Waryobha nkötötöörya arë okohetera kö örööbhö urwaye
2
Bhëënyu n-kya abhaku mwaarë,
ko bhoora motaighweranga Waryobha,
mokaghëndërrya okokora ëbhëbhë.
2 Enkaagha iyö,
mwaakoranga amangʼana agha ko-kebhara kono.
Kora mwaasorananga omotangati omoghogho uyö,
Omonene uwa singuru isya ighörö isya amasambwa.
Uyö we bhoono igho akokora emeremo mo-bhantö bhano bhatakwighwera Waryobha.a
3 Bhëëtö bhonswe igho Abhayahudi na bhëënyu Abhakyaro,
tetwaighweranga Waryobha hë.
Hano waanyöörrë totaraakumya Yëësu Kiristo,
ntwaarë kya bhayö bhatakwighwera Waryobha.
Twaakoranga amangʼana ghano ëmëbhërë ighyëtö na sehakëri isyëtö bhyaatunanga tokore.
Ntwaarë kya bhono abhantö abhandë bharëngë ko-kebhara kono.
Ntwaaibhööywë na esemoko iya obhoghogho.
Twaarërërrëëywë na Waryobha,
kora nakaatushibhiri.
4 Kasi bhoono ko bhoora Waryobha naana amaabhë bhököngʼu,
natohanshirë ku righonshe iryaye reno retaana umuhiko.
5 Ntwaarë kya abhaku ko okoghera ukwa obhosarya ubhwëtö,
akatohaana öbhöhöru obhohya kya bhono yaahaana Yëësu Kiristo.
Amaabhë agha Waryobha,
ngo ghaaghërrë akabhatöörya.b
6 Waryobha akaturyökya ukurwa mo-bhakuc hamwë na Kiristo Yëësu,
akatwikarya totonge hamwë na Kiristo ko-hasë hano hatakomaahwa.
Yaakörrë igho ko okotohaana öbhömwë na Kiristo Yëësu.
7 Waryobha yaakörrë ghayö,
okore aashe ukwörökya ekebhara ubhwamë ubhwa örööbhö urwaye,
rono rotakorengʼaanibhwa na kyokyonswe keera ko amaabhë aghaaye,
kö-bhëëtö bhano toona öbhömwë na Kiristo Yëësu.
8 N-ko okoghera iya örööbhö urwa amaabhë aghaaye,
nkyo kyaaghërrë Akabhatöörya ku umukumo ghono moonagho ku-Yëësu Kiristo.
Tiyabhatöörya ko okoghera igha mwaamokorra ëkëntö kyokyonswe keera,
ti-igho hë,
kasi iyö ni-tuho eno Waryobha yaabhahaana.
9 Tiyabhatöörya ko okoghera iya ëkëntö ikiiya kyokyonswe keera mwaakora hë,
ku bhuyö ömöntö wowonswe oora atakaihasha.
10 Ko bhoora igha Waryobha yaatobhomba,
na kö bhömwë ubhwëtö na Kiristo Yëësu,
yaatobhomba bhohya,
okore eteemo iyëëtö ebhe iya okokora amangʼana amaiya ghano yaatösëëmëëyi ukurwa kare igha toghakore.
Waryobha atökörrë Abhayahudi na Abhakyaro tobhe ëkëntö këmwë okohetera ku-Kiristo Yëësu
11 Mbe,
ku bhuyö muhiite kya igho mwaarë kare.
Esemoko iyëënyu,
ti-iya abhantö abha Waryobha yaarë hë,
kasi ni-iya Abhakyaro yaarë.
Abhayahudi mbaabhabherekeranga igha “Abharëësya.”
Kasi esaaro,
nö-möntö akoghekora kö-möbhërë ughwa ömöntö.
12 Muhiite igha enkaagha iyö,
temwamanyirë Yëësu Kiristo hë.
Temwagherrwanga hamwë na Abhaisiraëri,
abhantö abha Waryobha.
M-baghëni mwaarë ko-maraghanio agha imuumad ghano Waryobha yaaraghaini Abhaisiraëri.
Temwaarë na ubhweseghe bhwobhwonswe bhoora hë,
mwaamënyirë ko-kebhara kono kya abhantö bhano bhatamanyirë Waryobha.
13 Kasi bhoono ko okobha na öbhömwë na Kiristo Yëësu,
bhëënyu bhano mwaarë hare na Waryobha kare hayö,
bhoono Waryobha abharëëtirë haangʼë nawe,
okohetera ukweteka ukwa amaanyinga agha Kiristo Yëësu hano yaakuurë.
14 Ko bhoora Yëësu Kiristo uyö yaatohaana omorembe,
akatokora bhëëtö bhano twaarë amakomo abhërë,
Abhakyaro na Abhayahudi,
tobhe ikomo imwë.
Yaakörrë igho ku ukuruusya-ho ekerebherro keno kyaare-ho na okotemora urughito urwa ubhubhisa rono rwaatwahokanianga.
15 Ghwiki akaruusya-ho amaraghërryö,
imighiro ighya Waryobha na seteemo syonswe igho isya amaraghërryö agha Mosa.
Akakora bhohya amakomo abhërë ghayö agha abhantö,
Abhayahudi na Abhakyaro,
bhakabha ëkëntö këmwë,
ku bhuyö akabhareetera omorembe.
16 Yëësu Kiristo yaatoora hamwë amakomo abhërë ghayö,
ghakabha rikomo imwë ko okohanekwa ukwaye ko-mosarabha.
Akaghaighwerrania ghonswe igho abhërë ku-Waryobha,
akasikya ubhubhisa bhono bhwaare-ho ko-Bhayahudi na Abhakyaro.
17 Mbe,
Kiristo akaasha,
akaraareka amangʼana agha omorembe kö-bhëënyu bhano mwaarë hare na Waryobha,
na ko bhano bhaarë haangʼë na Waryobha.
18 Ko bhoora Yëësu Kiristo yaahanëkirwë ko-mosarabha,
okore bhëëtö bhonswe igho,
Abhakyaro na Abhayahudi tunyöörrë enshera iya ukusuntarra Waryobha Taata uwëëtö,
okohetera ku-Mwika Ömöhörëëru ömwë uyöuyö.
19 Mbe,
ukurwa bhoono igho,
bhëënyu tërëngë igha,
m-baghëni mörë,
handë igha abhangʼaanyëri abha ku-kyaro ikyëndë,
kasi bhëënyu ni-komo imwë mörë na abhantö abha Waryobha.
Bhoono bhëënyu na abhantö abha mu-nyumba iya Waryobha mörë.
20 Bhëënyu mobhaayë kya inyumba eno yaahaghaashwa ku-musingi,
na umusingi ghuyö,
na-bhatomwa na abharööti,
na Kiristo Yëësu umwene n-kya reghena irya mo-koona iya umusingi ghuyö.
21 Ko okobha na öbhömwë nawe,
inyumba yonswe igho nkoghootana ërë bhuuya eneneha ebha inyumba ëhörëëru ko okoghera iya Omonene.e
22 Ko bhoora mwabha na öbhömwë na Yëësu Kiristo,
nkokomwa mörë hamwë na Abhakiristo abhandë,
okore mobhe inyumba eno Waryobha araamenye-mo ko okohetera Umwika Ömöhörëëru uwaaye.