Timoteo araghootana na bhaabho Pauro
16
Mbe,
Pauro akahika mu-mughi ghono ghwaabherekerwanga igha Dëribhë.
Hano yaaruurë-mo,
akaghya mu-mughi ughwöndë ghono ghwaabherekerwanga igha Risitira.
Mu-mughi muyö,
yaare-mo umwegha uwa Yëësu ono yaabherekerwanga igha Timoteo.
Nyakuwaabho m-Muyahudi ono yaarenga akumiri Omonene Yëësu,
kasi suwaabho,
m-Muyunaani yaarë.
2 Timoteo yaarë na eteemo inshiiya mo-bhakumya bharikyaye abha Risitira,
na Iköniö iyö.
3 Pauro yaatunanga igha,
abhe arahinana na Timoteo okoraareka engʼana iya Waryobha.
Ku bhuyö Pauro,
akaghegha Timoteo,
akamosaara.
Ko bhoora Abhayahudi bhonswe igho abha mu-mighi ghiyö,
mbaamanyirë bhuuya igha suwaabho Timoteo m-Muyunaani yaarë,
na Abhayunaani tebhaasaarwanga hë.
4 Mu-mighi gheno bhaabho Pauro bhaahëtirë,
mbaaraghërryanga-mo abhakumya amaraghërryö agha abhatomwa abha Yëësu,
na abhaghaaka abha ekanisa iya Yërusarëëmu,
okore bhaghaghoote.
5 Ku bhuyö amakanisa agha iyö,
ngaaghëndërrëëyi okonagha okobha na umukumo.
Ekerengere ikya abhakumya,
nkyaaruhanga kera urusikö.
Pauro aramaaha mo-kerooto ömöntö uwa Makedonia
6 Mbe,
Pauro,
Siira na Timoteo,
bhakakora oroghendo,
bhakahetera ahasë hano Furighia yaaheegheraini na Gharatia.
Bhakaheteerania,
bhataghambirë-mo engʼana.
Ko bhoora Umwika Ömöhörëëru,
yaabhakaanëri bhatakaraareka engʼana iya Waryobha mu-kyaro ikya Asia Enke.
7 Hano bhaahikirë mo-rotonga urwa omokowa ughwa Misia,
bhakatuna igha bhasohe mo-mokowa ughwa Bhitinia,
kasi Umwika Ömöhörëëru uwa Yëësu,
a tiyaabhaikërërrëëyi hë.
8 Ku bhuyö,
bhakaheta Misia,
bhakangʼaaraara ukughya mu-mughi ughwa Tiroa.
9 Enkaagha iya ubhutikö hano Pauro yaarenga araayë,
akamaaha ömöntö uwa Makedonia mo-kerooto.
Ömöntö uyö,
yaarenga aimërëëyë aramosaasaama igha,
“Otaamboka uushe Makedonia eno ötötöörri.”
10 Ko okoghera iya amamaaho agha Pauro ghayö,
tokasëëmyab bhöngöbhöngö oroghendo urwa ukughya Makedonia.
Ntwaaghëëyë iyö,
ko bhoora twaarööshë igha,
Waryobha we atöbhërëkëëyë kughya-yo,
okore tobharaarekere Amangʼana Amaiya.
Ridia arakumya Yëësu
11 Mbe,
tokatanora ukurwa Tiroa hayö na iryato,
tokaghya këmwë,
tokahika kwi-ghinga irya Saamotirake.
Hano bhwaakëëyë,
tokaghobha mu-mughi ughwa Neapoori.
12 Kukurwa hayö,
tokaghya igho,
tokahika mu-mughi omonene ghono ghwaabherekerwanga igha Firipi.
Umughi ghuyö,
ngwaarë mu-kyaro ikya Makedonia.
Ghwaaghöötërrëëywë na Abharuumi.
Tokaikara-mo sinsikö nyabhorebhe.
13 Mbe,
urusikö urwa Obhotooro tokaghya kebhara iya umughi ghuyö,
tokaghya haangʼë na omooro,
ko bhoora ntwaakanyanga igha,
hayö ho tokaanyöörrë-ho abhantö bharasaasaama Waryobha.
