Ritashandighi irya Pauro
ko-Bhakorosaai
Amakëërërryö
1
Ritashandighi reno nö-öni Pauro ndyandëkirë,
öni omotomwa uwa Kiristo Yëësu ko okohansha ukwa Waryobha umwene,
öni hamwë na Timoteo umukumya murikyëtö.
2 Nkobhandekera törë bhëënyu abhakumya bharikyëtö abhahörëëru abha Waryobha,
bhano mömënyirë mu-mughi ghuyö ghokobherekerwa igha,
Korosaai.
Twabha ëkëntö ëkëmwë na bhëënyu,
ku-mukumo ghono tokosanga ku-Kiristo.
Torasabha munyoore örööbhö na omorembe ukurwa ku-Waryobha Taata uwëëtö.
Amasabhi na umukumo
3 Nkobhasabhera törë nkaagha syonswe igho,
na torakumya Waryobha,
Suwaabho Omonene uwëëtö Yëësu Kiristo.
4 Nkokora törë igho,
ko bhoora twaighwa amangʼana agha umukumo ughwënyu ku-Kiristo Yëësu,
na bhono mohanshirë abhantö abha Waryobha bhonswe igho.
5 Umukumo na righonshe,
bhiyö n-ko okoghera iya ubhweseghe ubhwa ituho eno Waryobha yaabhasëëmërya mu-ryobha.
Mwaaighuurë amangʼana amaiya agha ubhweseghe bhuyö,
enkaagha eno mwaaraarëkëëywë engʼana iya obhoheene iya Yëësu Kiristo.
Engʼana iyö,
yo Amangʼana Amaiya agha Yëësu Kiristo.
6 Amangʼana Amaiya ghayö mwaatëëbhiibhwi,
nkoromaana gharë ko-kebhara kyonswe igho.
Kora nköghëndërrya gharë ukusyörya seteemo isya abhantö,
okore bhatëghëri Waryobha.
Engʼana iyö,
n-kya bhono yaabhaayë kö-bhëënyu ukusimirya hano mwaaighuurë Amangʼana Amaiya agha örööbhö urwa Waryobha,
mokamanya bhuuya kya igho örööbhö urwaye urwa heene rörë.
7 Amangʼana Amaiya ghayö mwëëghibhwa na Epafura.
Epafura uyö,
m-moghonshe uwëëtö,
ömököri uwa emeremo murikyëtö,
kora m-möntö uwa heene,
ko okokorra Kiristo emeremo ko okoghera iya bhëëtö.
8 Uyö we yaatötëëbhëri amangʼana agha righonshe iryënyu reno rikurwa ku-Mwika Ömöhörëëru.
9 Ku bhuyö ukusimirya hano twaaighuurë urwa mbere amangʼana aghëënyu amaiya ghayö,
nkobhasabhera törë,
kora tetwakasinyirë hë.
Torasabha igha,
Waryobha abhahaane obhomanyi bhonswe igho ko ghano akutuna igha mokore,
abhahaane na obhongʼaini bhonswe igho ubhwa amangʼana ghano ghakurwa ku-Mwika Ömöhörëëru.
10 Amangʼana ghayö,
ngo tokobhasabhera,
okore mobhe na eteemo eno Omonene Yëësu akutuna igha abhantö abhaaye bhabhe nayo.
Mbe,
hayö ho moraamötëghëri,
ko mangʼana amaiya ghonswe igho ghano mokokora,
kora ho moraamanye Waryobha bhököngʼu.
11 Torabhasabhera igha,
Waryobha abhatöörringa ku singuru isya ubhuhika ubhwaye,
okore möghömërringa ghonswe igho motakaarosa.
Mushomerwenga
12 na eno morakumya Taata Waryobha,
ko bhoora abhakörrë mobhe abhasangi abha ikitweno ikya umwandö ughwa abhantö abhaaye,
mo-Bhokama ubhwaye ubhwa emerengaari.
13 Waryobha yaatötöörri ukurwa mo-bhokama ubhwa ikisuntë,
akatongʼaanyërya mo-Bhokama ubhwa Omoona uwaaye omoghonshe.
14 Twatunguribhwa ko okohetera Omoona uwaaye uyö,
ko bhoora twabherwa ëbhëbhë ibhyëtö.
Kiristo naana ubhwera ku-bhyonswe igho
15 Kiristo nkwörökya arë harabhu igho,
bhono Waryobha arë,
nokaanyoora igha,
takomaahekana hë.
