Amaraghërryö ko abhaghorwa bhano bhaakumya
6
Abhaghorwa bhano bhaakumya Waryobha,
ni-igha bhasookenga abhanene abhaabho,
okore Waryobha atakaatokwanga,
handë amëëghyö aghëëtö ghatakaaserwa.
2 Hano oraanyoore abhaghorwa bhaana abhanene abhaabho bhano bhaakumya Yëësu,
engʼana iyö,
etakaaghera bhabhasere.
Kasi bhabhakorre emeremo bhuuya bhököngʼu,
ko bhoora bhayö,
m-bakumya bharikyabho bhakötöörrya emeremo,
kora m-baghonshe abhaabho.
Okaani abhantö,
na ököbhëëghya amangʼana ghayö bhuuya.
Amëëghyö agha obhorongo na ubhwamë ubhwa heene
3 Ömöntö wowonswe ono akwëghya abhantö amangʼana agha obhorongo,
amëëghyö ghano ghatakorengerrania na ghaara agha obhoheene agha Omonene uwëëtö Yëësu Kiristo,
kora teghakwikererrania na amëëghyö ghano ghakoraghërrya abhantö igha bhasooke Waryobha.
4 Abhantö bhayö,
nkwibhaaka arë bhosa igho,
kora tamanyirë engʼana hë.
Ömöntö kya uyö,
nu-mwingʼangʼo aanagho ughwa senkaani isya ebhengʼanangʼana igho,
bheno bhetaana ubhwera.
Amangʼana ghayö,
ngo ghakoreeta orongʼeera,
riihë,
amatöki,
na amaitegherro amaghogho.
5 Kora nkoghera gharë abhantö bhanga ukwighwerrana.
Abhantö kya bhayö,
emetwe ghyabhasarekera,
tebhaana obhoheene hë.
Nkokanya bharë igha,
okosooka Waryobha ne-nshera iya okoneebhera-mo.
6 M-maheene,
okosooka Waryobha,
nkoghera körë ömöntö aameha bhököngʼu,
hano yaanga kobha na oronamba,
aiswe na ëbhëntö bheno aanabhyo.
7 Hano twaaibhööywë ko-kebhara kono,
tetwaishirë-mo na ëkëntö kyokyonswe igho hë.
Kora hano turiwa-mo,
titurirwa-mo na kyokyonswe keera hë.
8 Mbe,
hano toraabhe na ibhyakorya na singibho,
twiswe na bhiyö.
9 Kasi bhano bhakwighomba ukwameha,
nkushaashibhwa bharë,
bhaghöötibhwa ko-metegho na oronamba urwabho,
urwa ekekangi.
Oronamba ruyö,
nkobhasarya rörë,
kora robhasikya.
10 Esemoko iya amangʼana amaghogho ghonswe igho,
no-kohansha seehera.
Abhandë okohansha seehera,
kwabhangʼaina bhaatigha umukumo,
bhaikorerra öbhörrö ubhurito,
kya ömöntö ono aibhëtirë na ekegheso.
Pauro arakaania Timoteo
11 Kasi bhoono uwe ömöntö uwa Waryobha,
ni-igha ongʼose amangʼana ghayö.
Oghoote-ko amangʼana agha heene,
osooke Waryobha na obhe na umukumo,
righonshe,
öghömërri na wihoote.
12 Amangʼana ngakakongʼa bhono bhonswe gharaakongʼe,
kasi uwe,
obhe na omotono ughwa okosoorana Waryobha,
onaghi öbhöhöru ubhwa amakora ghonswe igho.
Öbhöhöru bhuyö,
yo engʼana eno waabherekerrwa,
urusikö rono waaikërëëyi umukumo ughwaho ghono waarë nagho ku-Yëësu Kiristo,
mbere iya abhaimërërri abhaaru bhaara.
13 Ndakokangʼasërrya mbere iya Waryobha ono akohaana ëbhëntö bhyonswe igho öbhöhöru,
na mbere iya Kiristo Yëësu ono yaaimërërrëëyë obhoheene ku-Pontio Piraato,
14 ni-igha onaghi amaraghërryö ghayö,
oghaikërri,
otakaateeya okohekera hano Omonene uwëëtö Yëësu Kiristo ariisha.
15 Yëësu uyö,
nariisha enkaagha eno Waryobha yaasëëmya.
Waryobha umwene igho,
we akötöönibhwa.
Uyö umwene igho,
we ömötöngi,
Omokama uwa abhakama bhonswe igho,
na Omonene uwa abhanene bhonswe igho.
16 Waryobha umwene igho,
we atarikwa.
Naikaayë mo-bhorabhu bhono ömöntö ataatore ukubhusuntarra.
Kora taaho ömöntö ono yakamörööshë hë,
handë ono akotora okomomaaha.
Obhotoro na okosookwa bhebhe ku-Waryobha amakora ghonswe igho.
Amina.
17 Ötëëbhi abhaamë igha,
bhatakaihasha handë ukwesegha ubhwamë ubhwa ko-kebhara kono.
Ubhwamë bhuyö,
m-bwa ribhagha ike igho.
Kasi ubhweseghe ubhwabho,
bhobhenga ku-Waryobha,
ono akötösërëënia ko okotohaana ëbhëntö bhyonswe igho,
okore tushomerwe nabhyo.
18 Ghwiki obhatëëbhi igha,
bhakore amangʼana amaiya.
Bhabhe abhaamë,
abha okokora amangʼana amaiya.
Bhabhe abhahaani,
bhasangenga na abhantö abhandë ëbhëntö ibhya ubhwamë ubhwabho.
19 Ko okokora ghayö,
mbaraaibhekere emongo eno eraabhe kya umusingi ömököngʼu ughwa inyumba ku-sinsikö siyö sikuusha.
Hayö ho bharinyoora öbhöhöru ubhwa obhoheene.
20 Timoteo,
onaghi bhuuya ghonswe igho ghano Waryobha yaakohaana.
Wibhashe amangʼana amanyanku,
teghaana ubhwera bhwobhwonswe bhoora hë.
Otakaisohya mo-senkaani isya ekekangi,
seno abhandë bhakokanya igha,
nsyo obhongʼaini.
21 Abhantö abhandë bhano bhaghoota-ko senkaani isya ekekangi siyö,
bhatimbööshökirë,
bhatighirë umukumo.
Mbe,
örööbhö robhe hamwë na bhëënyu bhonswe igho.