Pauro aratoma Timoteo Tësarönikë
3
Mbe,
hano twaakërrwë ököghömërrya,
ku ukwanga okomanya ghano ghakwikora Tësarönikë hayö,
tokamaaha igha,
öni na Siriwano tutighare ku-mughi ghono ghokobherekerwa igha Atene,
2 kasi totome murikyëtö Timoteo,
okore aashe abhatogheke mo-senkoro isyënyu,
na okobhatërëmya ku-mukumo ughwënyu.
Timoteo uyö,
nö-mököri uwa emeremo murikyëtö uwa Waryobha ko okoraareka Amangʼana Amaiya agha Kiristo.
3 Ntwaakörrë igho,
okore ömöntö wowonswe atakaakwa omotwe ku ikibhuno ikya inyaanyi eno mukunyoora.
Bhëënyu mmomanyirë igha,
ni-igha tohetere mu-nyaanyi muyö.
4 Ghayö mmoghamanyirë,
ko bhoora enkaagha eno twaarë na bhëënyu,
ntwaabhahitökyanga igha,
ntoraanyankibhwi.
Bhoono ni-igho ërë.
5 Ho yaahikirë-ho enkaagha eno naakërrwë ököghömërrya,
nkatoma Timoteo kö-bhëënyu,
okore mmanyërri amangʼana agha umukumo ughwënyu.
Naakörrë igho,
ko bhoora naakanyanga igha,
handë umushaashi uwa amangʼana oora aratora okobhashaashya na okobhasirya.
Hayö ho bhoono emeremo ghyonswe igho gheno twaakörrë kö-bhëënyu,
ghekaahëtirë bhosa igho.
Amangʼana amaiya ukurwa Tësarönikë
6 Kasi bhoono Timoteo atöhëkërëëyë ukurwa kö-bhëënyu hayö,
atötëëbhëri amangʼana amaiya agha umukumo na righonshe iryënyu.
Atötëëbhëri igha,
nkutuhiita mörë bhuuya ukughya iyö,
na amaigha ghabharëëyë agha okomaahana na bhëëtö,
kya bhono na bhëëtö bhonswe amaigha ghatörëëyë agha okomaahana na bhëënyu.
7 Abhakumya bharikyëtö,
amangʼana agha umukumo ughwënyu,
ghatöghëkirë senkoro isyëtö ku-nyanko eno twaarë nayo.
8 Bhoono töhëshëëyë,
ko bhono mwitöghëkirë,
monaghirë ko-Monene Yëësu.
9 Bhoono n-kë tokaahaka Waryobha ko okoghera iya umukumo ughwënyu,
handë ku ikibhuno ikya ukushomerwa okonene kono toonako ku-Waryobha,
okoghera iya bhëënyu?
10 Nkotonerra törë okosaasaama Waryobha ubhutikö na omobhasö,
atötöörri tomaahane ghwiki na bhëënyu,
okore töbhëngërërri keno kikusuuha ku-mukumo ughwënyu.
11 Taata uwëëtö Waryobha umwene we tokosaasaama,
na Omonene uwëëtö Yëësu,
bhatösëëmëri enshera iya ukuusha iyö.
12 Omonene abhëngëri na ököbhëngërërrya righonshe irya okohanshana bhëënyu abheene ko abheene na okohansha abhandë bhonswe igho,
kya bhono toona righonshe rinene kö-bhëënyu.
13 Ghwiki ni-igha atogheke senkoro isyënyu,
okore mobhe abhantö abhahörëëru na motakaabha na risoro ku-Waryobha Taata uwëëtö,
enkaagha eno Omonene uwëëtö Yëësu ariisha hamwë na abhahörëëru abhaaye bhonswe igho.a