Ghano ghaanyöörrë Pauro na Bharinaabha Iköniö
14
Hano Pauro bhaana Bharinaabha bhaahikirë Iköniö,
mbaasöhirë mu-nyumba iya esango iya Abhayahudi,
kya igho eteemo iyaabho yaarë.
Bhakëëghya-mo abhantö amangʼana agha Yëësu ko obhokarë ku bhuyö amëëghyö ghayö ghakaghira Abhayahudi abhaaru na Abhayunaani bhakakumya Yëësu.
2 Kasi Abhayahudi abhandë abhamangarru,
bhakasimya ökösëëghërrya Abhakyaro okore bhareghe abhakumya.
3 Pauro bhaana Bharinaabha bhakaghëndërrya ukwikara Iköniö hayö sinsikö sinsharu.
Bhakaraareka amangʼana agha örööbhö urwa Omonene Yëësu ko obhokarë.
Omonene Yëësu wonswe akabha arabhaimererra ko okobhahaana obhotoro ubhwa okokora amakono na ebhemanyërryö.
4 Kasi abhantö abha umughi ghuyö bhakaahokana.
Abhandë bhakabha orobhareka urwa Abhayahudi,
na abhandë urwa abhatomwa bhaara.
5 Mbe,
Abhayahudi abhandë na Abhakyaro,
hamwë na abhatöngi abhaabho,
bhakasëëmya ököröönia Pauro bhaana Bharinaabha kora bhakatuna bhabhateme na amaghena.
6 Kasi hano bhaabho Pauro bhaangʼurrë amangʼana ghayö,
bhakangʼosera mu-kyaro ikya Rikaonia,
mu-mighi ighya Risitira na Dëribhë na imighi ighyëndë gheno ghyaaheegheraini naghyo.
7 Bhakabha bhararaareka-yo Amangʼana Amaiya agha Omonene Yëësu.
Pauro bhaana Bharinaabha hano bhaarenga mu-mighi ighya Risitira na Dëribhë
8 Ryaare-ho ritengʼo mu-mughi ghuyö ghwaabherekerwanga igha Risitira.
Ömöntö uyö,
ni-tengʼo yaarë ukurwa ukwebhorwa.
9 Yaaitegherranga Pauro,
enkaagha eno yaaraarekanga engʼana iya Omonene Yëësu.
Hano Pauro yaamomaahërrëyë bhököngʼu akamanya igha naana umukumo ughwa ukuhwënibhwa.
10 Ku bhuyö Pauro akamötëëbhya bhököngʼu igha,
“Emoka!
Wemerre.”
Kamwë igho ömöntö ritengʼo uyö,
akatuumatuuma,
akasimya okoghendaghenda hayö!
11 Mbe,
hano rikomo irya abhantö bhaara bhaarööshë keno Pauro yaakörrë,
rekasherra bhököngʼu mo-keghambo ikyabho ikya Ikirikaonia igha,
“Ghano na amasambwa ghaatöbhööshökëëyë ghaana ekesosa ikya abhantö.”
12 Abhantö bhayö bhakaroka Bharinaabha igha Zeu,
a iriina irya risambwa iryabho.
Pauro we bhakamoroka igha Herima,
iriina irya risambwa iryabho iryëndë.
Mbaamörökirë igho ko bhoora we yaarë omoghambi.
13 Risengerro irya Zeu haangʼë ryaarë na umughi ghuyö.
Ku bhuyö ömösëngëri uwa Zeu akareeta seghaini na ibhirighi ibhya sensangarrya mu-bhihiita ibhya umughi ghuyö.
Ömösëngëri uyö na rikomo reera bhaatunanga bhamwensere Pauro bhaana Bharinaabha.
14 Hano abhatomwa bhayö,
Bharinaabha na Pauro bhaamanyirë keno kyaatunwanga okokorwa,
bhakatandora singibho isyabho,
ku ukwörökya igha bhabhaabhayëëyë.
Bhakakenya ukughya mu-rikomo muyö,
bharakora ikituri igha,
15 “Bhëënyu,
n-kwakë mukutuna okokora amangʼana ghano?
Bhëëtö bhonswe na-bhantö törë kya bhëënyu!
