5
Lire e ná yii kyaa sʼà táan yii Tuŋi Kile á,
yii a u pyiŋkanni taanni.
2 Yii a yii karigii puni pyi tàange funŋke e,
bà Kirisita yabiliŋʼà wuu kyaa táan uyʼá fo mà uye kan kwùŋʼá wuu kurugo,
mà pyi sáraga ŋkemu kʼà táan Kile á ke.
3 Lire kurugo jacwɔɔre ná kaɲwɔhɔyi shiŋi puni ná funmbwɔhe,
cyire karigii pyifoo ɲyɛ a sàa yaa u ta yii shwɔhɔlʼe mɛ.
Ɲaha kurugo yɛ Kile wuubii ɲyɛ a yaa pi a cyire karigii pyi mɛ.
4 Lʼà pyi silege baa jwumɔ yo,
lʼà pyi ɲùŋɔ baa jwumɔ yo,
lʼà pyi keetupwɔhɔya yo,
puru pà mú ɲyɛ a yaa pʼa fwore yii ɲwɔyi i mɛ,
fo Kile fwùŋi kanni.
5 Yii li cè na jacwoobii ná katupwɔhɔyi pyifeebii ná funmbwɔhe feebii,
pire wà tufiige nàzhan ɲyɛ a sìi Kirisita ná Kile Saanre e mɛ.
Funmbwɔhe ná kacyinzunnʼà tàanna.
6 Mpii pi à ɲùŋɔ kyán Kile na ke,
cyire karigii cyi maha u lùuni pyi lʼà yîri pire taan.
Lire e yii àha n‑sìi wà yaha u yii ɲwɔ fáanŋa a wurugo ná laaga baa jwumʼi mɛ.
7 Yii àha ŋgwɔ̀ ná pire mpilʼe kyaa na mɛ.
8 Yii li cè na tèni lʼe,
yii mpyi numpini i,
ŋka numɛ,
Kafooŋi wwoɲɛɛge cye kurugo,
yii ɲyɛ bɛ̀ɛnmpe e.
Lire e ke yii a ɲaare bɛ̀ɛnmpe sùpyiibii ɲaaraŋkanni na,
9 ɲaha na yɛ shinŋi u ɲyɛ na ɲaare bɛ̀ɛnmpe e ke,
urufoo kapyiiŋkii maha mpyi kacɛnŋkii ná katiigii ná sèejwuuni.
10 Yii yiye waha nde lʼà táan Kafooŋi á ke,
yii i lire cya a cè.
11 Numpini karigii ɲyɛ ná nàfan e mɛ.
Yii àha raa cyi pyi mɛ,
yii bá à yaa yii a cyi yige bɛ̀ɛnmpe na.
12 Karigii tire sùpyire ɲyɛ na mpyi numpini i ke,
cyire ɲjwuŋi mú bá à sìi silege.
13 Yii li cè na kyaa maha kyaa ɲwɔhɔ kʼà múgo ke,
lire maha fworo bɛ̀ɛnmpe na.
14 Kyaa maha kyaa sí lʼà fworo bɛ̀ɛnmpe na ke,
lire yyaha maha ɲcè.
Lire kurugo yʼà jwo:
«Mu u ɲyɛ na ŋwúuni ke,
yîri ŋɔɔmpe na,
ɲɛ̀ a fworo kwùubii shwɔhɔlʼe,
Kirisita sí bɛ̀ɛnmpe yige mu á.»
15 Ɲyɛ yii a yiye kàanmucaa,
yii i yii toroŋkanni cè.
Yii àha mpyi yákili baa shiin mɛ,
ŋka yii pyi yákilifee.
16 Tèni li ɲyɛ yii á ke,
yii yiye waha yii raa kacɛnŋii pyi,
ɲaha kurugo yɛ tìiŋʼà kɛ̀ɛge.
