Ritashandighi
ko-Bhaëbhuraania
Waryobha nkushumaasha arë na bhëëtö okohetera ko Omoona uwaaye
1
Kare hayö,
Waryobha yaashumaashanga na abhakörö abhëëtö hare kaaru,
okohetera ko-bharööti abhaaye,
ko senshera hagharë hagharë.
2 Kasi bhoono,
ko-senkaagha seno isya umuhiko,
nkushumaasha arë na bhëëtö,
okohetera ko-Moona uwaaye.
a Uyö we Waryobha yaashaaghora,
araaghere umwandö ughwa ëbhëntö bhyonswe igho.
Kora ghwiki Waryobha yaabhömbirë ekebhara okohetera ku-uyö.
3 Uyö we emerengaari ighya ubhuhika ubhwa Waryobha.
Kora we ituubho iya heene iya bhono Waryobha arë.
We akoghera ëbhëntö bhyonswe igho bheraghëndërrya okobha kya igho bhërë,
ko okohetera engʼana iyaaye iya obhotoro.
Yaatosaabhuura ëbhëbhë ibhyëtö,
akaghya mu-ryobha,
akaikara bhoryo ubhwa Waryobha uwa obhotoro,
ahasë hano hasookwa bhököngʼu.
Yëësu Kiristo m-Monene okokera abhamaraika
4 Mbe,
Waryobha yaakora Omoona uwaaye uyö,
abhe Omonene okokera abhamaraika,
ko bhono yaamohaana iriina reno reena ubhwera,
okokera irya abhamaraika.
5 Ko bhoora taaho maraika ono Waryobha yaatëëbhëri amangʼana kya ghano yaatëëbhëri Omoona uwaaye igha,
“Uwe nu-uwe Omoona uwaane,
öni reero mbaayë Suwëënyu.”
b
Ghwiki Waryobha tiyaakatëëbhëri maraika wowonswe oora igha,
“Naraabhe omoona uwaane,
na öni, nendebha suwaabho.”c
6 Hano yaarëëtirë Omoona uwaaye umumwëmwë ko-kebhara kono,
yaaghambirë igha,
“Abhamaraika abhaane bhonswe igho,
bhamosengerrenga.”
7 Hano Waryobha yaashumaashëëyë amangʼana agha abhamaraika yaaghambirë igha,
“Nkokora ndë abhamaraika abhaane okobha rikama,
na abhaköri abha emeremo abhaane,
okobha ëbhëmörë ibhya omorro.”d
8 Kasi ko mangʼana agha Omoona uwaaye,
yaaghambirë igha,
“Uwe Waryobha,
öbhötöngi ubhwaho mboraabhe ubhwa amakora na amakora,
kora noraatongenga abhantö bhwaheene.
9 Uwe nohanshirë amangʼana agha obhoheene,
nörëghirë obhoghogho bhonswe igho.
Ku bhuyö Waryobha,
Waryobha uwaaho,
akohakirë amaghuta agha ukushomerwa,
okore obhe omonene
okokera bharikyaho.”e
10 Ghwiki Waryobha arashumaashera Omoona uwaaye igha,
“Omonene,
nu-uwe waabhömbirë ekebhara ukurwa okosemoka,
kora ghwiki nu-uwe waabhömbirë mu-ryobha ko amabhoko aghaaho.
11 Ëbhëntö bhyonswe igho bhiyö,
mberesareka,
mbereghota kya ingibho,
kasi uwe,
noraaghëndërri okobha-ho amakora na amakora.
12 Noraabhikunyekunye kya engansho,
mbererabhoka kya ingibho ënkörö.
Kasi uwe,
tukwisyörya hë,
noraaghëndërri okobha-ho igho,
amakora na amakora.”f
13 Waryobha tiyaakatëëbhëri maraika wowonswe oora igha,
“Ikara bhoryo ubhwane hano,
ahasë hano hakosookwa bhököngʼu,
okohekera hano ndekokora otashere hansë abhabhisa abhaaho.”g
14 Abhamaraika n-këntö kë?
Bhayö tebhaana ömöbhërë hë,
kasi mbo bhakokorra Waryobha emeremo.
Kora nkobhatoma arë ukughya ukutighinkanera abhantö bhano bharaahönibhwi.