Bharinaabha bhaana Sauri bharatoorwa ko-meremo
13
Mbe,
mo-kanisa eno yaarenga Antiökia,
bhaare-mo abharööti na abhëëghya.
Abhantö bhayö,
m-baabho Bharinaabha,
Simeoni ono yaabherekerwanga Nighëri,
a Ruukiyö,
ono yaarwërëëyë Kirene,
Sauri,
na Manaëni ono yaakiinirë hamwë na omokama Herode Antipa.
2 Enkaagha eno bhaaisasanga ibhyakorya bharasaasaama Omonene Waryobha,
Umwika Ömöhörëëru akaghamba igha,
“Munyahorre Bharinaabha bhaana Sauri,
bhankorre emeremo gheno naabhabherekerra.”
3 Ku bhuyö hano bhaamarrë ukwisasa ibhyakoryab na okosaasaama Waryobha,
bhakabhatoorra amabhoko,
bhakabhatigha bhaghende.
Bharinaabha bhaana Sauri bharasikana na Ërima ömörööti omorongo
4 Ho Bharinaabha na Sauri bhaatömirwë na Umwika Ömöhörëëru,
bhakangʼaaraara ukughya mu-mughi ghono ghwaabherekerwanga igha,
Serukia.
Bhakatanora ukurwa hayö,
bhakariina mu-ryato,
bhakaghya kwi-ghinga irya Kiipuro.
5 Hano bhaahikirë mu-mughi ghono ghwaabherekerwanga igha Sarami,
bhakaraarekera abhantö amangʼana agha Waryobha mu-sinyumba isya esango iya Abhayahudi.
Yohana Maariko wonswe hamwë yaarë nabho arabhatöörrya emeremo.
6 Hano bhaamarrë okoheta mo-sembaara syonswe igho isya Kiipuro,
bhakahika mu-mughi ughwa Pafo.
Hayö ho bhaasikaini-ho na Umuyahudi umuturutumbi,
ömörööti uwa obhorongo.
Ömöntö uyö,
yaabherekerwanga igha,
Bhari-Yëësu.c
7 Ömörööti omorongo uyö,
yaatöörryanga ömötöngi Sërughiö Pauro.
Sërughiö uyö,
m-möntö mongʼaini bhököngʼu yaarë.
Mbe,
akabherekera Bharinaabha bhaana Sauri okore aighwe engʼana iya Waryobha.
8 Kasi Bhari-Yëësu umuturutumbi uyö (iriina iryaye mu-Kiyunaani ni-igha Ërima),
yaanyëërëëyë senkaani amangʼana agha Bharinaabha bhaana Sauri.
Tiyaatunanga ömötöngi uyö akumi Yëësu hë.
9 Mbe,
Sauri ono yaabherekerwanga igha Pauro,
d okanyoora aishööyë Umwika Ömöhörëëru,
akamoghorra bhököngʼu Ërima amaiso,
akamötëëbhya igha,
10 “Uwe ore omoona uwa Oghosambwa!
Umubhisa uwa obhoheene bhwonswe igho!
No-bhorongo ubhwenebhwene bhökökösëëbhësya orangʼaina abhantö.
Nkusyörya örë amangʼana agha enshera ëndöngë iya öbhöhöru iya Omonene Waryobha,
igha m-borongo!
11 Ku bhuyö bhoono uwe,
Omonene Waryobha,
naraakushibhi uhukure.
Akabhagha nkaraahete-ho otakomaaha kyokyonswe keera.”
Ërima amaiso ghakamwama kamwë igho,
indumbë ekamukundikirya,
akabha mu-kisuntë atakomaaha.
Akahuunahuuna aratuna ömöntö amoraahuune.
12 Hano ömötöngi Sërughiö Pauro yaarööshë rikono riyö,
akakumya Omonene Yëësu.
Akaroghoorra amëëghyö agha amangʼana agha Yëësu.
Pauro bhaana Bharinaabha mu-mughi ughwa Pisidia
13 Ho Pauro na bharikyaye bhaatanööyë ukurwa Pafo hayö,
bhakariina mu-ryato,
bhakaghya mu-mughi ghono ghwaabherekerwanga igha Perighe,
mu-kyaro ikya Pamfiria.
Yohana Maariko akabhatigha hayö,
akakyora Yërusarëëmu.
14 Kasi Pauro bhaana Bharinaabha bhakatanora ukurwa Perighe,
bhakaghëndërrya na oroghendo urwabho,
bhakahika mu-mughi ughwa Antiökia ku-kyaro ikya Pisidia.
Urusikö urwa Obhotooroe bhakasoha mu-nyumba iya esango iya Abhayahudi,
bhakaikara.
15 Hano amangʼana ukurwa mo-maraghërryö agha Mosa na mo-bhetabho ibhya abharööti ghaamarrwe okosomwa,
abhanene abha inyumba iya esango iya Abhayahudi iyö,
bhakaherra amangʼana bhaabho Pauro igha,
“Nyoore bhamurë moona engʼana iya ökötërëmya abhantö bhano,
mogheghambe.”