17 Lire kurugo yii àha mpyi funŋɔ baa shiin mɛ,
ŋka nde li ɲyɛ Kafooŋi ɲyii wuuni ke,
yii lire cya a cè.
18 Yii àha sinmpe bya si mɛ́ɛ mɛ,
lire maha sùpyaŋi yaha silege baa karigii mpyiŋi na,
ŋka yii ɲî Kile Munaani na tèrigii puni i.
19 Yii a màban leni yiye e ná Zaburu sémɛŋi myahigii ná Kile pèente myahigii ná Kile kuni myahigilʼe.
Yii a Kafooŋi pêre cyire myahigilʼe ná yii zòmpyaagii puni i.
20 Yii a fwù kaan Tufooŋi Kile á tèrigii puni i karigii puni kurugo,
wuu Kafooŋi Yesu Kirisita mɛge na.
Nɔ̀ŋi ná u cwoŋi piye cùŋkanni
21 Yii yiye tîrige yiyʼá Kirisita yyaha fyagare kurugo.
22 Cyeebii,
yii yiye tîrige yii nàmbaabilʼá,
bà yii à yiye tîrige Kafooŋi á mɛ,
23 ɲaha na yɛ nɔ̀ŋi u ɲyɛ u cwoŋi ɲùŋke,
bà Kirisita ɲyɛ dánafeebii kuruŋke ɲùŋke mɛa.
Dánafeebii kuruŋke ku ɲyɛ Kirisita cyeere,
u à kuru ŋkemu shwɔ ke.
24 Bà dánafeebii kuruŋkʼà kuye tîrige Kirisita á mɛ,
amuni cyeebilʼà yaa pi piye tîrige karigii puni i pi nàmbaabilʼá.
25 Nàmbaabii,
yii yii cyeebii kyaa táan yiyʼá,
bà Kirisita à dánafeebii kuruŋke kyaa táan uyʼá,
fo mà uye kan sáraga ku kurugo mɛ.
26 U à lire pyi,
si ku yaha kuye kanna na Kile á,
ku fíniŋiŋkwooni kàntugo ná lwɔhe e Jwumpe Nintanmpe cye kurugo,
27 bà u si mpyi si ku yaha uye yyahe taan ku sìnampe e,
fwɔnrɔ baa ná takuruyo baa ná cyire tìcyiin baa mɛ.
Ŋka ku pyi ɲcɛ̀ɛgɛ cyaga ná cwo cyaga baa.
28 Lire pyiŋkanni na,
nàmbaabilʼà yaa pi pi cyeebii kyaa táan piyʼá,
bà pi yabilimpii cyeere kyalʼà táan piyʼá mɛ.
Shinŋi u à u cwoŋi kyaa táan uyʼá ke,
urufolʼà uye kyaa táan uyʼá.
29 Ɲaha kurugo yɛ sùpyaŋi wà tufiige cyere kyaa ɲyɛ a sàa pɛn u á mɛ,
ŋka u maha uye ɲwɔ caa maa yaha uye na,
bà Kirisita maha li pyi dánafeebii kuruŋkʼá mɛ.
30 Wuu sí pi ɲyɛ u cyeere yatanɲyi.
31 Yʼà jwo Kile Jwumpe Semɛŋi na «Lire kurugo nɔ̀ŋi sí u tuŋi ná u nuŋi yaha si mpwɔ u cwoŋi na,
pi mú shuunni si mpyi shin niŋkinb.»
32 Puru jwumpe ɲwɔhʼà cûgo sèlʼe.
Mii na pu yu mà yyaha tíi ná Kirisita ná dánafeebii kuruŋke wwoɲɛɛge e.
33 Ŋka pʼà yyaha tíi ná yii e mú:
yii shin maha shin à yaa u u cwoŋi kyaa táan uyʼá,
bà urufoo kyalʼà táan uyʼá mɛ.
Cyeebii,
yii pèenɛ le yii nàmbaabilʼe.