Yii àha ɲcwô Yesu jwumpe e mɛ
2
Lire e jwumpe wuu à lógo ke,
wuu yákili yaha pu na sèlʼe,
lire baare e kuni sí n‑pînni wuu na.
2 Kile mɛ̀lɛkɛɛbii mpyi a jwumpe mpemu jwo kea,
puru mpyi a tàra.
Mpii pi ɲyɛ pi mpyi a puru jwumpe cû ná sèlʼe,
lire ɲyɛ mɛ mà cyé pu na ke,
Kile à pire puni sâra mà tàanna ná pi kapyiini i.
3 Ɲyɛ jwumpe pʼà jwo múnahigii zhwoŋi kyaa na ke,
wuu à puru lógo.
Purʼà fànha tò mɛ̀lɛkɛɛbii wumpe na.
Wuu aha mpyi wuu ɲyɛ a puru cû ná wuu cyeyi shuunniŋi i mɛ,
nde lʼà yaa li pyi wuu na ke,
Kile sí lire pyi wuu na mú.
Kafooŋi yabiliŋi u à fyânha a puru jwumpe jwo,
mpii pi à pu lógo ke,
pirʼà jwo na nàkaana ɲyɛ a sìi pʼe mɛ.
4 Ka Kile yabiliŋi si li cyêe na pi jwumpe na ɲyɛ sèe,
kacyeeŋkii ná kakyanhala karigii ná kabwɔhigii ná Kile Munaani màkanyi cye kurugo,
u à yire ɲjemu kan sùpyirʼá mà tàanna ná u ɲyii wuuni i ke.
Yesu cye kurugo Kile maha sùpyaŋi shwɔ
5 Ɲyɛ diɲyɛŋi nimpaŋi kyaa wuu ɲyɛ na yu ke,
mɛ̀lɛkɛɛbilʼá bà Kile à uru ɲùŋufente kan mɛ.
6 Yii li cè na yʼà sémɛ Kile Jwumpe Semɛŋi i na:
«Sùpyaŋi ɲyɛ ɲaha shi fo mu à yákili yaha u na yɛ?
Adama pyàŋi ɲyɛ ɲaha shi fo mu na u kàanmucaa yɛ?
7 Mu à u pyi u tayyérege ɲyɛ a mɛ̀lɛkɛɛbii woge kwɔ̀ sèlʼe mɛb,
mu à pèente ná fànhe kan u á maa ɲjire taha u na.
8 Mu à yaayi puni tîrigʼa cyán u ác.»
Kile à yaayi puni tîrigʼa cyán u á,
lire ɲwɔhe ku ɲyɛ,
yafyin ɲyɛ u ɲùŋɔ na mɛ.
Lire ná li wuuni mú i,
wuu à li ɲya na yaayi puni sàha ŋkwɔ̀ a yiye tîrige u á mɛ.
9 Ŋka wuu à ndemu kàanmucya ke,
lire li ɲyɛ:
Yesu mpyi a tîrige mɛ̀lɛkɛɛbii ɲwɔhʼi mà tère nimbilere pyi,
bà u si mpyi si ŋkwû sùpyire puni cyaga Kile kacɛnni kurugo mɛ.
Numɛ,
pèente ná ɲjini saanwa maha nta ke,
u à yire ta,
ɲaha na yɛ u à kyaala maa ŋkwû wuu kurugo.
10 Kile à yaayi puni yaa uye wuyo.
Lire kurugo li mpyi a ɲwɔ na Yesu u kyaala,
bà u si mpyi si shinɲyahara pyi ti pyi shinbwoo u yyére mɛ.
Kyaage cye kurugo,
Yesu à pyi ɲùŋufoo niɲcɛnŋɛ,
ŋgemu u à jà a kuni múgo shinɲyahara á,
bà ti si mpyi si nùmpanŋa ta mɛ.
11 Yesu u maha sùpyire fíniŋi Kile yyahe taan,
u aha mpiimu fíniŋɛ ke,
u ná pire maha mpyi Tu na,
lire kurugo u ɲyɛ a cwɔ̂nrɔ sʼa pi pyi u cìnmpyiibii mɛ.
12 Lire e u à jwo Kile á:
«Mii sí mu mɛge kêe na cìnmpyiibilʼá,
mii sí mu mɛge pêe mu wuubii shwɔhɔlʼed.»
13 U à jwo mú na:
«Mii kɔni,
mii sì na sɔ̀nŋɔre láha Kile na mɛe»
maa núrʼà jwo:
«Pyìibii Kile à kan mii á ke,
mii ná pire pi mpiif.»
14 Ɲyɛ Yesu à pire mpiimu pyi pi à nùmpanŋa ta ke,
pire na ɲyɛ sùpyii,
lire kurugo Yesu mú à pyi sùpya.
U à lire pyi bà li si mpyi,
u kwùŋi cye kurugo,
Sitaanniŋi cye e kwùŋi fànhe ɲyɛ ke,
si uru fànhe kwɔ̀,
15 mpii pi mpyi u bilere e kwùŋi fyagare na pi shìŋi canmpyaagilʼe ke,
si pire ɲùŋɔ wwû mɛ.
16 Sèeŋi na,
Yesu ɲyɛ a pa mpa mɛ̀lɛkɛɛbii tɛ̀gɛ mɛ,
u à pa mpa Ibirayima tùluge shiinbii tɛ̀gɛ.
17 Lire kurugo fànha ku mpyi ku ki,
u sàa pa sùpya u cìnmpyiibii fiige karigii puni i,
bà u si mpyi si mpyi Kile sáragawwuɲuŋufembwɔhɔ,
ŋkemu ɲùɲaare tʼà pêe,
maa báaraŋi pyi na ɲwɔge Kile á,
maa sùpyire kapegigii tugure lwɔ́ mɛ.
18 Ɲyɛ ná u sʼà tòro ɲwɔwwuure kyaage e,
lire e mpii pi ɲyɛ kʼe numɛ ke,
u sí n‑jà pire tɛ̀gɛ.