Kiristo uyö we omoona omotangi ono aana ubhwera kö-bhëntö bhyonswe igho.
16 Ko bhoora ëbhëntö bhyonswe igho bhyaabhömbirwë okohetera ku-uyö,
ibhya mu-ryobha na ibhya ko-kebhara,
bheno bhekomaahekana na bheno bhetakomaahekana,
mbokaabha ubhwera handë obhokama,
obhonene handë singuru.
Bhyonswe igho mbyaabhömbirwë,
ko okoghera iya we.
17 Ho yaarë,
kora ëbhëntö bhyonswe igho bhetaraabhombwa,
nkotonga arë ëbhëntö bhyonswe igho,
ku-uyö ëbhëntö bhyonswe igho,
nkoghootana bhërë.
18 We omotwe ughwa ömöbhërë,
ekanisa yo ekobherekerwa igha,
ömöbhërë.
Ensonga iya engʼana iyö ni-igha,
we okosemoka ukwa ekanisa,
ghwiki we uwa mbere ukuryoka ukurwa mo-bhaku,
okore abhe omonene uwa ëbhëntö bhyonswe igho.
19 Ko bhoora Waryobha yaatëghëribhwa igha,
obhoheene ubhwaye bhonswe igho bhobhe ku-Kiristo.a
20 Ghwiki Waryobha akaighwerrania ëbhëntö bhyonswe igho nawe,
ko okohetera ku-Kiristo,
ëbhëntö ibhya ko-kebhara kono,
kora na bheno bhërëngë mu-ryobha.
Yaakörrë igho,
ko okoreeta omorembe okohetera amaanyinga agha Yëësu,
ghano ghaitëkirë ko-mosarabha.
21 Kare hayö,
hano bhëënyu motaarenga moraakumya Waryobha,
hare mwaarë nawe,
kora mokabha abhabhisa abhaaye,
ko okoghera iya amaitegherro na seteemo isyënyu sengogho.
22 Kasi bhoono Waryobha yaabhaighwerrania nawe,
ko okohetera ukukwa ukwa Kiristo.
Yaakörrë igho,
okore igha abhareete mbere iyaaye mörëngë abhahörëëru,
motaana imbuura handë risoro ryoryonswe reera.
23 Kasi ni-igha möghëndërri okobha na umukumo,
mohangarre,
mobhe na singuru,
motakaikërrya ukutigha ubhweseghe bhono mwaanyoora mo-Mangʼana Amaiya ghano mwaaighwa.
Amangʼana Amaiya ghayö,
ghaaraarekwa ko-bhantö bhonswe igho abha ko-kebhara kono.
Na öni Pauro naabha umutighinkani uwa Amangʼana Amaiya ghayö.
Emeremo ighya Pauro mo-makanisa
24 Bhoono nkushomerwa ndë ku-nyaanyi eno nkunyoora kö-möbhërë ughwane ko okoghera iya bhëënyu,
ko bhoora nkosanga inyaanyi iya Yëësu Kiristo eno ëköghëndërrya ko okoghera iya ömöbhërë ughwaye,
ömöbhërë ghuyö ngo ekanisa.b
25 Waryobha yaangʼaana emeremo ighya ukutighinkanera ekanisa iyaaye,
okore ndaarekere abhantö engʼana iyaaye bhono ërë.
26 Engʼana iyö iya ikibhisirë,
yaabhisirwë ukurwa kare,
amakora ghonswe igho.
Kasi bhoono yatoorwa harabhurabhu igho ko-bhantö abha Waryobha.c
27 Bhayö mbo Waryobha yaahanshirë igha abhahonyorre engʼana enene iyö iya ubhuhika eno yaakörrë ko okoghera iya Abhakyaro.
Engʼana iya ikibhisirë iyö yo Kiristo ono arëngë mo-senkoro isyënyu,
ghwiki we akobhahaana ubhweseghe igha moraasange ubhuhika ubhwa Waryobha.
28 Ku bhuyö nkoraareka törë amangʼana agha Kiristo,
torakaania abhantö na ukwëghya abhantö bhonswe igho,
kwa obhongʼaini bhonswe igho,
okore tobhareete bhonswe igho mbere iya Waryobha,
kö-bhömwë ubhwa heene na Kiristo.
29 Ko okoghera iya engʼana iyö,
neena omotono ughwa okokora emeremo bhököngʼu,
ku singuru seno Kiristo akongʼaana.