2
Nkutuna ndë momanye bhono neena omotono ko-meremo,
ko okoghera iya bhëënyu,
na bhaara abha mu-mughi ughwa Raodikia,
hamwë na abhandë bhonswe igho bhano motaakaandööshë.
2 Nkokora ndë igho,
okore senkoro isyabho setereme,
bhabhe ëkëntö ëkëmwë ku righonshe,
bhanyoore obhongʼaini bhono bhoraaghere bhamanye bhuuya igha,
Yëësu Kiristo we ësëëmyö iya Waryobha.
3 Ku-Yëësu nko emongo iya imbumbure yonswe igho iya obhongʼaini na obhomanyi ërëngë.
4 Bhoono nkobhandekera ndë ghayö,
okore ömöntö wowonswe igho atakaabhangʼaina ko okobhangʼënërrya.
5 Nokaanyoora tëndëngë hamwë na bhëënyu kinyamöbhërë,
kasi enkoro iyaane hamwë ërë na bhëënyu.
Nkushomerwa ndë ko bhoora mmanyirë igha,
nköghëndërrya mörë okobha na öbhömwë,
na umukumo ughwënyu ngotashirë sehaama ku-Kiristo.
Okohaghaasha öbhöhöru ku-Yëësu Kiristo
6 Bhoono ko bhoora mwaakumya Kiristo Yëësu igha m-Monene uwëënyu,
möghëndërri okobha na öbhömwë nawe.
7 Mohangarre mönsë iyaaye,
mwihaghaashe ko-we na umukumo kya bhono mwëëghibhwa.
Ghwiki mobhe abhantö bhano mukukumya bhököngʼu Waryobha.
8 Mwangarre,
ömöntö wowonswe igho atakaabhasirya ëkëkööri ko okohetera amëëghyö agha amangʼana agha kare ghaara,
agha amasambwa ghano ghakotonga ekebhara keno.
Amëëghyö ghayö,
nkwitengʼera gharë seteemo isya abhantö na amasambwa ghano ghakotonga ekebhara keno,
a ta-mëëghyö agha Kiristo hë.
9 Ngambirë igho ko bhoora obhoheene bhonswe igho ubhwa Waryobha nku-Kiristo bhokomaaherwa kinyamöbhërë.
10 Bhëënyu mwaanyoora obhoheene bhonswe igho ko okoghera iya okobha na öbhömwë na Yëësu Kiristo,
uyö we Omonene uwa obhokama na ubhwera bhonswe igho,
kora ko bheno bhërëngë ighörö iyö.
11 Hano mwaabhaayë na öbhömwë na Kiristo,
mwaangʼaabhööyë esemoko iya öbhököri ubhwa ëbhëbhë,
Yëësu Kiristo akabhasaara.
Yaabhasaarrë esaaro eno etakosaarwa na abhantö,
kasi we umwene akoghekora.
12 Mbe,
hano mwaabhatiisiibhwi,
mwaakurë hamwë na Kiristo,
kora ghwiki mokaryoka hamwë nawe ko bhoora mwaaisëghirë obhotoro ubhwa Waryobha ono yaamuryökëri ukurwa mo-bhaku.
13 Bhëënyu n-kya abhaku mwaarë ko okoghera iya ëbhëbhë ibhyënyu,
kora temwarenga moraasaarwa esaaro iya ëbhëbhë ibhëënyu.
Kasi Waryobha yaabhahaana öbhöhöru hamwë na Kiristo,
hano yaatwabhëëyë ëbhëbhë ibhyëtö bhyonswe igho.
14 Waryobha akaruusya-ho amaandeko agha isiirë ghano ghaatushongeranga,
akagharuusya-ho këmwë ko okoghatemerra ko-mosarabha.
15 Ko okohetera omosarabha,
Waryobha akaruusya amasambwa obhokama ubhwagho na ubhwera ubhwagho akaghakera ku ukukirirrya,
akaghasöökërrya harabhu igho.
16 Mbe,
ömöntö wowonswe igho atakaabhabhotorra ikiina ko mangʼana agha ibhyakorya,
handë ukunywa ëkëntö nyabhorebhe,
handë sinyangi isya sidiini,
sinyangi isya okotaashwa umwëri,
handë urusikö urwa Obhotooro.b
17 Ghayö ghonswe igho ni-kiiriiri ikya ghano ghakwitengʼerwa igha,
ngaraashe,
kasi Yëësu Kiristo we obhoheene.
18 Bhaaho abhantö bhano bhakokangʼasërrya amangʼana agha ubhwihöötu ubhwa okomaahwa na abhantö na agha okosengerra abhamaraika.
Motakabhaikërrya,
bhatakaasha okobharuusya ituho iyëënyu iya amakora ghonswe igho.
Abhantö bhayö nkwiheema bharë ko bhoora bhakoghamba igha,
bhaamaaha amangʼana ghayö mo-bherooto.
Kasi obhoheene ni-igha,
amaitegherro aghaabho amaghogho agha bhunyakyaro,
ghabhakangihya.
19 Abhantö bhayö,
bhaiyahora ukurwa ku-Kiristo ono arëngë omotwe ughwa ömöbhërë.
Ukurwa ku-uyö ömöbhërë ghonswe igho nkoraaghëribhwa ghörë,
kora ghoroobhanibhwa na imyaho na imiki,
ghukiina bhuuya kya bhono Waryobha akutuna.
20 Mbe bhëënyu,
ko bhoora igha mwaakwa hamwë na Kiristo,
yaabhatungurya ukurwa mö-bhëhwë ebheghogho bheno bhekotonga ekebhara keno.
c Bhoono n-kwakë mokobha okanya igha,
m-bantö abha ko-kebhara kono mökërë?
N-kwakë mokoghoota amaraghërryö ghano ghakoghamba igha,
21 “Motakaaghoota keno,
motakaakera keno,
motakaakunia keno!”
22 Amangʼana ghayö ghonswe igho m-mëëghyö agha abhantö ko ëbhëntö bheno bhekosareka hano bhyamara kokorrwa emeremo ibhagha ike igho.
23 No-bhoheene igha,
amaraghërryö ghayö,
nkomaahekana gharë igha,
nga-bhongʼaini,
ko bhoora ghaköröndërrya seteemo isya öbhösëngërri seno bhaitoorra-ho abheene,
bharaikörya igha m-baihöötu,
kora bharabhaaha ömöbhërë kwa ukughusingʼirrya.
Kasi amangʼana ghayö,
teghakotora okorebherra oronamba urwa ömöbhërë hë.