Emeremo ighya Pauro na bharikyaye Tësarönikë
2
Abhakumya bharikyëtö,
bhëënyu abheene mmomanyirë igha,
ukuusha kö-bhëënyu hayö,
tekwaare kwa bhosa hë.
2 Ghwiki mmomanyirë igha,
enkaagha eno waanyöörrë totaraahika kö-bhëënyu,
ntwaanyankiibhwi bhököngʼu,
kora tokatokwa mu-mughi ghoora ghokobherekerwa igha Firipi.
Nokaanyoora twaarëbhërrëywë bhököngʼu igha totakaasha kö-bhëënyu,
kasi Waryobha yaatohaayë singuru isya okoraareka Amangʼana aghaaye Amaiya kö-bhëënyu.
3 Amangʼana ghano tokobhakangʼasërrya,
ta-agha okobhasirya ëkëkööri,
handë okobharaarekera ko obhoghogho,
handë okobhangʼaina.
4 Kasi nkoraareka törë ko bhoora Waryobha yaarööshë igha ntwingʼarëëyi okokora igho.
Ku bhuyö akatohaana emeremo ighya okoraareka Amangʼana Amaiya.
Ta-bhantö tukutuna ökötëghërya hë,
kasi keno tukutuna nö-kötëghërya Waryobha,
ko bhoora we akwitaaha ghonswe igho ghano gharëngë mo-senkoro isya abhantö.
5 Mmomanyirë igha,
tetwaghambanga amangʼana okore motohanshe,
handë amangʼana agha obhongʼaini ngʼaini ghano ghatarë agha obhoheene,
okore igha tunyoore ehoorohooro.
Waryobha we umwimërërri uwëëtö ko-ghayö ghonswe igho nkoghamba!
6 Ghwiki titwatunanga igha abhantö bhatukumi hë,
nekaabha igha m-bëënyu,
handë igha na-bhantö abhandë igho.
Ko bhoora igha bhëëtö na-bhatomwa abha Kiristo törë,
ntokaatörrë ukutuna ëbhëntö nyabhorebhe kö-bhëënyu,
kasi tetwakörrë igho hë.
7 M-bahaabhu twaarë kö-bhëënyu kya omokari ono akorera abhaana abhaaye.
8 Ntwaabhahanshirë bhököngʼu.
Ku bhuyö ntwaashömëëywë,
te-Mangʼana Amaiya agheene igho twaabhatëëbhëri ukurwa ku-Waryobha hë,
kasi ntwaakörrë ghonswe igho ghano ghakotora okobhatöörrya,
ko bhoora bhëënyu m-baghonshe abhëëtö mörë.
9 Abhakumya bharikyëtö,
ndamanya nkuhiita mörë omotono ughwëtö na ukunyanka ukwëtö,
kono twaarë nako ko okokora emeremo ubhutikö na omobhasö.
Ntwaakoranga igho,
okore totakaanyankya ömöntö wowonswe mö-bhëënyu,
hano twaraareka Amangʼana Amaiya agha Waryobha.
10 Bhëënyu mbo abhaimërërri abhëëtö,
na Waryobha namanyirë igha,
eteemo iyëëtö kö-bhëënyu abhakumya bharikyëtö,
në-hörëëru yaarë,
iya obhoheene,
tetwatëmirwë amasoro hë.
11 Ghwiki mmomanyirë igha,
enkaagha iyö twaarenga hamwë na bhëënyu,
ntwaabhakorranga kya bhono omoghaaka akokorra abhaana abhaaye.
12 Ntwaabhatoghekanga mo-senkoro,
torabhatërëmya na okobhakangʼasërrya,
okore igha,
mokore ghano Waryobha ahanshirë.
Waryobha uyö,
we akobhabherekera okore mosohe mo-Bhokama na mu-bhuhika ubhwaye.
13 Bhëëtö tetokorosa ukukumya Waryobha hë,
ko bhoora hano mwaaighuurë engʼana iyaaye eno twaabharaarëkëëyë,
temwaghëghöötirë okanya igha nkö-möntö iruurë hë.
Kasi mwaaghëghöötirë igha,
ni-iya Waryobha,
na maheene ni-igho ërë.
Engʼana iyö,
nkokora ërë emeremo mo-senkoro isyënyu,
bhëënyu bhano mukukumya.
14 Abhakumya bharikyëtö,
ghaara ghaanyöörrë abhakumya abha Kiristo Yëësu mo-makanisa agha Waryobha mo-mokowa ughwa Yudea,
ni-ighoigho na bhëënyu ghaabhanyöörrë.
Abhantö abhëënyu bhaabhanyankëri,
kya hano bhayö bhaanyankiibhwi na Abhayahudi bharikyabho.
15 Abhayahudi bhayö,
bhaaitirë abharööti abha kare,
na mbo bhaaitirë Omonene Yëësu.
Ghwiki mbo bhaatunyankëri.
Abhantö bhayö,
nkörërrya bharë Waryobha,
kora m-babhisa abha abhantö bhonswe igho,
16 ko bhoora bhakotokaania okoraareka Amangʼana Amaiya ko-Bhakyaro.
Keno bhakutuna ni-igha,
Abhakyaro bhatakaatööribhwa.
Ku bhuyö ni-igho bhaköghëndërrya okohekerania ëbhëbhë bhyonswe igho bheno bhakokora senkaagha syonswe igho.
Kasi bhoono öbhöbhë ubhwa Waryobha,
bhobhahëkërëëyë!
Pauro na bharikyaye bharaighomba okotaarra Abhatësarönikë
17 Abhakumya bharikyëtö,
ukutighana ukwëtö na bhëënyu n-kwa akabhagha akake igho kwaarë.
Ghwiki ukutighana kuyö nu-kwa ömöbhërë ughwene igho kwaarë,
tu-kwa senkoro kwaarë hë.
Ko-nkaagha yonswe igho iyö,
ntwaaighombanga bhököngʼu igha tomaahane na bhëënyu ghwiki.
18 Ho twaatunirë igha tuushe iyö,
ekenene öni Pauro naatunanga ukuusha iyö,
kasi Oghosambwaa ghokatorebherra.
19 Naatunanga niishe iyö ko bhoora igha hano Omonene Yëësu ariisha,
m-bëënyu morebha ikibhuno ikya ubhweseghe na ukushomerwa ukwëtö,
na morebha ikirighi ikyëtö ikya obhobhaahi.
20 M-maheene,
m-bëënyu mokoghera toraikumya na torashomerwa.