Abhëëghya abha obhorongo
4
Bhoono Umwika Ömöhörëëru nkoghamba arë amangʼana aharabhu igho igha,
hano sinsikö isya umuhiko sirihika,
abhantö abhandë mbaritigha umukumo ughwa heene,
bhaghoote-ko amëëghyö agha obhorongo agha amasambwa.
2 Amëëghyö ghayö,
nkwëghibhwa gharë na abhaihunaania abharongo.
Abhëëghya abharongo bhayö,
tebhaamanyërrëëyi igha,
në-bhëbhë bhakokora kasi tebhakokora ëbhëbhë hë,
ko bhoora amaitegherro aghaabho ghasareka.
3 Abhantö bhayö,
nkwëghya bharë igha abhantö bhatakaatetana,
bhatighe okorya ibhyakorya nyabhorebhe.
Kasi ibhyakorya bhiyö,
Waryobha yaabhëbhömbirë akatohaana,
okore abhakumya tumukumi ko bhoora igha,
ntomanyirë obhoheene.
4 Ëbhëntö bhyonswe igho ibhya Waryobha,
m-biiya,
tekeeho ikya ukughirwa hë.
Abhakumya bhabhegheghe ku ukukumya Waryobha,
5 ko bhoora engʼana iya Waryobha na okosaasaama ukwëtö,
nkosaabhuura bhërë ibhyakorya bhiyö.
Ömököri uwa emeremo umuuya uwa Yëësu Kiristo
6 Hano örëëghi abhakumya amangʼana ghano,
noraanyoore orakorra Kiristo Yëësu emeremo ubhwa heene,
kora noraanyoore wëghiibhwi bhuuya ku umukumo na ko amëëghyö amaiya ghano waaghoota.
7 Wange amaghano ghano ghataana ubhwera bhwobhwonswe bhoora,
kasi obhe na omotono ughwa okokora kya bhono Waryobha akutuna obhe.
8 Emanyekaini igha,
“Okonarya ömöbhërë ghobhe na singuru,
n-kuuya hake igho.
Kasi okotonerra okokora kya bhono Waryobha akutuna,
n-kuuya bhököngʼu,
ko bhoora igha,
nkotohaana körë riraghano irya ukunyoora öbhöhöru ubhwa bhoono igho na bhoora bhuriisha.”
9 Obhoheene ni-igho amangʼana gharë,
ku bhuyö ni-igha abhantö bhaghaikërri.
10 Engʼana iyö,
yo ekoghera toranyanka na torakora omotono ko-meremo,
ko bhoora igha,
Waryobha ömöhöru we tukwitengʼera.
Uyö we Ömötöörya uwa abhantö bhonswe igho,
ekenene m-Mötöörya uwa bhano bhakumukumya.a
11 Wëëghi na okoraghërrya abhakumya amangʼana ghayö.
12 Ömöntö wowonswe oora atakaakosera igha m-mumura ökërë,
kasi okore omotono ughwa okobha ëkërëngyö ko abhakumya,
ko bhoghambi ubhwaho,
eteemo iyaaho,
righonshe iryaho,
umukumo ughwaho,
otakaabha na risoro.
13 Ughinga orakora omotono ughwa okosomera abhantö Amaandeko Amahörëëru.
Öghëndërri okoraareka na ukwëghya abhantö okohekera hano ndiisha iyö.
14 Otakaatigha okokorra emeremo,
ituho eera Waryobha yaakohaayë okohetera ko mangʼana agha öbhörööti,
enkaagha eno abhaghaaka abha ekanisa bhaakötöörëëyë amabhoko.
15 Onaghi okokora amangʼana ghayö mo-nkoro iyaaho,
okore abhantö bhonswe igho bhamaahe amaghëndërryö aghaaho.
16 Öghëndërri ukwiraarerra,
ko amangʼana agha eteemo iyaaho,
na amëëghyö aghaaho.
Hano oraakore igho,
noraaitööri uwe umwene na bhano bhakwitegherra amangʼana ghayö.