16 Mbe,
Pauro akeemoka,
akabhainyökërya okobhoko okore bhamwitegherre.
Akabhatëëbhya igha,
“Bhëënyu bhare Abhaisiraëri,
na Abhakyaro bhano mokosooka Waryobha,
munyitegherre!
17 Waryobha uwa Abhaisiraëri,
we yaashaaghööyë abhakörö abhëëtö,
akabhakora bhaaruhe mu-kyaro enkaagha eno bhaarenga abhaghëni mu-kyaro kya Miisiri.
Akabharuusya-yo ko obhotoro ubhwaye.
18 Akabhaghömërrya ku-riköngö imyoka merongo ene.
19 Hano yaamarrë ukusikya amakabhira muhungatë mu-kyaro ikya Kaanaani,
akahaana abhakörö abhëëtö ikyaro kiyö,
kebhe umwandö ughwabho.
20 Amangʼana ghayö ghonswe igho,
ngaaikörrë ku-ribhagha irya imyoka kya amaghana ane na merongo etaano igho.
“Ho Waryobha yaamarrë,
akahaana abhakörö abhëëtö abhantö abha okobhaahokania okore bhabhatangate.
Bhakabhatangata igho okohekera enkaagha eno ömörööti Samwëri yaabhatangatirë.
21 Mbe,
abhakörö abhëëtö bhayö bhakasabha Waryobha abhahaane omokama.
Waryobha akabhahaana Sauri umumura uwa Kishi,
uwa ekabhira iya Bhenjamini.
Sauri uyö,
yaatöngirë imyoka merongo ene.
22 Hano Waryobha yaaruusiri-ho Sauri,
akatoora-ho Daudi,
abhe omokama uwaabho.
Waryobha akaghamba igha,
‘Ndööshë Daudi mumura uwa Yeese,
antëghëëyi,
uyö we araakore bhono nkutuna.’f
23 “Ukurwera mu-bhuhiiri Daudi muyö,
mo Waryobha yaarëëtëëyë Abhaisiraëri Ömötöörya Yëësu kya bhoora yaaraghaini.
24 Enkaagha eno waanyöörrë Yëësu ataraasimya okokora emeremo ghyaye,
Yohana yaaraarekeranga Abhaisiraëri bhonswe igho igha,
bhahongore ëbhëbhë ibhyabho,
bhakyore ku-Waryobha,
bhabhatiisibhwi.
25 Hano Yohana yaarenga haangʼë okomara emeremo ighyaye,
akabhöörya igha,
‘Kana bhamurë,
bhëënyu nkokanya mörë igha nö-öni wë?
Öni tëndëngë Kiristo ono mokoghanyerra hë!
Mwighwe mbe mbatëëbhi!
Kiristo uyö,
naraandwe nyuma.
Öni kora tiningʼarëëyi okotashora siinuugha isya ebheraatö ibhyaye hë.’g
26 “Abhahiiri abhaane,
abheebhorwa Ibhurahimu na bhëënyu Abhakyaro bhano mokosooka Waryobha,
engʼana eno iya ököhönia nkö-bhëëtö yaarëëtirwë!
27 Abhantö abha Yërusarëëmu na abhatöngi abhaabho,
tebhaamanyirë igha,
Yëësu uyö,
we abharööti bhaashumaasheranga ko-Maandeko ghano bhaasomanga kera urusikö urwa Obhotooro.
Ku bhuyö bhakahekerania amaandeko ghayö,
ko okomobhotorra ikiina igha aitwe.
28 Nokaanyoora tebhaarööshë risoro ryoryonswe reera hë,
kasi bhakasabha Piraato amobhotorre ikiina igha aitwe.
29 “Hano bhaamarrë okokora ghonswe igho ghano Yëësu yaandëkëëywë,
bhakamwikya ukurwa ko-mosarabha,
bhakamobheeka mo-mbeehera.
30 Kasi Waryobha akamuryökya ukurwa mo-bhaku.
31 Sinsikö sinsharu,
Yëësu yaabhooshokeranga abhantö bhano bhaahinaini nawe Yërusarëëmu ukurwa mo-mokowa ughwa Ghariraaya.
Abhantö bhayö,
mbo abhaimërërri abha amangʼana ghaaye ko-bhantö.
32 “Ku bhuyö bhëëtö hano nkobharaarekera törë Amangʼana Amaiya ghano Waryobha yaaraghaini ko-bhakörö bhëëtö.h
33 Ghayö ngo Waryobha ahekeraini kö-bhëëtö,
ku ukuryökya Yëësu.
Akörrë kya bhono Ezabhuri iya kabhërë yandëkirwë.
Yandëkirwë igha,
‘Uwe nu-uwe Omoona uwaane,
öni reero mbaayë Suwëënyu.’i
34 “Waryobha yaaryökëri Yëësu ukurwa mo-bhaku,
okore ömöbhërë ughwaye,
ghotakaghunda.
Amangʼana ghayö,
Waryobha yaashumaashëëyë igha,
‘Naaraghaini Daudi obhongʼoore öbhöhörëëru ubhwa obhoheene.
