Dánafeebii ŋgwòŋi kani
4
Ɲyɛ lire kurugo,
mii u ɲyɛ kàsuŋi i Kafooŋi Yesu Kirisita mɛge kurugo ke,
mii na li caa yii á,
Kile à yii yyere ndemu mɛɛ na ke,
yii raa ɲaare yii a ntàanni ná lire e.
2 Lire li ɲyɛ,
yii sàa yiye tîrige,
yii i mpyi ɲùmpiŋɛfee ná lùtaanfee,
yii yiye karigii kwú tàange funŋke e.
3 Yyeɲiŋke cye kurugo,
Kile Munaani à yii pyi yii à wwɔ̀ wwoŋkanni ndemu na ke,
yii yiye waha yii i ŋkwôro uru ŋgwòŋi i.
4 Yii li cè na yii à pyi mu à jwo cyere niŋkin,
Kile Munaani ninuuni li ɲyɛ yii puni i.
Kile à yii yyere maa sɔ̀nŋɔre tatahage ŋkemu kan yii á ke,
kuru mú na ɲyɛ niŋkin.
5 Kafoo niŋkin u ɲyɛ,
uru ninuŋi na yii punʼà dá,
maa batize uru ninuŋi mɛgɛ na.
6 Kile niŋkin u ɲyɛ,
uru u ɲyɛ wuu puni Tuŋi,
maa mpyi wuu puni ɲùŋɔ na,
u na báaraŋi pyi wuu puni cye kurugo,
maa mpyi wuu puni zòmpyaagilʼe.
7 Ŋka Kile à ɲwɔ wuu na,
maa màkange kà kan wuu shin maha shin á mà tàanna ná Kirisita sùpyire kanŋkanni sumare e.
8 Lire e yʼà jwo Kile Jwumpe Semɛŋi i na:
«Tèni i u à dùgo ke,
u à kàre ná bilii niɲyahamilʼe,
maa mayaaya kan sùpyirʼáa.»
9 U à dùgo nìɲyiŋi i,
di lire ɲwɔhe ɲyɛ yɛ?
Lirʼà li cyêe na u mpyi a fyânha a tîge fo ɲìŋke na.
10 Ŋge u à tîge ke,
uru ninuŋi u à dùgʼa kàre fo cyeyi puni nìɲyiŋi na,
bà u si mpyi si nìɲyiŋi ná ɲìŋke puni ɲî ná u sífente e mɛ.
11 Uru u à pìi pyi Yesu tùnntunmii,
maa pìi pyi Kile tùnntunmii,
maa pìi pyi Jwumpe Nintanmpe jwufee,
maa pìi pyi dánafeebii kuruŋke saɲcwɔnsigibii,
maa pìi pyi ku cyelentii.
12 U à lire pyi,
Kile wuubii pi ɲyɛ Kirisita cyeere ke,
bà pi si mpyi si pire bégele báaraŋi mɛɛ na,
pi raa sì yyaha na Kile kuni i siɲcyan,
13 fo mpa mpyi niŋkin dániyaŋi ná Kile Jyaŋi ɲcèŋi i mɛ.
Lire ká mpyi,
wuu sí raa sì yyaha na Kile kuni i,
si mpa fûnŋɔ Kirisita fiige.
14 Lire e ke wuu saha sì n‑pyi mu à jwo nàŋkopyire sʼa fyínge raa mâre cyelentiibii kafinivinibii kàlaŋi kafɛɛge cye kurugo mɛ.
Pi maha sùpyire yákilibii kɛ̂ɛnŋi ná pi kàyituwɔgɔre e.
15 Ŋka wuu aha a sèeŋi yu tàange funŋke e,
wuu sí raa sì yyaha na karigii puni i Kirisita wwoɲɛɛge e.
Uru u ɲyɛ dánafeebii kuruŋke ɲùŋke.
16 Kuru ɲùŋke cye kurugo,
cyeere yatanɲyi punʼà sogo sogo yiye na,
maa mpyi cyere niŋkin.
