3
Bhoono ko bhoora mwaaryoka hamwë na Kiristo,
mutune amangʼana agha mu-ryobha iyö Kiristo aikaayë,
orobhareka urwa bhoryo ubhwa Waryobha,
ahasë aha okosookwa.
2 Motemerenga omotwe ghano gharëngë mu-ryobha,
motakaaitegherra amangʼana agha ko-kebhara kono.
3 Ko bhoora bhëënyu mwaakwa ko mangʼana ghayö.
a Öbhöhöru ubhwënyu bhoono hamwë bhörë na Kiristo ku-Waryobha.
Kasi tebhokomaahekana ko-bhantö abhandë hë.
4 Öbhöhöru ubhwënyu nku-Kiristo bhukurwera.
Enkaagha eno aremaahekana,
ho na bhëënyu moremaahekana hamwë nawe,
na okosanga nawe ubhuhika ubhwaye.
Eteemo eno ëkötëghërya Waryobha
5 Mbe,
ku bhuyö ni-igha,
mutighe okokora amangʼana agha ko-kebhara kono,
obhosooraare,
ubhunyanku,
amaitegherro amaghogho,
obhoraaghëri,
obhohoobhaaru,
na oronamba urwa ëbhëntö.
Okobha na oronamba urwa ëbhëntö,
n-kya okosengerra ëbhëtöndö.
6 Amangʼana ghayö ngo ghakoreeta ubhushibhu ubhwa okorerra ukwa Waryobha ko-bhantö bhano bhatakumwighwera.b
7 Kora bhëënyu bhonswe ghayö ngo mwaakoranga kare hayö,
enkaagha eno mwaabhaahwanga na amangʼana agha öbhököri ubhwa ëbhëbhë.
8 Kasi bhoono mutighe këmwë eteemo iya okorerra,
na öbhöbhë,
obhoghogho,
amatöki,
bheena amangʼana ghano ghatakongʼarra okoghambwa na bhëënyu.
9 Motakaatëëbhanianga obhorongo,
ko bhoora mwangʼaabhora eteemo iya kare hamwë na amangʼana aghaako,
10 bhoono mwaghöötirë-ko eteemo eehya.
Waryobha umwene yaabhömbirë eteemo eehya iyö,
kora nköghëndërrya arë kobhakora mutuubhane nawe bhököngʼu,
okore momomanye bhuuya.
11 Ku bhuyö tekobha bhöndë ku-Muyahudi na kö ömöntö ono atarë Umuyahudi,
abhasaarwa handë abhatasaarwa,
ömöghëni handë umusheema,
omoghorwa handë ömötöönööni.
c Kasi Kiristo we akomara amangʼana ghonswe igho,
ghwiki mo-senkoro isya bhonswe igho arë.
12 Bhoono ko bhoora m-baahorwa abha Waryobha mörë,
kora na-bhahörëëru bhano ahanshirë,
mobhe na enkoro iya amaabhë,
eteemo inshiiya,
ubhwihöötu,
obhohaabhu,
bheena öbhöghömërrya.
13 Moghomerraninga,
mwabheranenga,
nyoore ömöntö aana engʼana na murikyaye,
ni-igha mwabherane kya bhono Omonene Yëësu yaabhaabhera.
14 Ekenene ko-ghayö ghonswe igho,
ni-igha mohanshane,
ko bhoora righonshe nkoreeta rërë öbhömwë ubhwa heene ko bhonswe igho.
15 Omorembe ughwa Kiristo ghobhaahe senkoro isyënyu,
ko bhoora bhëënyu bhano mörëngë imyaho ighya ömöbhërë,
mwabherekerwa igha mobhe na omorembe.
Mobhe abhakumya Waryobha.
16 Engʼana iya Kiristo ebhaikarre ku ubhwaru.
Mworokerraninga,
morakaanania kwa bhongʼaini bhonswe igho.
Mörëëtëringa Waryobha mo-senkoro isyënyu,
na ukumukumya ko-sezabhuri,
amarëëtyö na sëtënzi isya mo-nkoro.d
17 Ghonswe igho ghano mokoghamba handë okokora,
mokorenga okohetera iriina irya Omonene Yëësu Kiristo,
na eno morakumya Taata Waryobha ko okohetera ku-uyö.
Amangʼana ghano ghaingʼarëëyi mo-Bhakiristo
18 Bhare abhakari,
mwighwerenga abhashaasha abhëënyu,
kya bhono ikutunwa ko-bhantö bhano bhakukumya Omonene Yëësu Kiristo.e
19 Na bhëënyu abhashaasha,
mohanshe bhakëënyu,
motakaabhakorra öbhöbhë.
20 Na bhëënyu abhaana,
mwighwere abhaibhöri abhëënyu ko-ghonswe igho,
ko bhoora okokora igho,
nkushomera körë Omonene Yëësu Kiristo.f
21 Na bhëënyu bhaataata,
motakatendera abhaana abhëënyu,
okore bhatakaakwa metwe.g
22 Na bhëënyu abhaghorwa,
mwighwere abhanene abhëënyu abha ko-kebhara kono,
ko-meremo ghyonswe igho.
Motakaitangatërrya moraishömya hano bhaaho,
okore igha bhabhakumi,
kasi mobhasooke senkaagha syonswe igho,
kwa nkoro nshiiya,
ko bhoora nkosooka mörë Omonene Yëësu.
23 Kyokyonswe igho keno mokokora,
mokore kwa enkoro ëmwë ko okoghera iya Omonene,
motakaakora morakanya igha m-möntö mokokorra.
24 Momanye igha,
Omonene ono mukutighinkanera,
we Kiristo.
Uyö we arebhatuha ituho eera yaaraghaini okobhatuha.
25 Kasi wowonswe igho ono akokora amangʼana amaghogho,
narishibhibhwa na Waryobha,
ko ekerengere ikya obhoghogho bhono yaakora,
ko bhoora Waryobha taana ekeroterro hë.h