Obhongʼoore bhuyö,
mbo ndaabhahaane.’j
35 “Na ghwiki engʼana iyö,
yandekwa ahasë ahandë mo-ketabho ikya Ezabhuri igha,
‘Tuwikërri ömöbhërë ughwa Ömöhörëëru uwaaho ghughunde hë.’k”
36 Pauro akaghëndërrya okobhatëëbhya igha,
“Hano Daudi yaamarrë okokora ghonswe igho ghano Waryobha yaatunanga akore ko-nkaagha iya rikora iryaye,
akaheta akakwa,
akabheekwa hano abhakörö abhaaye bhaabhëëkirwë.
Ömöbhërë ughwaye ghwaghunda.
37 Kasi ono Waryobha yaaryökëri,
umwene ömöbhërë ughwaye,
teghwaghundirë hë.
38 “Bhoono mbe bhahiiri abhaane,
momanye bhuuya ghayö tokobharaarekera igha,
ko okohetera Yëësu,
abhantö nkwabherwa bharë ëbhëbhë bhyabho.
39 Ömöntö wowonswe igho ono akumukumya,
nkokorwa arë na Waryobha abha ömöntö uwa heene.
Engʼana iyö amaraghërryö agha Mosa,
teghaaghetoranga hë.
40 Ku bhuyö mwangarre,
okore amangʼana ghano ghandëkirwë mo-bhetabho ibhya abharööti,
ghatakaabhanyoora,
41 ‘Bhëënyu bhare abhasëri,
mwangarre!
Moroghoore musike.
Ko bhoora engʼana eno ndaakore ku-sinsikö isyënyu seno,
kora ömöntö nakaabhatëëbhya timuukumi hë!’l ”
42 Pauro bhaana Bharinaabha,
hano bhaarishokanga mu-nyumba iya esango iya Abhayahudi,
abhantö bhakabhasaasaama igha,
bhakyore urusikö urwa Obhotooro ruyö rokaarööbhëëyë,
okore ghwiki bhabhatëëbhi amangʼana ghayö.
43 Hano esango iya Abhayahudi iyö yaaraaröökirë,
Abhayahudi abhaaru hamwë na abhantö bhano bhaasoha mu-diini iya Ikiyahudi,
bhakasoorana Pauro bhaana Bharinaabha.
Abhatomwa bhayö,
bhakashumaasha nabho ko okobharuta na amangʼana,
okore bhanaghe mö-rööbhö urwa Waryobha.
44 Urusikö urwa Obhotooro ubhwa kabhërë hano rwaahikirë,
abhantö abha mu-mughi ghuyö,
bhakahona ukuhwera-ho bhonswe igho ukwitegherra amangʼana agha Omonene Yëësu.
45 Hano Abhayahudi bhaarööshë igha abhantö m-baaru bhököngʼu bhaaikomaini ukwitegherra abhatomwa bhayö,
bhakakorra abhatomwa bhayö rikenge.
Ku bhuyö bhakabha bharabhanyeera senkaani ko mangʼana ghonswe igho ghano Pauro yaaghambanga,
na okobhatoka.
46 Pauro bhaana Bharinaabha,
bhakabhahonshora ko obhokarë igha,
“Yaarë igha motangate okoraarekerwa amangʼana agha Waryobha.
Kasi ko bhono bhëënyu abheene mwangirë,
moraimaaha igha timwingʼarëëyi öbhöhöru ubhwa amakora ghonswe igho hë,
tigha mbe bhoono bhëëtö twisyöri okoraarekera Abhakyaro.
47 Ko bhoora Omonene Waryobha yaatoraghërrëëyi igha,
‘Öni naakotoora-ho obhe obhorabhu ko-Bhakyaro,
obhe Ömöhönia uwa abhantö ko-kebhara kyonswe igho.’m”
48 Hano Abhakyaro bhaaighuurë igho,
bhakashomerwa.
Bhakakumya amangʼana agha Omonene Yëësu.
Bhonswe igho bhano bhaaitengʼerwanga ukunyoora öbhöhöru ubhwa amakora ghonswe igho,
mbaakumiri Omonene Yëësu.
49 Amangʼana agha Omonene Yëësu ngaaromaini ku-kyaro kiyö kyonswe igho.
50 Kasi Abhayahudi bhakasëëghërrya abhakari Abhakyaro bhano bhaasookwanga.
Abhakari bhayö,
m-bano bhaasöhirë mu-diini iya Ikiyahudi.
Bhakasëëghërrya na abhatangati abha umughi ghuyö,
bhakanyankya Pauro bhaana Bharinaabha,
kora bhakabharughya ukurwa hayö.
51 Mbe,
Pauro bhaana Bharinaabha,
bhakakongʼonta urutu ko-maghörö aghaabho,
n ukwörökya igha,
Waryobha abhaangirë.
Bhakaheta ukughya mu-mughi ghono ghwaabherekerwanga igha,
Iköniö.
52 Kasi abheegha abha Yëësu,
bho bhakashomerwa bhököngʼu,
bhakaghëndërrya okotangatwa na Umwika Ömöhörëëru.