Yire yatanɲyi puni niŋkin niŋkinŋi ká a yi báaraŋi pyi,
cyeere sí raa lyɛge si fànha ta tàange funŋke e.
Dánafeebii ɲaaraŋkanni nivɔnni
17 Lire kurugo mii sí yi jwo n‑waha yii á Kafooŋi mɛge na na mpii pi ɲyɛ pi ɲyɛ Kile kuni i ná yii e mɛ,
yii àha raa yii karigii pyi pire wogigii fiige mɛ.
Pire maha pi karigii pyi mà tàanna ná pi sɔ̀nŋɔŋkanni laaga baa wuuni i.
18 Pi yákilibii ɲyɛ a múgo mɛ,
shìŋi nivɔnŋi Kile maha ŋkaan ke,
pi Kile kuni ɲcèmbaaŋi ná pi niŋgyiwaani kurugo pi nàzhan ɲyɛ urʼe mɛ.
19 Lire e silege saha ɲyɛ a sìi pi na mɛ,
pi à piye yaha silege baa karigii laage e,
maa katupwɔhɔyi shiŋi puni pyi.
Pi funɲyi ɲyɛ a sìi na ɲíŋini mɛ.
20 Ŋka yii pi ke,
amuni bà yii à Kirisita kani taanna mà dɛ!
21 Nàkaana baa yii à u kyaa lógo,
yii mú sʼà u kani taanna maa li sèeŋi cè,
22 na yii à yaa yii yii kapyiɲjyɛgigii yaha.
Sùpyaŋi u ɲyɛ na ɲaare lire pyiŋkanni na ke,
uru ɲyii karigii maha u wurugo,
lirʼa sì u shi bò.
23 Yii yii yákilibii ná yii sɔ̀nŋɔŋkanni kɛ̂ɛnŋɛ.
24 Yii pyiŋkanna nivɔnnɔ lwɔ́,
nde li sí li cyêe na Kile à yii pyi shinfɔnmii ke.
Lire li ɲyɛ,
katiigii ná fyìnmpe karigii mpyiŋi,
cyire maha ntaa sèeŋi cye kurugo.
25 Lire kurugo yii láha kafinare na,
shin maha shin u à sèeŋi yu u shinɲɛɛŋʼá,
ɲaha na yɛ wuu punʼà pyi cyere niŋkin yatanya.
26 Yii wà lùu ká yîri,
u àha kapii pyi mɛ,
u bá kà canŋaɲyiini yaha li cwo ná lire lùyirini i mɛb.
27 Yii àha Sitaanniŋi yaha u pyiŋkanna ta si yii yaha kapii na mɛ.
28 Yii wà ká nta u mpyi nàŋkaawa,
urufoo u láha nàŋkaage na,
u raa báare sèlʼe ntìiŋi funŋke e,
bà u si mpyi sʼa kanhamafeebii tɛ̀re mɛ.
29 Jwumpimpe pà tufiige ɲyɛ a yaa pʼa fwore yii ɲwɔyi i mɛ.
Jwumɔ maha jwumɔ pu sí n‑jà sùpya pyi u a sì yyaha na Kile kuni i ke,
yii a puru yu bà pu si mpyi si pu lógofeebii tɛ̀gɛ mɛ.
30 Yii àha raa Kile Munaani lùyiri karigii pyi mɛ.
Lire li ɲyɛ Kile fyèŋi yii na,
ŋgemu u à li cyêe na Kile sí n‑pa yii ɲùŋɔ wwû feefee canŋka ke.
31 Yii àha wà nàvunŋɔ yaha yiye e mɛ,
yii àha mpyi lùpɛɛnfee mɛ,
yii àha yii lùgigii yaha cyi à yîri mɛ,
yii àha raa sêre sùpyire na mɛ,
yii àha raa cyàhii pyi mɛ.
Yii láha pege karigii shiŋi puni na.
32 Yii a kacɛnŋii pyi yiye na,
yii raa ɲùɲaara taa yiye na,
yii a yàfani yiye na,
bà Kile à yàfa yii na Kirisita kurugo mɛ.