Ritashandighi irya mbere irya Pauro
ko-Bhatësarönikë
Amakëërërryö
1
Ritashandighi reno,
nö-öni Pauro ndyandëkirë toona Siriwanoa hamwë na Timoteo.
Ekanisa iya umughi ghono ghokobherekerwa igha Tësarönikë,
m-bëënyu tukwandekera,
abhantö bhano mukukumya Taata uwëëtö Waryobha na Omonene uwëëtö Yëësu Kiristo.
Waryobha abhahaane örööbhö na omorembe.
Umukumo ughwa Abhatësarönikë
2 Nkukumya törë Waryobha senkaagha syonswe igho,
ko okoghera iya bhëënyu bhonswe igho,
kora titukusinya okobhasabhera hë.
3 Hano twabhasabhera ko-Taata uwëëtö Waryobha,
nkuhiita törë umukumo ughwënyu ko amangʼana ghano mokokora.
Torahiita omotono ughwa righonshe ghono moonagho,
na kya igho monaghirë ku ubhweseghe bhono moonabho ko-Monene uwëëtö Yëësu Kiristo.
4 Bhëënyu abhakumya bharikyëtö,
ntomanyirë igha,
Waryobha nabhahanshirë,
nkyo këghërrë abhashaaghööyë mobhe abhantö abhaaye.
5 Ntomanyirë igha,
Amangʼana Amaiya ghano twaabharaarëkëëyë,
te-mangʼana agheene igho ghaarë hë,
kasi ntwaaraarëkirë ku singuru,
na okohetera ku-Mwika Ömöhörëëru,
eno toona obhoheene igha,
amangʼana ghayö na-agha obhoheene.
Bhëënyu mmönyirë bhuuya kya igho twaarë hamwë na bhëënyu,
okore tobhatöörri.
6 Nokaanyoora mwaatëësirwë bhököngʼu ku ikibhuno ikya umukumo ughwënyu,
kasi mwaaikërëëyi engʼana iyö ku ukushomerwa kono kukurwera ku-Mwika Ömöhörëëru.
Nkö-bhëëtö na ko-Monene Yëësu nko mwëëghëëyë ököghömërrya ghayö.
7 Ku bhuyö,
mobhaayë ëkërëngyö ikiiya ko-bhakumya bhonswe igho abha mo-mokowa ughwa Makedonia,
na ughwa Akaaya.
8 Ko okoghera iya bhëënyu,
abhantö bhaighuurë Amangʼana agha Omonene Yëësu.
Tërëngë igha nko-bhantö abha Makedonia na abha Akaaya abheene igho hë,
kasi umukumo ughwënyu ku-Waryobha,
ngomanyekaini ahasë honswe igho.
Ku bhuyö tetoona engʼana iyëndë iya okohoorrera-ko hë.
9 Ahasë honswe igho hano tukughya,
abhantö nkushumaashera bharë kya bhono mwatwikërëëyi hano twaahikirë kö-bhëënyu.
Nkoghamba bharë kya bhono mwaatighirë ëbhëtöndö ibhyënyu,
mokaisyörrya Waryobha ömöhöru na uwa obhoheene,
okore momokorre emeremo.
10 Bhoono nkoghanya mörë Omoona uwa Waryobha,
b Yëësu,
aike ukurwa mu-ryobha.
Uyö we Waryobha yaaryökëri,
ghwiki we akötötöörya okore Waryobha atakaasha ukutushibhya hano arebhotorra abhantö bhonswe igho ibhiina ibhyabho.