Amangʼana agha Abhatomwa 15

Ikiikaro ikya ekanisa iya Yërusarëëmu

Enkaagha eno Pauro na Bharinaabha bhaarenga Antiökia iya Siria hayö, bhakaasha-ho abhantö nyabhorebhe, bhano bhaarwërëëyë mo-mokowa ughwa Yudea. Abhantö bhayö, bhakangʼaaraara ukughya hayö bhaabho Pauro bhaarë. Bhakasimya ukwëghya-yo abhakumya eno bharaghamba igha, “Hano motaasaarwe okorengʼaana na seteemo seno twaatëghëëywë na Mosa, temohone hë.” 2 Engʼana iyö ekaghera Pauro bhaana Bharinaabha bhakarya senkaani sëndörö na abhantö bhayö. Abhantö abha ekanisa iya Antiökia hayö, bhakabhotora ikiina igha, Pauro bhaana Bharinaabha na abhantö abhandë abha ekanisa iyö, bhaghende Yërusarëëmu, okore bhanyoore amaraghërryö agha engʼana iyö ko-bhatomwa abha Yëësu na abhaghaaka abhatangati abha ekanisa. 3 Ku bhuyö abhantö abha ekanisa iya Antiökia bhayö, bhakabhamanörya. Pauro bhaana bharikyaye, bhakahetera mu-bhyaro ibhya Föinikë na Samaaria, bhakabha bharatëëbhya abhakumya amangʼana ghayö, bhono Abhakyaro bhonswe bhaakumiri Yëësu. Abhakumya bharikyabho abha iyö, bhonswe engʼana iyö ekabhashomera bhököngʼu.

4 Hano Pauro na bharikyaye bhayö bhaahikirë Yërusarëëmu, bhakasërëënibhwa bhuuya na abhatomwa abha Yëësu, ekanisa na abhaghaaka abhatangati abha ekanisa. Mbe, bhaabho Pauro bhakasimya okobhatëëbhya amangʼana ghonswe igho, ghano Waryobha yaaghambirë ko okohetera bhaabho Pauro. 5 Kasi Abhakiristo abhandë abha Ekefarisaayo bhakeemoka, bhakaghamba igha, “Abhakyaro bhano bhakumiri Yëësu, ni-igha bhonswe bhasaarwenga, na bhatëëbhibhwi igha, bhaighwerenga amaraghërryö ghonswe igho agha Mosa.”

6 Ku bhuyö abhatomwa abha Yëësu bhayö, na abhaghaaka abhatangati abha ekanisa, bhakakora ikiina, okore bhaitaahe bhuuya engʼana iyö. 7 Hano bhaanyeeraini senkaani bhököngʼu ku-ribhagha ritambë, Peetero akemerra, akabhatëëbhya igha, “Bhëënyu abhakumya bharikyane, mmomanyirë igha, n-kare Waryobha yaanshaaghora mö-bhëënyu mono, ndaarekere Abhakyaro Amangʼana Amaiya, okore bhamukumi. 8 Waryobha we amanyirë ghonswe igho ghano gharëngë mo-senkoro isya abhantö. We yöörökëri igha, aikërëëyi kora Abhakyaro bhonswe ko okobhahaana Umwika Ömöhörëëru kya bhono yaatohaayë. 9 Ku bhuyö keno Waryobha yaakörrë kö-bhëëtö, nkyo yaakörrë na ko bheene bhonswe. Nkoghamba ndë igho ko bhoora bhonswe mbaasaabhuurrwë senkoro isyabho, ko okohetera ukukumya Yëësu. 10 Bhoono n-kibhuno kë kikughira morashaashya Waryobha ko okohaana Abheegha abha Yëësu inyanko eno ekotokera? Kora abhakörö abhëëtö bhonswe yaabhakërrë! 11 Bhëëtö nkukumya törë igha, nkötööribhwa törë ko okohetera örööbhö urwa Omonene Yëësu umwene igho. Abheene bhonswe örööbhö ruyöruyö ndwo robhatöörri.”

12 Mbe, abhantö bhonswe igho bhano bhaarë mu-ribharasa muyö, bhakakira kiri, bhakaitegherra Bharinaabha bhaana Pauro. Bhaabho Pauro, bhakabhatëëbhya bhono Waryobha yaakörrë amakono, na ebhemanyërryö ibhyaru mo-Bhakyaro, ko okohetera bho. 13 Hano bhaamarrë okoghamba amangʼana ghayö, Yaakobho wonswe akemerra, akaghamba igha, “Bhëënyu abhakumya bharikyane, munyitegherre! 14 Simeoni atötëëbhëri bhono Waryobha yaanyankera Abhakyaro bhayö. Akashaaghora-mo abhandë bhabhe abhantö abhaaye. 15 Amangʼana ghayö, nkorengerrania gharë na Amaandeko Amahörëëru ghano ghandëkirwë mo-bhetabho ibhya abharööti. 16 Yandëkirwë igha,

‘Hano amangʼana ghayö gharehwa, nindikyora,

nhaghaashe inyumba iya Daudi eno yaatemoka.

Ghwiki nendehaghaasha amahoona agha inyumba iyö ngaimërri bhohya.

17 Hayö ho Abhakyaro bhonswe igho bharintuna,

bhonswe igho bhano naabherekera igha bhabhe abhantö abhaane.

Mbe, amangʼana ghayö, nendeghakora.

