Yesu à fànha tò Kile tùnntunŋi Musa na
3
Lire e ke mii cìnmpyiibii,
yii Kile à yyére mà pyi uye wuu ke,
yii a Yesu wíi.
Wuu Kile kuni i,
uru u ɲyɛ Kile tùnntunŋi ná Kile sáragawwuɲuŋufembwɔhe.
2 Yesu à báaraŋi pyi u yyerefooŋʼá ná ɲwɔmɛɛfente e,
bà Musa à u pyi Kile pyɛngɛ shiinbilʼá mɛ.
3-6 Ɲyɛ baga maha baga,
ku ná ku faanrafooŋi u ɲyɛ,
yaayi puni Davooŋi sí u ɲyɛ Kile.
Ɲyɛ bage faanrafooŋi na ɲyɛ ná ɲjire e mà tòro bage na.
Lire pyiŋkanni ninuuni na,
Kile Jyaŋi Yesu Kirisita u ɲyɛ bafaanraŋi wwoɲɛɛŋi sèe wuŋi,
maa mpyi bage ɲùŋufooŋi ke,
uru na ɲyɛ ná ɲjire e mà tòro Musa na.
Musa mú à báaraŋi pyi ná sèlʼe kuru bage e.
Lire e u mpyi báarapyi kanna.
Karigii Kile mpyi na sí n‑pa n‑pyi ke,
u báaraŋi u mpyi na cyire yyaha yu sùpyirʼá.
Wuu aha wuye waha maa wuu sɔ̀nŋɔre taha Kafooŋi na fyagara baa ná funntange e mà sà nɔ tɛgɛni na,
wuu sí n‑pyi u bage.
Taŋɔŋke kʼà bégelʼa yaha Kile wuubii mɛɛ na ke
7 Lire e Kile Munaani à jwo:
«Yii aha Kile mɛjwuuni lógo niɲjaa,
8 yii àha yii niŋgyigigii waha,
bà yii tulyeyʼà cyé Kile na síwage e,
maa u ɲwɔ cû mɛ.
9 Kuru cyage e,
yii tulyeyʼà jwo na yire sí mii Kile ɲwɔ cû,
mà li ta pi à mii kapyiiŋkii ɲya fo yyee beeshuunni.
10 Lire lʼà mii lùuni yîrige pi taan,
ka mii i jwo “Pi yabilimpii sɔ̀nŋɔre ti ɲyɛ na pi wuruge tèrigii puni i,
kuni mii la ɲyɛ pi lwɔ́ ke,
pi ɲyɛ a cè mɛ.”
11 Lire e mii lùyiri wuŋʼà kâa
“Taŋɔŋke mii à bégelʼa yaha pi yyaha na ke,
pi saha sì n‑sìi n‑jyè kurʼe mɛa.”»
12 Mii cìnmpyiibii,
yii yiye kàanmucya,
sùpya kà n‑sìi ta yii e,
pege ná dánabaare zòŋi ɲyɛ ŋgemu i fo si sà nɔ u cyé Kile ɲyii wuŋi na mɛ.
13 Lire e ke canmbile maha canmbile wuu sí n‑jà n‑yyere:
«niɲjaa» ke,
yii a yiye yɛrɛge cyire e,
bà kapegigii mpyiŋi lage si mpyi kʼàha yii wà wurugo si u niŋgyiini pyi li waha mɛ.
14 Wuu aha sàa kwôro Kile kuni i mà lwɔ́ tasiige e fo mà sà nɔ tɛgɛni na,
wuu à pyi Kirisita wwoɲɛɛ.
15 Yʼà jwo Kile Jwumpe Semɛŋi i na:
«Yii aha Kile mɛjwuuni lógo niɲjaa,
yii àha yii niŋgyigigii waha,
bà yii tulyeyʼà ɲùŋɔ kyán Kile na mɛb.»
16 Ɲyɛ mpire pi à ɲùŋɔ kyán Kile na u mɛjwuuni lógoŋkwooni kàntugo yɛ?
Musa à mpiimu yyaha cû a fworo Misira kìni i ke,
tá pire bà mɛ?
17 Mpire taan Kile lùuni mpyi a yîri yyee beeshuunni funŋʼi yɛ?
Mpii pi mpyi a kapiini pyi fo pi à kwû síwage e ke,
tá pire bà mɛ?
18 Mpire kyaa na Kile à kâa na pi sì n‑jyè uru taŋɔŋke e mà yɛ?
Mpii pi à cyé u na ke,
tá pire bà mɛ?
19 Lire pyiŋkanni na,
mii cìnmpyiibii,
wuu à li ɲya na pi dánabaare kurugo,
pi ɲyɛ a jà a jyè kuru taŋɔŋke e mɛ.