Öbhötöörya obhonene ubhwa Waryobha
2
Mbe,
ku bhuyö ni-igha twiyangarre bhököngʼu,
ko amangʼana ghayö twaighwa,
okore totakaaghatigha.
2 Ko bhoora ntomanyirë igha,
engʼana iya amaraghërryö agha Waryobha eno maraika yaaraarëkëëyë abhakörö abhëëtö,
yaarë na ubhwera.
Ku bhuyö abhantö bhonswe igho bhano bhataaghëghöötirë,
mbaashibhiibhwi ubhwa heene,
ko amangʼana agha öbhötëëyu na obhosarya ubhwabho bhonswe igho.
3 Mbe,
bhëëtö bho hano toraasere öbhötöörya obhonene kya bhono,
iyakë toraakore tohone?
Öbhötöörya bhuyö,
ekembere mbwaaraarëkirwë na Omonene Yëësu,
ghwiki bhokakangʼasërribhwa kö-bhëëtö na bhano bhaamwighuurë.
4 Waryobha wonswe akaimererra amangʼana ghayö ko okokora ebhemanyërryö na amakono amaaru,
kora akahaana abhantö ituho iya Umwika Ömöhörëëru kya bhono umwene yaahanshirë.
Ukwisuuhya ukwa Yëësu Kiristo
5 Ntomanyirë igha,
ekebhara kiyö kiriisha,
keno tukushumaashera amangʼana aghaakyo,
Waryobha tiyaahaana abhamaraika ubhwera ubhwa okoketonga.
Amaandeko Amahörëëru nkoghamba gharë igha,
6 “Kana ömöntö n-kë,
kora Waryobha umwitegherre?
Omoona uwa ömöntö n-këntö kë,
kora ömösërëëni?
7 Wamokora abhe omoke okokera abhamaraika ku-ribhagha ike igho.
Kasi bhoono,
wamotorra ko-motwe ikirighi ikya ubhuhika na okosookwa,
8 wamokora atashere hansë ëbhëntö bhyonswe igho.”
a
Tekeeho ëkëntö keno Waryobha ataatoora mö-bhötöngi ubhwa ömöntö.
Kasi ko bhoono igho, ëbhëntö bhyonswe igho tebheraabha hansë iyaaye hë.
9 Kasi nkomaaha törë Yëësu Kiristo ono ku-ribhagha ike igho,
Waryobha yaamokora abhe omoke okokera abhamaraika.
Uyö we yaatoorrwa ko-motwe ikirighi ikya ubhuhika na okosookwa,
ko okoghera iya ököghömërrya öbhörrö ubhwa uruku.
Waryobha yaakörrë igho,
okore kö örööbhö urwaye,
Yëësu akwe ko okoghera iya ökötöörya abhantö bhonswe igho.
10 Waryobha we yaabhomba ëbhëntö bhyonswe igho,
akabhetoora bhuyö bhërëngë.
Yaatëghëribhwi okoreeta abhantö abhaaru mu-bhuhika ubhwaye,
ku bhuyö yaakörrë Yëësu ahekerane ko okohetera amateeso ghayö yaanyöörrë.
Yëësu uyö,
we esemoko iya öbhöhönia.
11 Yëësu Kiristo ono akosaabhuura abhantö,
na bhano bhakosaabhuurwa,
bhonswe igho suwaabho nö-ömwë.
Nkyo kekoghera Yëësu Kiristo atakosooka okobhabherekera igha m-bahiiri abhaaye.
12 Yëësu Kiristo yaaghambirë igha,
“Nendaaraareke iriina iryaho ko bhahiiri abhaane,
nendaarëëti amarëëtyö agha ökökötöönia mo-sesango isyabho.”b
13 Ghwiki akaghamba igha,
“Nendeseghenga Waryobha.”
c
Ghwiki igha,
“Öni na abhaana bhano Waryobha yaangʼaana, hamwë ndëngë nabho hano.”d
14 Mbe,
ko bhoora ntoona ëmëbhërë na amaanyinga,
Yëësu Kiristo wonswe yaaishirë akabha na ömöbhërë na amaanyinga kya bhëëtö.
Yaakörrë igho,
okore ko okohetera ukukwa ukwaye,
asiki Oghosambwae nyabhwera ubhwa uruku.
15 Yëësu Kiristo yaakuurë,
okore ahaane öbhötöönööni abhantö bhano bhaarë abhaghorwa ko okoghera iya rinyantarëki irya uruku.
16 Mbe,
nkwörökya ërë igha,
Yëësu Kiristo yaaishirë ökötöörrya abhantö abha urwebhoro urwa Ibhurahimu,
f te-bhamaraika yaaishirë ökötöörrya hë.
17 Ku bhuyö kiyö nkyo kyaaghërrë akabha kya abhahiiri abhaaye,
ko amangʼana ghonswe igho,
okore abhe Omonene uwa abhasëngërig uwa ikyabhera ono arëngë uwa heene ko okokora emeremo ighya Waryobha.
Ömösëngëri uyö,
we yaakörrë ikimwenso,
okore abhantö bhaabherwe ëbhëbhë ibhyabho.
18 Ko bhoora igha Yëësu Kiristo yaatëësirwë kora akashaashwa,
ku bhuyö nkotora arë ökötöörrya bhano bhakushaashwa.