Hano twaahikirë-ho,
tokaanyoora abhakari bhaasangeraini-ho.
Bhëëtö bhonswe tokaikara hamwë nabho,
tokabhatëëbhya Amangʼana agha Yëësu.
14 Mo-bhantö bhano bhaatwitegherranga,
yaare-mo omokari uwöndë uwa umughi ughwa Tiyatira,
ono yaabherekerwanga igha Ridia.
Ridia m-möhönia yaarë uwa singibho sinshiiya isya erangë këësërö,
omokari uyö,
yaasookanga Waryobha.
Omonene Yëësu akaghoota enkoro iya Ridia,
enkaagha eno yaaitegherranga amangʼana ghano Pauro yaaghambanga.
Akakumya amangʼana ghayö,
akabhatiisibhwa.
15 Ho omokari uyö yaabhatiisiibhwi hamwë na abhantö abha waaye,
akatosaasaama igha,
“Nyoore bhamurë,
mörööshë igha nkumiri Omonene uwëëtö Yëësu,
ndabhasabha toghende motanaahe-ko waane.”
Akatokangʼasërrya bhököngʼu igha toghende waaye,
tokaikerrya.
Pauro bhaana Siira bharëngë mo-kebhohe
16 Mbe,
urusikö nyabhorebhe hano twaaghyanga ahasë hano abhantö bhaasengerranga Waryobha,
tokasikana-ho na umwisëkë omoghorwa.
Umwisëkë uyö,
yaarenga na risambwa irya obhoraghöri,
reno ryaamohaananga obhotoro ubhwa okoraghora.
Abhanene abhaaye,
bhaanyooranga ehoorohooro insharu ko obhoraghöri ubhwa umwisëkë uyö.
17 Umwisëkë uyö akabha araturwa nyuma,
arakora ikituri igha,
“Abhantö bhano na-bhaköri abha emeremo abha Waryobha ono akërrë bhyonswe igho,
bharabharaarekera enshera eno eraaghere möhönibhwi.”
18 Akataniatania igho sinsikö sinsharu.
Engʼana iyö,
ekaghera Pauro akarerra bhököngʼu.
Akaisyörrya mwisëkë uyö.
Akahamera risambwa riyö ryaamunyankyanga.
Akarëtëëbhya igha,
“Okohetera iriina irya Yëësu Kiristo,
c urwe ku-mwisëkë ono!”
Hayö na hayö igho,
risambwa riyö rekamohaatera.
19 Mbe,
abhanene abha umwisëkë uyö,
hano bhaarööshë igha teeho enshera iyëndë eno bharaanyoorenga ehoorohooro,
bhakaghoota Pauro bhaana Siira,
bhakabharuta okohekera hano bhaabhahikiri mo-bharasa,
ko-bhatöngi abha umughi ghuyö.
20 Bhakabhahikya ko-bhaahokania.
Bhakabhatëëbhya igha,
“Abhayahudi bhano,
bhaarëëtirë riihë rinene mu-mughi ughwëtö!
21 Bhararaareka igha,
toghoote seteemo isya waabho.
Amaraghërryö aghëëtö Abharuumi,
teghakutuna toseghoote kora ökösëröndërrya hë.”
22 Mbe,
abhantö bhano bhaaikomaini hayö,
bhakaighwa bhoghogho,
bhakarerra,
bhakaghya ko-Pauro na Siira.
Mbe,
abhaahokania bhayö,
bhakabhangʼaabhora singibho,
bhakahamera igha bhatemwe bhörrö.
23 Hano abhantö bhayö bhaamarrë okobhatema bhököngʼu,
bhakabhaseekera mu-nyumba iya ekebhohe.
Abhatöngi bhayö,
bhakakangʼasërrya ömörëndi igha,
abhanaghi bhuuya.
24 Ömörëndi akabhasöhya mönsë,
mu-kinyumba ikya ghatëghatë,
akabhatoorra ebheraangʼani ibhya ëmëtë ko-maghörö aghaabho.
25 Mbe,
mu-bhutikö ghatë,
Pauro bhaana Siira,
bhakasaasaama Waryobha,
bhakarëëtya amarëëtyö agha ökömötöönia.