Keno tokokora,
no-kobharaarekera Amangʼana Amaiya igha,
mutighe okosengerra amasambwa kya ghayö ghataana obhoheene.
Mutighe amangʼana ghano ghataana enshera,
mobhe abhantö abha Waryobha ömöhöru.
Waryobha uyö we yaabhömbirë mu-ryobha bheena ekebhara,
sinyansha,
na ëbhëntö bhyonswe igho bheno bheemo!
16 Kare hayö,
Waryobha yaatighirë Abhakyaro bhonswe igho bhakore bhono bhaatunanga.
17 Kasi Waryobha yaabhöörökëri igha,
hamwë arë na bhëënyu ko okobhakorra amangʼana amaiya.
Arabhareetera imbura ukurwa mu-risaarö,
okore munyoore ibhyakorya ko-nkaagha iyaako,
na senkoro isyënyu sesambaaroke.”
18 Nokaanyoora Pauro bhaana Bharinaabha bhaarëbhërrëëyë rikomo irya abhantö retakabhamwensera,
kasi ne-meremo bhaakörrë.
19 Mbe,
bhakaasha-ho Abhayahudi abhandë bhano bhaarwërëëyë Antiökia na Iköniö.
Bhakangʼënërrya abhantö abha mu-mughi ughwa Risitira,
bhakaghootana hamwë,
bhakatema Pauro na amaghena.
Bhakamungʼuura ukughya kebhara iya umughi,
bharakanya igha nakuurë.
20 Kasi abheegha abhaaye hano bhaamwinaarrë akabha ghatë,
akeemoka,
akakyora mu-mughi muyö.
Hano bhwaakëëyë,
akatanora ukurwa hayö hamwë na Bharinaabha,
bhakaghya mu-mughi ughwa Dëribhë.
Pauro bhaana Bharinaabha bharakyora Antiökia
21 Mbe,
Pauro bhaana Bharinaabha bhaaraarëkëëyë abhantö abha Dëribhë Amangʼana Amaiya agha Omonene Yëësu.
Kora bhakakora-ho abheegha abhaaru këmwëkëmwë.
Mbe,
Pauro bhaana Bharinaabha bhakakyora Antiökia bharahetera mu-mighi ighya Risitira na Iköniö.
22 Bhakaheta mu-mighi ghiyö bharatërëmya abheegha abha Yëësu,
okore bhaghëndërri okobha na umukumo.
Mbaabhatërëmyanga ko okobhatëëbhya igha,
“Ni-igha tohetere mu-nyanko insharu,
totaraasoha mo-Bhokama ubhwa Waryobha.”
23 Pauro bhaana Bharinaabha bhakabha bharashaaghora abhaghaaka abhatangati abha ekanisa,
mo-makanisa ghonswe igho ghano bhaahetanga-mo.
Bhakaisasa ibhyakorya bharabhasabhera bharendwe na Omonene Yëësu ono bhaakumiri.
24 Mbe,
Pauro bhaana Bharinaabha bhakahetera mu-kyaro keno kyaabherekerwanga igha Pisidia,
bhakaghya ahasë hano haabherekerwanga igha Pamfiria.
25 Bhakahika mu-mughi ghono ghwaabherekerwanga igha Perighe bhakaraareka Amangʼana Amaiya agha Omonene Yëësu.
Hano bhaamarrë,
bhakangʼaaraara ukughya mu-mughi ghono ghwaabherekerwanga igha Ataaria.
26 Bhakariina mu-ryato ukurwa Ataaria,
bhakakyora Antiökia mu-mughi ughwa ikyaro ikya Siria.
Muyö mo abhakumya abha ekanisa bhaabhasabhëëyë örööbhö urwa Waryobha,
ko-meremo ghiyö bhaarenga bhamarrë okokora.
27 Hano bhaahikirë Antiökia,
bhakakora-ho Ikiikaro ikya ekanisa.
Bhakatëëbhya abhantö amangʼana ghonswe igho ghano Waryobha yaakörrë okohetera bho,
na kya igho yaakörëëyë Abhakyaro enshera iya ukukumya Yëësu.
28 Mbe,
abhatomwa bhayö bhakaikara hamwë na abheegha abha Yëësu Antiökia hayö ribhagha ritambë.