Mpabilini ná sémɛweŋke kani
5
Ɲyɛ ŋge u mpyi a tɛ̀ɛn saanre yatɛɛnŋke e ke,
ka mii i sémɛweŋɛ nimbwɔhɔ ɲya kʼà myígile uru kàniŋɛ cyɛge e.
Sémɛre mpyi ku kàmpanɲyi shuunniŋi na,
maa ku ɲwɔ tò ná fyèe baashuunni i.
2 Ka mii i Kile mɛ̀lɛkɛ fanhaɲyahaga wu ɲya u u yu fànha na:
«Jofoo u à yaa ná fyèebii ndàhaŋi i si sémɛŋi ɲwɔ múgo yɛ?»
3 Ŋka wà ɲyɛ a ta nìɲyiŋi ná ɲìŋke ná ɲìŋke ɲwɔhʼi,
ŋgemu u sí n‑jà sémɛŋi ɲwɔ múgo si u funŋke wíi mɛ.
4 Ka mii i mɛɛ sú sèlʼe,
ɲaha na yɛ sùpya ɲyɛ a ta ŋgemu u à yaa ná sémɛŋi mùgoŋi i,
si u funŋke wíi mɛ.
5 Ka kacwɔnrɔŋi wà niŋkin si mii pyi:
«Ma hà raa mɛɛ súu mɛ.
Zhuda tùluge shinŋi u ɲyɛ mu à jwo cànraga,
maa mpyi saanŋi Dawuda ɲampyige ke,
yii li cè na kurʼà pyi javoo.
Lire e,
ku sí n‑jà fyèebii baashuunniŋi láha,
si sémɛŋi ɲwɔ múgo.»
6 Ɲyɛ ka mii i Mpabili ɲya lʼà yyére saanre yatɛɛnŋke yyaha yyére,
ɲyii yaayi sicyɛɛreŋi ná kacwɔnribii shwɔhɔlʼe.
Li mpyi mu à jwo lʼà bò mà pyi sáraga.
Ɲɛ̀ŋii baashuunni mpyi lʼá,
ná ɲyii baashuunni,
cyire cyi ɲyɛ Kile múnahigii baashuunniŋi cyi à tùugo diɲyɛŋi cyeyi puni i ke.
7 Ka Mpabilini si file maa sémɛŋi shwɔ saanre yatɛɛnŋke tɛɛnfooŋi kàniŋɛ cyɛge e.
8 Lirʼà pyi ke,
ka ɲyii yaayi sicyɛɛreŋi ná kacwɔnribii beɲjaaga ná sicyɛɛreŋi si piye tîrigʼa cyán Mpabilini á.
Pi shin maha shin mpyi ná ŋkɔ̀nnʼi,
mà bâra sɛɛn ŋkunahii,
cyire puni mpyi a ɲî wusuna nùguntanga wu na.
Ɲareyi Kile wuubii maha mpyi ke,
yire yi mpyi uru wusunaŋi.
9 Pi mpyi na mɛɛ nivɔnnɔ cêe na:
«Mu u à yaa ná ŋke sémɛweŋke zhwoŋi i,
si ku fyèebii láha,
ɲaha na yɛ mu à bò mà pyi sáraga,
maa sùpyire tà ɲùŋɔ wwû ná ma sìshange e mà pyi Kile wuu,
tùluyi puni ná shɛɛnre puni ná supyishiŋi puni ná kìrigii puni i.
10 Mu à pi pyi saanlii ná sáragawwuu,
bà pi si mpyi sʼa báare Kile á,
si mpyi ɲùŋufente e ɲìŋke na mɛ.»
11 Lire kàntugo ka mii i Kile mɛ̀lɛkɛɛ miliyoo niɲyahaɲyahamii mɛɛ lógo.
Pi mpyi a saanre yatɛɛnŋke ná ɲyii yaayi ná kacwɔnribii kwûulo.
12 Pi mpyi na ŋko fànha na:
«Mpabilini lʼà bò mà pyi sáraga ke,
lire lʼà yaa ná sífente ná yaarafente ná yákilifente ná fànhe
ná pèente ná sìnampe ná ŋkèeŋi i.»
13 Yaaga maha yaaga kʼà dá nìɲyiŋi ná ɲìŋke ná ɲìŋke ɲwɔhʼi ná lwɔhe e ná yaaga maha yaaga ku ɲyɛ ke,
ka mii i yire puni ɲya yi i mɛɛ cêe na:
«Ŋkèeŋi ná pèente ná sìnampe ná fànhafente ti pyi saanre yatɛɛnŋke tɛɛnfooŋi ná Mpabilini woro,
fo tèekwombaa!»
14 Ɲyii yaayi sicyɛɛreŋi mpyi na ŋko:
«Amiina».
Ka kacwɔnribii si piye tîrigʼa cyán,
maa saanre yatɛɛnŋke tɛɛnfooŋi ná Mpabilini pêe.