Abhabhohe bharikyabho,
bhakabha bharabhaitegherra.
26 Kamwë igho ikirighiti ekenene bhököngʼu kekaheta ku-kyaro.
Inyumba iya ekebhohe iyö,
ekasingisibhwa,
kora ebhesaku bhyonswe igho,
bhekeeghoka.
Ebheraangʼani bheno bhyananërrëëywë ko bhabhohe,
bhekatashoka.
27 Ömörëndi uwa inyumba iya ekebhohe akabhooka.
Hano yaarööshë igha ebhesaku bhyëghökirë,
akaruta umushonge ughwaye,
akatuna aiyite,
ko bhoora yaakanyanga igha,
abhabhohe bhonswe igho bhangʼösirë.
28 Kasi Pauro akamokongera bhököngʼu igha,
“Uwe!
Otakiiyita!
M-bonswe igho toomono!”
29 Ömörëndi uyö akatuna setara sereetwe.
Hano setara syaarëëtirwë,
akasoha bhöngöbhöngö mu-nyumba,
akaghwera Pauro na Siira ko-maghörö ararighita.
30 Hano yaamarrë,
akabharishökya kebhara.
Akabhabhöörya igha,
“Ë,
bhare abhanene abhaane,
iyakë nkaakora nhone?”
31 Bhakamohonshora igha,
“Waryobha naraaköhöni,
hano uwe na abhantö bhaaho moraakumi Omonene Yëësu.”
32 Hayö ho Pauro bhaana Siira bhöörökërrëëyi ömörëndi uyö engʼana iya Omonene Yëësu,
hamwë na abhantö bhonswe igho bhano bhaarë waaye hayö.
33 Ömörëndi uyö,
akaghegha Pauro bhaana Siira,
ubhutikö bhuyöbhuyö,
akabhööghya amashamaaro aghaabho.
Akabhatiisibhwa hamwë na abhantö abha waaye bhonswe igho.
34 Hano yaamarrë,
akabhahira waaye,
akabhasërëënia.
Akashomerwa bhököngʼu hamwë na abhantö abhaaye bhonswe igho,
ko bhoora bhaakumiri Waryobha.
35 Mbe,
hano bhwaakëëyë,
abhatöngi bhayö bhakatoma abharugharugha abhaabho kö-mörëndi uwa inyumba iya ekebhohe,
bhamötëëbhi igha,
“Ohaatere abhantö bhayö bhaghende.”
36 Omonene uwa bharëndi uyö akatëëbhya Pauro amangʼana ghayö igha,
“Abhatöngi bhatomaini amangʼana igha,
mbahaatere,
ku bhuyö murishoke,
moghende na omorembe.”
37 Kasi Pauro akatëëbhya abhantö bhayö bhaarëëtirë amangʼana ghayö igha,
“Ndarra mbaarë bhatötëmirë bhörrö,
harabhu igho mo-bhantö,
kora bhataraatobhotorra ikiina?
Bhëëtö m-Baruumi törë!
d Bhakatoseekera mu-nyumba iya ekebhohe.
Bhoono nkutuna bharë kotohaatera bhughunyi igho?
Tekeebhe hë!
Tigha abheene bhaashe hano,
bhatohaatere!”
38 Abharugharugha bhayö,
bhakakyora,
bhakatëëbhya abhatöngi amangʼana ghayö ghonswe igho.
Hano abhatöngi bhayö bhaaighuurë igha Pauro bhaana Siira m-Baruumi,
bhakahaha bhököngʼu.
39 Ho abhatöngi bhayö bhaaishirë bhakaarra amabhoko Pauro bhaana Siira igha,
bhabhaabhere.
Bhakabharishökya ukurwa mu-nyumba iya ekebhohe iyö,
bhakabhasaasaama igha bharwe mu-mughi ghuyö.
40 Pauro bhaana Siira,
hano bhaaruurë mu-nyumba iya ekebhohe,
bhakaghya wa Ridia.
Bhakaikomania hayö na abhakumya bharikyabho,
bhakabhatërëmya.
Hano bhaamarrë,
bhakatanora.