Mpabilini à fyèe baani láha yyecyiige na
6
Ɲyɛ sémɛweŋke fyèebii baashuunniŋi i,
ka mii i Mpabilini ɲya lʼà niɲcyiiŋi láha.
Ɲyii yaayi sicyɛɛreŋi i,
ka mii i kuru kà niŋkin ɲya kʼà jwo fànha na mu à jwo kileŋi u à tîn,
na:
«Pa naha!»
2 Ka mii i wílʼa shɔnfyinge ɲya,
sintaaga mpyi ku fèvooŋi cye e.
Kajaɲjwoo nintoŋɔ mpyi a kan u á,
ka u kajaŋguŋi si ŋkàre si sà mpyi kajaŋa sahaŋki.
3 Mpabilini à fyèŋi shɔnwuŋi láha sémɛweŋke na ke,
ka ɲyii yaage shɔnwoge si jwo:
«Pa naha!»
4 Ɲyɛ ka shɔnge kabɛrɛ si fworo.
Kuru mpyi a ɲáaŋa.
Fànhe mpyi a kan ku fèvooŋʼá u yyeɲiŋke kwɔ̀ ɲìŋke na,
bà sùpyire si mpyi sʼa tiye bùu mɛ.
Kàshikwɔnŋwɔtɔɔngɔ mpyi a kan u á.
5 Tèni i Mpabilini à fyèŋi tanrewuŋi láha ke,
ka ɲyii yaage tanrawoge si jwo:
«Pa naha!»
Ka mii i shɔngɔ niŋgwɔhɔ ɲya kʼà fworo.
Ŋge u mpyi ku ɲuŋʼi ke,
paanni mpyi uru cye e.
6 Ka tùnmɔ si fworo sùpya mɛjwuu fiige ɲyii yaayi sicyɛɛreŋi shwɔhɔlʼe na:
«Mɔ̀ɔŋi paanni ɲyɛge niŋkinŋi na ɲyɛ shin niŋkin canmpuŋɔ báara sàra.
Kàlage paanni ɲyɛyi taanreŋi mú na ɲyɛ amuni.
Ŋka ma hà sìnmpe ná ɛrɛzɛn sinmpe kɛ̀ɛge mɛ.»
7 Ɲyɛ Mpabilini à fyèŋi sicyɛrewuŋi láha ke,
ka mii i ɲyii yaage sicyɛrewoge ɲya kʼà jwo:
«Pa naha!»
8 Ɲyɛ ka mii i shɔngɔ nishwushwugo ɲya.
Ŋge u mpyi ku ɲuŋʼi ke,
uru mɛge ku ɲyɛ Kwùŋi.
Ɲìŋke ɲwɔhɔ shiinbii cyage mpyi a taha u fye e.
Mu aha diɲyɛŋi sùpyire táa tataaya sicyɛɛre,
fànhe mpyi a kan pi á,
pi taaga niŋkin bò ná kàshikwɔnŋwɔɔni ná katege ná yampimpe ná ɲìŋke sige yapiyi i.
9 Ɲyɛ Mpabilini à fyèŋi kaŋkuro wuŋi láha ke,
mpii pi mpyi a bò Kile jwumpe ná pu ɲjwuŋi kurugo ke,
ka mii i pire múnahigii ɲya sárayi tawwuge ɲwɔhʼi.
10 Pi mpyi na ŋko fànha na:
«Wuu Kafooŋi niɲcɛnŋi ná sèe wuŋi,
ɲaha tère mu ɲyɛ na sigili si diɲyɛ sùpyire yíbe wuu mbòŋi kyaa na,
si li fwooni tò pi na yɛ?»
11 Ka vàanntinmbwɔhɔ nivyinge si ŋkan pi shin maha shin á,
maa pi pyi pi funɲyi ɲíŋɛ sahaŋki tère nimbilere e fo pi báarapyiɲɛɛbii ná cìnmpyiibii pi sí n-bò pi fiige ke,
pire dáŋi ká fûnŋɔ.
12 Ɲyɛ Mpabilini à fyèŋi baani wuŋi láha ke,
ka mii i ɲìŋke ɲya kʼà cyɛ̂ɛnnɛ sèlʼe.
Ka canŋaɲyiini si wwɔ̀ diri,
ka yiŋke si ɲáaŋa mu à jwo sìshan.
13 Ka wɔrigii si yîri nìɲyiŋi i mà pa ɲcwo ɲcwo ɲìŋke na mu à jwo kafeebwɔhɔ kʼà fizhiye cige nimpimbaaga ɲâhara a wwû.
14 Ka nìɲyiŋi si myígilʼa lwɔ́ wani,
bà wà maha sémɛweŋɛ myígile mɛ.
Ɲaɲyi ná kìripyɛɛre ti ɲyɛ suumpe lwɔhe niŋke e ke,
ka yire puni si ɲcúnŋɔ ɲcúnŋʼa lwɔ́ yi tatɛɛnyʼe.
15 Ka ɲìŋke saanbii ná fànhafeebii ná kàshikwɔɔnbii ɲùŋufeebii ná nàfuufeebii ná sifeebii ná diɲyɛ sùpyire sannte puni,
bilibii bâra mpii pi ɲyɛ pi ɲyɛ bilii mɛ,
ka pire puni si ŋwɔhɔ ɲaŋgyiyi ná kafawyiyʼe.
16 Pi mpyi na ŋko ɲaɲyi ná kafaayʼá:
«Yii cwo wuu ɲuŋʼi,
yii wuu ŋwɔhɔ saanre yatɛɛnŋke tɛɛnfooŋi yyaha na,
ná Mpabilini lùyirini yyaha na.
17 Ɲaha na yɛ pi lùyirini canmbwɔhe kʼà nɔ niɲjaa,
jofoo u si n‑jà n‑shwɔ yɛ?»