Yëësu Kiristo m-monene okokera Mosa
3
Mbe,
bhëënyu abhakumya abhahörëëru bharikyane,
bhano Waryobha yaashaaghora igha mobhe abhantö abhaaye,
mwitegherre bhuuya amangʼana agha Omotomwa Yëësu Kiristo,
ono arëngë Omonene uwa abhasëngëri uwa umukumo ghono tukwikërrya.
2 M-möntö uwa heene yaarë ku-Waryobha ono yaamwahora,
n-kya bhono Mosaa wonswe yaarë omotangati uwa heene mu-nyumba iya Waryobha.b
3 Omohaghaashi nkosookwa arë okokera inyumba eno ahaghaashirë,
mbe,
amangʼana ni-igho gharë igha,
Yëësu Kiristo wonswe,
naingʼarëëyë okosookwa bhököngʼu okokera Mosa.
4 Kera inyumba nkohaghaashwa ërë na omohaghaashi nyabhorebhe,
kasi omohaghaashi uwa ëbhëntö bhyonswe igho,
n-Waryobha.
5 Mosa m-mököri uwa emeremo uwa heene yaarë,
ko-bhantö abha mu-nyumba iya Waryobha,
yaaghambirë amangʼana ghano Waryobha akaaghambirë.
6 Kasi Yëësu Kiristo,
we n-kya Omoona uwa heene ono aana ubhwera ko-mangʼana agha inyumba iya Waryobha.
Inyumba iyö,
m-bëëtö,
hano toraaghëndërri okobha abhakarë na okonagha bhuuya ko-keno tukwesegha.
Obhoghogho ubhwa ukwanga ukukumya
7 Mbe,
ku bhuyö ni-igha twitegherre ghano Umwika Ömöhörëëru akoghamba,
araghamba igha,
“Hano moraaighwe arabherekera reero,
8 motakaabha na emetwe ëmëköngʼu,
kya ighya abhakörö bhëënyu abhatëëyu,
ko-nkaagha eno bhaanshaashyanga ku-riköngö.
9 Ku-riköngö iyö,
yo abhakörö abhëënyu bhaanshaashirë-yo,
nokaanyoora naabhakörëëyë amakono amaaru,
ku imyoka merongo ene.
10 Mbe,
kiyö nkyo kyaaghërrë nkarererra rekora riyö,
nkaghamba igha,
abhantö bhano m-batëëyu sinsikö syonswe igho,
tebhakutuna bhakore bhono öni nkutuna hë.
11 Nkarerra,
nkatyana igha,
‘Tebhaasohe ahasë ahaane aha ukumuunya hë.’ ”c
12 Abhakumya bharikyane,
mwiyangarre,
atakaabha-ho ömöntö nyankoro ngogho,
ono atakukumya,
ono akwiyahora ukurwa ku-Waryobha ömöhöru.
13 Kasi ni-igha motoghekanenga kera urusikö rono rokobherekerwa igha reero,
okore atakaabha-ho mö-bhëënyu muyö,
ömöntö nyamotwe mököngʼu,
ko okoghera iya okongʼainwa na ëbhëbhë.
14 Ku bhuyö nkoghootana törë hamwë na Yëësu Kiristo,
hano twesegha Waryobha kya bhono twaamukumiri,
tokamwesegha,
töghëndërri ighoigho na okohekera ku-muhiko.
15 Amaandeko Amahörëëru gharaghamba igha,
“Hano moraaighwe arabherekera reero,
motakaabha na emetwe ëmëköngʼu,
kya ighya abhakörö bhëënyu abhatëëyu.”d
16 Kana,
m-bantö kë bhayö bhaaighuurë engʼana iya Waryobha,
kasi bhakateeya mo-senkoro?
Te-bhaara bhaatangatirwë na Mosa ukurwa Miisiri?
17 M-bantö kë bhano Waryobha yaarëghirë ku imyoka merongo ene?
Te-bhaara bhaamosarëëyi,
bhakakwa na ibhihundughu ibhyabho bhekanyaraghana ku-riköngö?
18 M-bantö kë bhano yaatyanëëyë igha,
tebharesoha ahasë ahaaye aha ukumuunya hë?
Te-bhaara bhaangirë ukumwighwera?
19 Mbe,
ntomanyirë igha,
tebhaasöhirë mo-bhotooro,
ko okoghera iya ukwanga ukukumya Waryobha.