18 Amangʼana ghayö, ngaamanyekaini ukurwa kare.’”

19 Yaakobho akaghëndërrya koghamba igha, “Öni nkomaaha ndë igha, totakaanyankya Abhakyaro bhano bhakwisyörrya Waryobha. 20 Ku bhuyö tobhandekere ritashandighi tobhatëëbhi igha, bhatakaaryanga ibhyakorya bheno bhinyankuhiibhwi ku ukumwensera ëbhëtöndö, bhatakaakora obhosooraare, bhatakaarya ibhibhuuse, kora bhatakaarya handë ukunywa amaanyinga. 21 Ko bhoora ukurwa kare, abhantö mbëëghibhwanga amaraghërryö agha Mosa mu-mighi ghyonswe igho, kora ngaasomwanga mu-sinyumba isya esango iya Abhayahudi kera urusikö urwa Obhotooro.”

Abhakiristo Abhakyaro bharaherrwa ritashandighi

22 Abhatomwa abha Yëësu bhayö, abhaghaaka abha ekanisa, na abhakumya abhandë abha Yërusarëëmu hayö, bhakabhotora ikiina igha, bhashaaghore abhantö bhano bharaahinane na bhaabho Pauro Antiökia iyö. Ku bhuyö, bhakashaaghora abhatangati bhabhërë, Yuuda ono yaabherekerwanga igha, Bharisabha, na uwöndë ono yaabherekerwanga igha, Siira. 23 Abhatomwa bhayö, bhakahaana abhatangati abhabhërë bhayö ritashandighi reno ryaandëkirwë igha,

“Bhëëtö abhatomwa, hamwë na abhaghaaka abha ekanisa, torabhakëërya abhakumya bharikyëtö Abhakyaro bhano mörëngë mu-mughi ughwa Antiökia, na mo-mekowa ighya Siria, na ighya Kirikia. 24 Twaighwa igha abhantö nyabhorebhe ukurwa kö-bhëëtö hano, bhabhanyankëri na amangʼana, okohekera senkoro isyënyu sekateeya. Kasi abhantö bhayö, bhëëtö tetwabhatömirë hë. 25 Mbe, amangʼana ghayö ngo ghaghërrë tokamaaha igha, tushaaghore abhantö bhano toraatome iyö, bhareetane hamwë na abhaghonshe abhëëtö, Bharinaabha bhaana Pauro. Ntökörrë igho, hano tomarrë kwighwerrana. 26 Abhantö bhayö, bhaahona ukukwa, ko okokorra emeremo Omonene uwëëtö Yëësu Kiristo.

27 Mbe, bhoono tötömirë kö-bhëënyu, Yuuda bhaana Siira. Bhayö mbo bharaabharaghërri bhuuya, amangʼana ghayö tobhandëkëëyë. 28 Umwika Ömöhörëëru na bhëëtö törööshë igha, totakabhaitëëkya imirigho imirito, kokera amangʼana ghano tobhandëkëëyë mono. 29 Motakaarya ibhyakorya bheno bhimwënsëywë ëbhëtöndö, handë ukunywa amaanyinga, motakaarya ibhibhuuse, na motakaakora obhosooraare. Hano muriharreke amangʼana ghayö, m-buuya moraanyoore mökörrë. Mbe, mutighare na omorembe.”

30 Mbe, abhantö bhano bhaatömirwë, bhakatighana na bharikyabho bhayö. Bhakangʼaaraara ukughya Antiökia. Hano bhaahikirë, bhakakoma abhakumya, bhakabhahaana ritashandighi riyö. 31 Abhakumya bhayö, bhakaresoma. Rekabhatërëmya senkoro isyabho, bhakashomerwa.

32 Abharööti Yuuda bhaana Siira, bhakatëëbhya abhakumya bharikyabho amangʼana amaaru agha okobhatërëmya, bhakaterema. 33 Bhakaikara iyö sinsikö nyabhorebhe. Abhakumya abha iyö, bhakabhaikërërrya igha bhakyore Yërusarëëmu na omorembe. 34 [Kasi Siira akamaaha igha, m-buuya atighare-yo.] 35 Pauro bhaana Bharinaabha, bhonswe bhakatighara Antiökia. Bho, hamwë na abhantö abhandë abhaaru, bhakabha bhararaareka engʼana iya Omonene ko-bhantö, na bharabhöörökërrya engʼana iyö.

Pauro araahokana na Bharinaabha

36 Hano syaahëtirë sinsikö nke igho, Pauro akatëëbhya Bharinaabha igha, “Tukyore mu-mighi gheno twëëghya-mo engʼana iya Omonene Yëësu. Twitaahe amaghëndërryö agha abhakumya bharikyëtö.” 37 Bharinaabha yaatunanga igha bhahinane hamwë na Yohana, ono yaabherekerwanga igha Maariko. 38 Kasi Pauro akamaaha igha, ti-bhuuya bhahinane na Maariko, ko bhoora yaabhatighirë mu-kyaro ikya Pamfiria, akaanga ököghëndërrya okokora nabho emeremo. 39 Engʼana iyö, ekaghera Pauro bhanyeerane senkaani bhököngʼu na Bharinaabha, kora bhakaahokana. Bharinaabha akahinana na Maariko, bhakariina mu-ryato, bhakaghya kwi-ghinga irya Kiipuro. 40 Pauro wonswe akashaaghora Siira, bhakatanora, hano abhakumya bharikyabho bhaamarrë okobhasabhera örööbhö urwa Omonene Yëësu. 41 Bhakaheta mu-kyaro ikya Siria na ikya Kirikia, bhakabha bharatogheka abhakumya.