Abhaëbhuraania 4

Ukumuunya ukwa abhantö abha Waryobha

Mbe, ko bhoora rekeeho riraghaniö irya Waryobha, irya okosoha ahasë ahaaye aha ukumuunya, ni-igha twobhohe, okore ömöntö atakaakerwa okosoha-mo. 2 Momanye igha kora bhëëtö bhonswe ntwaraarekerwa amangʼana amaiya kya bhaaghuuka. Kasi amangʼana ghaara bho bhaaraarëkëëywë, teghabhaayë na ubhwera hë, ko bhoora tebhaghakumiri hë. 3 Ko okoghera iya ghayö, Waryobha akaghamba igha,

“Naarërëëyë, nkatyana igha,

‘Tebhaasohe ahasë ahaane aha ukumuunya hë.’”

Kasi bhëëtö bhano tukumukumya, ntoresoha ahasë ahaaye aha ukumuunya. Nokaanyoora Waryobha ni-igho yaaghambirë, kasi yaarenga amarrë emeremo ighyaye ghyonswe igho ukurwa okobhombwa ukwa ekebhara. 4 Ko bhoora yaaghamba ahasë nyabhorebhe, ko mangʼana agha urusikö ruyö urwa muhungatë igha, “Waryobha yaamuunyirë urusikö urwa muhungatë, akatigha emeremo ighyaye ghyonswe igho.” 5 Ghwiki Amaandeko Amahörëëru gharaghamba kighörö hayö igha,

“Tebhaasohe ahasë ahaane aha ukumuunya hë.”

6 Nokaanyoora igha abhakörö abhëëtö bhaaraarëkëëywë amangʼana amaiya kare haara, kasi tebhasöhirë-mo hë, ko okoghera iya öbhötëëyu ubhwabho. Mbe, ko okoghera iya engʼana iyö, ghooho umweya ughwa abhantö abhandë okosoha ahasë aha Obhotooro ubhwa Waryobha. 7 Ku bhuyö Waryobha yaasëëmya urusikö urwöndë rono rokobherekerwa igha “Reero.” Mbe, ghwiki hano ribhagha ritambë ryaahëtirë-ho, yaaghambirë okohetera ko-Daudi igha,

“Hano moraaighwe arabherekera reero,

motakaabha na emetwe ëmëköngʼu.”

8 Ko bhoora singa Yoshua yaabhahaana urusikö urwa ukumuunya, Waryobha takaaghambirë ghwiki amangʼana agha urusikö urwöndë urwa ukumuunya hë. 9 Mbe, ku bhuyö bhoono, rokee-ho urusikö urwa Obhotooro urwa Waryobha ko-bhantö abhaaye. 10 Ko bhoora wowonswe igho ono araasohe ahasë ahaaye aha ukumuunya, naraamuunye okokora emeremo kya bhono Waryobha yaamuunyirë hano yaamarrë emeremo ighya okobhomba. 11 Mbe, tokore omotono ughwa okosoha mo-bhotooro muyö, okore ömöntö wowonswe igho atakaakerwa kya bhono bhaaghuuka abhëëtö bhaakërrwë ukwighwera Waryobha.

12 Momanye igha engʼana iya Waryobha nkoheeshera ërë, kora neena obhotoro okokera umushonge umwöghë nyambagha ibhërë. Engʼana iyö, nkobheta ërë ömöntö igho ihika mo-maghuha, yahokania imyaho na amaghuta ghano ghaamo. Kora nkwangoha ërë okomanya amaitegherro ghano gharëngë mo-nkoro iya ömöntö, na keno akutuna. 13 Tekeeho ëkëntö keno kyaabhombwa keno ketarëngë harabhu igho ku-Waryobha. Ko bhoora ëbhëntö bhyonswe igho n-harabhu igho bhërë ku-Waryobha, uyö we törëtëëbhya amangʼana ghano tokokora.

Yëësu Kiristo we Omonene uwa abhasëngëri

14 Mbe, ko bhoora ntoona Omonene uwa abhasëngëri ono yaasoha mu-ryobha, Yëësu Kiristo Omoona uwa Waryobha. Ku bhuyö ni-igha tonaghi umukumo ughwëtö. 15 Momanye igha, uyö we Omonene uwa abhasëngëri, ono akotora ököghömërrania na bhëëtö kya igho törë, ko bhoora yaashaashwa ko mangʼana ghonswe igho kya bhëëtö, kasi tiyaakörrë ëkëbhë kyokyonswe igho hë. 16 Ku bhuyö ni-igha tokarehe ukusuntarra ikitumbë ikya ekekama ikya Waryobha uwa örööbhö, okore tunyoore ikyabhera ikya Waryobha, tobhe na örööbhö urwa ökötötöörrya enkaagha eno toona obhohabhë.