4
Na bhëënyu bhonswe bhare bhanene,
mokorrenga bhuuya na ubhwa heene abhaghorwa abhëënyu,
momanye igha,
kora na bhëënyu bhonswe mmoona Omonene uwëënyu mu-ryobha.
Pauro arasabha Abhakorosaai bhamosabheraninga
2 Mosaasaamenga nkaagha syonswe igho,
moraiyangarra na mukuminga Waryobha.
3 Motosabheraninga na bhëëtö hano mwasaasaama Waryobha,
okore atokorre enshera iya okoraareka engʼana iyaaye,
iya imbumbure iya Yëësu Kiristo eno yaarenga ibhisirwë.
Öni mo-kebhohe ndë,
ko okoghera iya engʼana iyö.
4 Ku bhuyö monsabherenga igha,
ngëndërri okoraareka engʼana eno harabhurabhu igho,
kya bhono mmanyirë igha ni-igho ikutunwa ebhe.
5 Mbe,
ni-igha mobhe abhangʼaini ko-teemo iyëënyu hano wanyoora mörëngë hamwë na abhantö bhano bhataraakumya Yëësu.
Umweya ghwoghwonswe igho ghono mukunyoora,
mokorenga igho.a
6 Mushumaashenga amangʼana amasambaaroku nkaagha syonswe igho,
amangʼana ghano ghakötëghërya abhantö,
okore momanye bhono moraahonshorenga bhuuya,
abhantö bhonswe igho.
Amakëërërryö agha okomarërrya
7 Umukumya murikyëtö omoghonshe Tikiiko,
ömököri uwa emeremo uwa heene,
ono nkokora hamwë nawe emeremo ighya Omonene Yëësu,
uyö we araabhatëëbhi amangʼana aghaane ghonswe igho.
8 Kiyö nkyo kyaaghërrë nkamotoma kö-bhëënyu iyö,
okore momanye ghano ghakutunyoora eno,
na ghwiki igha,
abhatëëbhi amangʼana ghano gharaabhatogheke.
9 Naraashe hamwë na Onesimo,
umukumya murikyëtö omoghonshe uwa heene,
ono arëngë Omokorosaai murikyënyu.
Bhayö mbo bharaabhatëëbhi ghonswe igho ghano ghakwikora eno.
10 Arisitariko,
ono arëngë hamwë na öni mo-kebhohe mono,
arabhakëërya.
Maariko,
mubhyara uwa Bharinaabha,
wonswe nkobhakëërya arë.
Hano arihika kö-bhëënyu iyö,
mömösërëëni bhuuya kya bhono naaraghërrya.
11 Kora Yëësu oora akobherekerwa igha Yusito,
wonswe nkobhakëërya arë.
Mo-Bhayahudi bhano bhaakumya Kiristo,
m-bano abheene igho,
mbo bhakokora emeremo ighya Obhokama ubhwa Waryobha hamwë na öni.
Nköntöörrya bharë bhököngʼu.
12 Epafura Omokorosaai murikyënyu wonswe nkobhakëërya arë,
wonswe m-mököri uwa emeremo uwa Kiristo Yëësu.
Epafura uyö,
naana omotono ughwa okobhasabhera nkaagha syonswe igho,
nkobhasabhera arë igha,
monaghe ku-mukumo ughwënyu,
na mohangarre ko amangʼana ghano Waryobha akutuna igha mokore.
13 Ndatora ukumwimererra igha,
nkokora arë emeremo kwa motono,
ko okoghera iya bhëënyu,
na ko-bhantö abha umughi ughwa Raodikia na abha umughi ughwa Hierapori.
14 Ruuka ömörëri omoghonshe uwëëtö,
bhaana Dema,
bharabhakëërya.
15 Mötökëërri abhakumya bharikyëtö abha mu-mughi ughwa Raodikia.
Mökëëri umusubhaati Nimufa na ekanisa iyö ikusikanera mu-nyumba iyaaye.
16 Hano moraamare okosoma ritashandighi reno,
mobhe na obhoheene igha,
ekanisa iya Raodikia yonswe eresome.
Kora na bhëënyu bhonswe mutune enshera iya ukunyoora ritashandighi reno naandëkëëyë Abharaodikia ryonswe moresome.
17 Mötëëbhi Arikipo igha,
ni-igha akore bhuuya emeremo gheno Omonene yaamohaana.
18 Öni Pauro nkwandeka ndë ghano na okobhoko ukwane umwene,
ndabhakëërya.
Muhiite igha mo-kebhohe ndë.
Örööbhö urwa Waryobha robhe hamwë na bhëënyu.