Amaraghërryö ko sembaasi isya abhantö mo-kanisa
5
Otakaabheeha abhaghaaka,
kasi obharaghërringa kya hano waraghërrya bhasuwëënyu.
Abhamura,
obharaghërri kya hano waraghërrya abhamura abhëënyu.
2 Abhakungu,
obharaghërri kya hano waraghërrya bhanyakuwëënyu,
na abhaisëkë,
kya bhono okoraghërrya abhaisëkë abhëënyu.
Ughinga orakora engʼana iyö kwa enkoro inshiiya.
3 Osookenga abhasinö bhano bhataana uwa ököbhötöörya,
obhatöörringa.
4 Kasi hano oraanyoore igha,
umusinö aana abhaana handë abhaishökörö,
ni-igha abhantö abhaaye bhayö,
bhamötöörringa kya bhono Waryobha akutuna.
Hano bharaamutughe,
ho oraanyoore bharahaka amangʼana amaiya ghaara abhaibhöri abhaabho bhaabhakorranga.
Kiyö nkyo Waryobha akutuna.
5 Umusinö ono ataana ömöntö uwa ökömötöörrya,
nkwitengʼera arë Waryobha,
nkomosaasaama arë na okomosabha ubhutikö na omobhasö igha amötöörri.
6 Kasi umusinö ono ahanshirë oronamba urwa ko-kebhara kono,
uyö n-kya ömöntö ono yaakwa nokaanyoora igha m-möhöru,
ko bhoora taana ubhwighwerrani na Waryobha hë.
7 Amangʼana ghayö ghonswe igho ötëëbhi abhakumya,
okore bhatakaasha okotemwa amasoro.
8 Kasi ömöntö wowonswe ono atakötöörrya abhantö abhaaye,
ekenene abha waaye ka,
uyö yaamara ukutigha amangʼana agha umukumo,
uyö,
m-möntö m-moghogho okokera bhano bhataana umukumo ku-Waryobha.
9 Umusinö abharrwe mo-bhasinö,
hano oraanyoore ahikiri imyoka merongo esansabha,
na unyoore igha tiyaakakörrë obhosooraare hë.a
10 Abhe uwa eteemo inshiiya,
abhe igha,
nö-möntö ono yöörökërryanga abhaana abhaaye eteemo inshiiya,
yaasërëënianga abhaghëni,
yaatighinkananga ukwisaabhya abhantö abha Waryobha amaghörö aghaabho.
b Umusinö uyö,
abhe ono yaatöörryanga bhano bhaanyankibhwanga,
ghwiki abhe ono yaakora amangʼana amaiya.
11 Kasi abhasinö bhano bhataraaghota,
otakaikërrya bhandekwe amariina aghaabho ko amangʼana agha ökötöörrya abhasinö,
ko bhoora ëmëbhërë nkobhakera ghërë,
bhatigha hayö amangʼana agha Kiristo,
bhatuna obhotetwa.
12 Hayö noraanyoore bhabhaayë na risoro irya okobhotorrwa ikiina na Waryobha,
ko bhoora bhatighirë riraghano iryabho ku-Kiristo,
irya ukwikara igho bhatatëtirwë urwa kabhërë.
13 Abhasinö kya bhayö,
nkunyoora örë bhaana eteemo iya ubhworo na ubhwërëëri ubhwa mu-mighi ighya abhantö.
Bhayö n-nyangasheka,
abhashërëngya abha amangʼana agha abhantö abhandë,
nkoghamba bharë amangʼana ghano ghatabhatönëri,
na ghano ghataana enshera.
14 Bhoono öni nkutuna ndë igha,
abhasinö bhano bhataraaghota,
bhatetwenga,
bheebhore,
bhatughe imighi ighyabho,
okore umubhisa uwëëtö wowonswe oora,
atakatoghamba bhoghogho.
15 Tokomaaha igha abhasinö abhandë bhatimbooshoka,
bhaghoota-ko amangʼana agha Oghosambwa?
16 Mbe,
hano oraanyoore omokari umukumya aana abhasinö mo-bhahiiri abhaaye,
ni-igha abhatöörri,
okore ekanisa etakaaritoherwa.
Hayö ho ekanisa eraanyoore umweya ughwa ökötöörrya abhasinö sentakaana.
17 Abhaghaaka abhatangati abha ekanisa bhano bhakwimererra bhuuya ekanisa,
bhasookwenga na bhakorrwenga bhuuya,
c ekenene,
abha omotono ughwa okoraareka engʼana iya Waryobha na ukwëghya abhantö.
18 Keno këghërrë ngambirë igho ni-igha,
Amaandeko Amahörëëru ghandëkirwë igha,
“Otakaabhoha engʼombe umunywa,
hano yakohoorra engano.”
d Ghwiki yandëkirwë igha,
“Ömököri uwa emeremo naingʼarëëyi okohakwa ehoorohooro iyaaye.”e
19 Otakaikërrya amangʼana agha ukushongerwa ukwa omoghaaka uwa ekanisa,
hano oraanyoore ghataana obhoheene ubhwa abhaimërërri abhabhërë handë abhatatö.f
20 Kasi abhaghaaka abha ekanisa bhano bhaköghëndërrya okokora ëbhëbhë,
obhakaani harabhu igho abhandë bhonswe bhaighwe,
okore bhoobhohe.
Amangʼana ghano Pauro yaakaanëri Timoteo
21 Nkokoraghërrya ndë mbere iya Waryobha,
na mbere iya Kiristo Yëësu na abhamaraika abhaahorwa igha,
onaghi amangʼana ghayö nkwandëkëëyë.
Otakaaheeta okobhotora ibhiina.
Otakaabha na ekeroterro.
22 Otakaaheeta okotoora ömöntö ko-meremo ighya Waryobha,
ko bhoora hano oraatoore-ko ömököri uwa ëbhëbhë,
uwe wonswe noraanyoore wikererraini nawe kö ëbhëbhë ibhyaye.
Ku bhuyö ni-igha wangarre,
okore öghëndërri okobha ömöntö ono otaana risoro.
23 Ukurwa bhoono igho,
otakaanywanga amanshë agheene igho hë,
kasi ughusanga-ko idivaig nke igho,
ko okoghera iya öbhörööyë ubhwaho ubhwa enda,
na amarööyë aghandë ghano ghakukunyankya.