Waryobha arahira Pauro okoraareka Amangʼana Amaiya ko-Bhakyaro
3
Ko okoghera iya amangʼana ghayö ngambirë,
öni Pauro nëmböhirwë ko okokorra Kiristo Yëësu emeremo kö-bhëënyu Abhakyaro.
Nkobhasabhera ndë ku-Waryobha.
2 Nemanyirë igha,
mwaighwa emeremo gheno Waryobha yaangʼaana kö örööbhö urwaye urwa amaabhë aghaaye,
okore mbaraarekere bhëënyu Abhakyaro engʼana iyaaye.
3 Waryobha yaanhönyörrëëyë ësëëmyö iyaaye,
kya bhuyö mbandëkëëyë hake igho.
4 Hano moraasome amangʼana ghayö mbandëkëëyë,
moratora okomanyërrya kya bhono öni manyirë ësëëmyö iyö,
iya amangʼana agha Yëësu Kiristo.
5 Ësëëmyö iyö,
tiyaarenga eraahonyorwa ko-rekora ryoryonswe reera hë,
kasi bhoono Waryobha aghëhönyööyë ko-bhantö bhano yaahora igha bhabhe abhatomwa abhaaye,
na ko abharööti abhaaye.
Abhahönyörrëëyë okohetera Umwika Ömöhörëëru.
6 Ësëëmyö iya Waryobha ni-igha,
umwandö n-gömwë Abhakyaro bhakosanga na Abhayahudi.
Abhantö bhonswe igho bhano bhakukumya Amangʼana Amaiya,
bhabhaayë kya ömöbhërë öghömwë,
kora nkosanga bharë riraghano reerareera,
reno Waryobha yaakörrë okohetera ku-Kiristo Yëësu.
7 Bhoono öni emeremo ighyane,
no-koraareka Amangʼana Amaiya kö örööbhö urwa amaabhë agha Waryobha ghano yaankörëëyë ko obhotoro ubhwaye.
8 Öni m-möntö moke ndëa ko-bhantö abhahörëëru bhonswe igho abha Waryobha,
kasi naahaaywë örööbhö urwa amaabhë aghaaye,
okore ndaarekere Abhakyaro ubhwamë ubhwa Yëësu Kiristo.
b Ubhwamë bhuyö,
tebhoona ekerengere hë.
N-këköngʼu okomanyërribhwa na abhantö.
9 Ghwiki angʼaayë emeremo ighya okoraghërrya bhuuya abhantö bhonswe igho,
okore bhamanye ësëëmyö eno yaarenga ibhisirwë ukurwa okosemoka na Waryobha umwene ömöbhömbi uwa ëbhëntö bhyonswe igho.
10 Yaakörrë igho,
okore okohetera mo-kanisa ko bhoono igho,
obhongʼaini ubhwa Waryobha ubhwa seteemo nsharu,
bhomanywe na abhatöngi na abha ubhwera bhano bhakotonga ahasë hano hatakomaahwa.
11 Waryobha yaakörrë igho,
ko okoghera iya ësëëmyö iyaaye eno yaatunanga ukurwa okosemoka ehekerane ko-keera Omonene uwëëtö Kiristo Yëësu yaakörrë.
12 Mbe,
ko bhoora igha ntoona öbhömwë na Yëësu Kiristo,
na ghwiki igha nkumukumya törë,
ku bhuyö ntoona ubhweseghe ubhwa ukughya këtöönööni ku-Waryobha.
13 Ku bhuyö bhoono nkobhasabha ndë igha,
motakaakwa emetwe ku-nyanko eno nkunyoora ko okoghera iya bhëënyu,
kasi keno mokaakora,
nu-kwiheemera inyanko iyö.
Pauro arasabhera Abhakiristo abha Ëfësö
14 Hano naitegherra ësëëmyö enene iya Waryobha iyö,
nkotema ndë hansë ibhiru mbasaasaamera ko-Taata uwëëtö Waryobha.
15 Uyö we esemoko iya ëbhëntö bhyonswe igho,
ibhya mu-ryobha na ibhya ko-kebhara kono.
16 Nkobhasaasaamera ndë ku-Waryobha igha,
ku ubhuhika ubhwaye ubhwaru bhono aanabho,
Umwika Ömöhörëëru abhahaane singuru,
mokongʼe mo-senkoro isyënyu,
17 okore Yëësu Kiristo amenye këmwë mo-senkoro isyënyu ku umukumo ghono moonagho.
Ndabhasabha igha,
möghëndërri okohanshana.
Righonshe n-kya imiri,
imiri nkokora ghërë ëmëtë ghenagha,
kora ghwiki n-kya inyumba eno ehaghaashirwë ku-musingi.
18 Nkosaasaama ndë igha,
bhëënyu na abhantö abha Waryobha bhonswe igho,
mobhe na obhotoro ubhwa okomanyërrya bhuuya igha,
Yëësu Kiristo natohanshirë bhököngʼu okokera bhono tukwitegherra.
19 Nkosabha ndë igha,
momanye righonshe iryaye riyö rekokera obhotoro ubhwa okomanya ukwa ömöntö.
Nkosaasaama ndë igha,
Waryobha abhahaane na abhaishöri bhököngʼu eteemo iyaaye.
20 Bhoono tigha tötööni Waryobha,
ono akotora okokora amangʼana amaaru okokera ghano ghonswe igho tokomosabha igha akore,
handë ghano tukwitegherra.
Nkokora arë ko obhotoro ubhwaye bhono bhokokora emeremo mo-senkoro isyëtö.
21 Tötööni Waryobha uwa ubhuhika bhono bhokomaahekana mo-kanisa,
na ku-Kiristo Yëësu,
senkaagha syonswe igho,
amakora ghonswe igho ukurwa okosemoka,
Amina.