keno kikusimya okoghota,
n-haangʼë kërë kiruho.