Ritashandighi irya Pauro
ko-Bhaëfësö
Amakëërërryö
1
Nö-öni Pauro omotomwa uwa Kiristo Yëësu ku righonshe irya Waryobha.
Ritashandighi reno,
m-bëënyu nkwandekera abhantö abha Waryobha bhano mököghëndërrya ukukumya Kiristo Yëësu Ëfësö hayö,
ko okobha na öbhömwë nawe.
2 Örööbhö na omorembe ukurwa ku-Waryobha Taata uwëëtö,
na ko-Monene uwëëtö Yëësu Kiristo,
bhebhe hamwë na bhëënyu.
Waryobha atökörëëyë amangʼana amaiya okohetera ku-Yëësu Kiristo
3 Bhamurë,
ni-igha tukumi Waryobha uwa Omonene uwëëtö Yëësu Kiristo,
na we Suwaabho Omonene uwëëtö uyö.
Waryobha yaatokorra amangʼana amaiya agha obhongʼoore bhwonswe igho ubhwa ahasë hano hatakomaahwa,
ko okohetera kö-bhömwë ubhwëtö na Yëësu Kiristo.
4 Keno Waryobha yaakörrë,
nu-kutwahora tobhe abhantö abhaaye ko okohetera kö-bhömwë ubhwëtö na Yëësu Kiristo.
Yaakörrë igho,
kora ataraabhomba ëbhëntö bhyonswe igho ibhya ko-kebhara kono.
Waryobha yaatwahora okore tobhe abhahörëëru abhaaye bhano totaana risoro ryoryonswe reera.
Ko okoghera iya righonshe iryaye,
5 yaasëëmëri ukurwa kare igha atokore tobhe abhaana abhaaye.
Yaakörrë igho,
ko okohetera ko keno Yëësu Kiristo yaakörrë,
ni-igho yaatunirë igha akore,
na engʼana iyö ekamushomera.
6 Ku bhuyö ni-igha tumukumi,
ko okoghera iya örööbhö urwaye urwa ököröghöörya,
rono yaatohaayë bhosa igho okohetera ku-Kiristo Yëësu ono Waryobha ahanshirë.
7 Ko okohetera amaanyinga agha Kiristo Yëësu,
Waryobha yatutungurya,
igha,
atwabhëëyë ëbhëbhë ibhyëtö okorengʼaana na ubhwaru ubhwa örööbhö urwaye.
8 Örööbhö n-dwaru bhököngʼu atohaayë,
kora aghërrë tobhe na obhongʼaini bhwonswe igho,
na okomanya bhuuya amangʼana.
9 Atöhönyörrëëyë ësëëmyö iyaaye eno yaatunanga aghehekerani okohetera ku-Yëësu Kiristo,
ko bhoora yaashömëëywë okokora igho.
10 Ësëëmyö iyaaye ni-igha hano enkaagha inshiiya irihika,
naretoora hamwë ëbhëntö bhyonswe igho,
ibhya mu-ryobha na ibhya ko-kebhara kono,
kora akore Kiristo Yëësu abhe omotangati uwa ëbhëntö bhiyö.
11 Ghwiki Waryobha yaatushaaghööyë bhëëtö Abhayahudi tobhe abhantö abhaaye,
ko okotohaana öbhömwë na Yëësu Kiristo.
Yaatushaaghööyë ko bhoora igha,
iyö në-sëëmyö iyaaye yaarë ukurwa kare.
Akakora ëbhëntö bhyonswe igho bhebhe kya bhono akutuna.
12 Akakora igho okore bhëëtö Abhayahudi bhano törëngë abha mbere ukwesegha Yëësu Kiristo,
tukumi Waryobha na ökömötöönia.
13 Hano na bhëënyu bhonswe mwaaighuurë engʼana iya obhoheene iya Amangʼana Amaiya agha bhono Waryobha akobhahönia,
mokaikërrya.
Waryobha akabhatoorra-ko umuhuri ughwaye.
Eharama iyö,
nu-Mwika Ömöhörëëru ono Waryobha yaabhahaana kya bhoora yaaraghaini igha,
nakaabhahaayë.
Yaakörrë igho,
ukwörökya igha,
bhëënyu bhonswe m-bantö abhaaye mörë.
14 Umwika Ömöhörëëru uyö,
n-kya ekebhete ikya Waryobha kö-bhëëtö igha,
Waryobha naretohaana ëbhëntö ibhyëndë bhyonswe igho,
bheno yaaraghaini igha,
aretohaana.
Umwika Ömöhörëëru uyö,
we ono Waryobha yaatoora-ho okohekera hano aritutungurya bhëëtö abhantö abhaaye.
Ku bhuyö ni-igha tumukumi ku ubhuhika ubhwaye.
Pauro arasabhera Abhakiristo abha Ëfësö
15 Nkukumya ndë Waryobha ko okoghera iya amangʼana ghonswe igho ghano yaatokorra.
Kerenga naighwa kya bhono mukukumya Omonene Yëësu,
na bhono mohanshirë abhantö abha Waryobha bhonswe igho,
16 kora tenakatighirë ukukumya Waryobha ko okoghera iya bhëënyu.
Hano nasaasaama Waryobha,
nkobhasabhera ndë.
17 Nkosaasaama ndë Waryobha uwa Omonene uwëëtö Yëësu Kiristo,
we Taata uwëëtö uwa ubhuhika obhonene,
igha abhahaane obhongʼaini ubhwa mu-ryobha,
na aihonyore kö-bhëënyu,
okore momomanyërri bhuuya.
18 Ghwiki nkobhasabhera ndë igha,
abhatöörri momanye obhoheene,
okore momanye ubhweseghe bhono yaaraghaini kö-bhëënyu hano yaabhabhërëkëëyë.
Momanye ubhwaru ubhwa obhongʼoore ubhwaye bhono yaaraghaini igha akaahaayë abhantö abhaaye.
19 Nkosaasaama ndë igha,
abhahaane obhotoro ubhwaye bhono bhokokera ëbhëntö bhyonswe igho,
kö-bhëëtö bhano tukukumya Kiristo Yëësu.
Obhotoro bhuyö mbwo bhökötötöörrya ukumukumya.
Obhotoro bhuyö m-boora bhoora ubhwa singuru sinsharu seera,
20 seno Waryobha yaaryökëëyi Kiristo Yëësu ukurwa mo-bhaku,
akamwikarya bhoryo ubhwaye,
ahasë hano hatakomaahwa.a
21 Kiristo uyö,
nkotonga arë abhatöngi bhonswe igho kighörö iyö,
abha ubhwera,
abha singuru,
abhanene na ibhyeo bhonswe igho bheno bhemanyekaini te-kokebhara kono aheene igho hë,
kasi kora na ko-kebhara keno kiriisha.
22 Waryobha akatoora ëbhëntö bhyonswe igho mu-bhwera ubhwa Yëësu Kiristo.
Akamokora abhe we omotwe ughwa ekanisa iyö,
yo Abhakiristo.b
23 Ekanisa n-kya ömöbhërë ughwa Kiristo,
netahatëëyë öbhömënyi ubhwa Yëësu Kiristo.
Yëësu Kiristo uyö,
we omohekerano ughwa öbhöhöru ubhwa ëbhëntö bhyonswe igho.c