Eteemo iya abhaimërërri abha ekanisa
3
Engʼana eno nemanyekaini igha,
“Hano ömöntö aighömbirë emeremo ighya ubhwimërërri ubhwa ekanisa,
uyö ne-meremo imiiya ukunyoora aighömbirë.”
2 Mbe,
umwimërërri uwa ekanisa,
ni-igha abhe ömöntö ono atakotemwa amasoro.
Abhe umushaasha nyamokari ömwë igho,
a airebherrenga,
ömöntö uwa obhongʼaini,
ono akosookwa,
omohaani,
abhe ömöntö ono amanyirë ukwëghya abhantö engʼana iya Waryobha.
3 Atakaabha umunywi uwa amarwa,
atakaabha umutindi,
abhe ömöntö omohaabhu ono ahanshirë amangʼana agha omorembe.
Kora atakaabha ömöntö ono ahanshirë seehera.
4 Abhe ono akwimererra bhuuya umughi ughwaye,
ömöntö ono akwörökërrya abhaana abhaaye eteemo inshiiya,
iya ukwighwera abhantö na okobhasooka.
5 Hano ömöntö yatamwa ukwimererra bhuuya umughi ughwaye umwene,
iyakë araatore okonaghya abhakumya abha ekanisa iya Waryobha?
6 Kora atakaabha ömöntö ono yatööribhwa bhöngö hano,
okore atakaasha okobha na ikiheemere.
Ukwiheema kuyö,
nkomokorerra abhotorrwe ikiina kya bhono Oghosambwa ghwaabhötörëëywë ikiina.
7 Kasi abhe ömöntö ono akoghambwa bhuuya kora na bhano bhatarëngë Abhakiristo,
okore atakaasha okobha na risoro na ököghöötibhwa ko-motegho ughwa Oghosambwa.
Eteemo iya abhashemaasi
8 Abhashemaasib bhonswe,
bhabhe na eteemo inshiiya,
bhatakaabha abhaihunaania,
bhatakaabha abhanywi abha amarwa,
bhatakaahansha seehera.
9 Kasi,
bhabhe abhantö bhano bhakonaghya kwa amaitegherro amaiya obhoheene ubhwa umukumo ughwëtö bhono bhwahonyorwa.
10 Bhayö bhonswe,
ni-igha tangata bhashaashibhwi.
Hano oraanyoore igha m-buuya bharë,
bhakore emeremo ghiyö.
11 Bhakaabhoc bhonswe bhabhe na eteemo inshiiya,
bhatakaabha abhaghambi abha abhantö,
bhagheerenga ngʼora amangʼana,
ghwiki ni-igha bhabhe abhantö abha heene ko amangʼana ghonswe igho.
12 Umushemaasi wonswe,
abhe umushaasha nyamokari ömwë igho,
abhe ömöntö ono akoghambera abhaana abhaaye na abhantö abhaaye bhonswe igho.
13 Abhashemaasi bhano bhakokora emeremo ighya öbhötöörrya bhuuya,
bhasookwenga,
okore bharaareke amangʼana agha umukumo ghono bhaanagho ku-Kiristo Yëësu ko obhokarë.
Obhoheene ubhwa umukumo ughwëtö
14 Nkukwandekera ndë ritashandighi reno,
nokaanyoora igha m-böngö ndaashe iyö.
15 Kasi hano ndaateghete,
unyoore omanyërrëëyi bhono Waryobha akutuna abhantö abhaaye bhabhe.
Abhantö bhayö,
mbo ekanisa iya Waryobha ömöhöru,
na ekanisa,
yo intimö na umusingi ughwa obhoheene.
16 Obhoheene bhono Waryobha öörökëri nu-bhwa ököröghöörya.
Obhoheene bhuyö ni-igha,
Kiristo yaaiyörökëri aana ömöbhërë kya bhëëtö,
akaimererrwa na Umwika Ömöhörëëru igha mwihöötu.
Akamaahwa na abhamaraika,
amangʼana aghaaye ghakaraarekwa mu-bhyaro bhyonswe igho,
akakumibhwa na abhantö abha ko-kebhara kono,
akagheghwa ukughya mu-bhuhika ighörö iyö.