Kile à jwo na sùpyaŋi maha ntíi u dániyaŋi kurugo
3
Yii Galati dánafeebii funŋɔ baa sùpyiibii!
Jofoo u à yii le kuni nimpiini i yɛ?
Mà li ta ɲùŋke na Yesu à kwòro cige na ke,
mii à kuru fíniŋʼa jwo yii á.
2 Yii li cè na yii ɲyɛ a Kile Munaani ta Musa Saliyaŋi kuni ɲaaraŋi cye kurugo mɛ,
ŋka Jwumpe Nintanmpe yii à lógo maa dá pu na ke,
puru cye kurugo yii à li ta.
3 Di yii à pyi maa mpyi funŋɔ baa shiin bɛ?
Kani yii à sìi ná Kile Munaani síŋi i ke,
ɲaha na yii la ɲyɛ sʼa lire pyi numɛ ná yii yabilimpii sífente e yɛ?
4 Karigii puni Kile à pyi yii á ke,
cyirʼà pyi kaɲwɔɔ baa kɛ?
Ŋka cyire sí ɲyɛ a yaa cyi pyi kaɲwɔɔ baa mà dɛ!
5 Yii wíi!
Kile ká u Munaani yaha lʼà pa yii yyaha cû,
ka yii i kakyanhala karii pyi,
yii àha raa sɔ̂nŋi na yii na Musa Saliyaŋi kuni ɲaare ke,
na lire kurugo u à li pyi mɛ,
ŋka Jwumpe Nintanmpe yii à lógo maa dá pu na ke,
lire kurugo u à lire pyi.
6 Ɲyɛ nde Ibirayima à pyi ke,
lire tayyéregʼà pêe wuu á.
U à dá Kile na,
lire cye kurugo Kile à jwo na u à tíia.
7 Lire e ke yii li cè,
mpii pi à dá Kile na ke,
pire pi ɲyɛ Ibirayima tùluge shiinbii sèesee wuubii.
8 Kile Jwumpe Semɛŋi mú sʼà jwo a kwɔ̀ na Kile na sí supyishiŋi sanŋi pyi shintiilii u yyahe taan,
pi dániyaŋi kurugo.
Lire kurugo u à jwo Ibirayima á na:
«Mii sí jwó le supyishiŋi punʼá mu cye kurugob.»
9 Ibirayima à dá Kile na,
ka Kile si jwó le u á,
amuni li mú ɲyɛ shin maha shin ká dá Kile na ke,
u sí jwó le urufolʼá Ibirayima fiige.
10 Mpii pi na Musa Saliyaŋi kuni ɲaare marii sɔ̂nŋi na Kile sí jwó le pirʼá ke,
pirʼà cwo laŋaŋke e mà kwɔ̀.
Ɲaha kurugo yɛ lʼà sémɛ Kile Jwumpe Semɛŋi i na:
«Yaaga maha yaaga kʼà sémɛ Saliyaŋi i ke,
ŋgemu ká mpyi u ɲyɛ na cyire kapyaagii kurigii puni ɲaare mɛ,
urufolʼà láŋac.»
11 Ɲyɛ nàkaana baa,
sùpya sì n‑jà n‑tíi Kile yyahe taan Saliyaŋi cye kurugo mɛ,
ɲaha na yɛ lʼà sémɛ mú na:
«Shinŋi u à tíi ke,
dániyaŋi cye kurugo,
uru maha mpyi ɲyii nad.»
12 Musa Saliyaŋi kuni ná dániyaŋi wuuni ɲaaraŋi ɲyɛ niŋkin mɛ,
ɲaha na yɛ lʼà sémɛ mú na:
«Ŋgemu la ká mpyi si shìŋi ta Saliyaŋi cye kurugo ke,
urufolʼà yaa u Saliyaŋi kurigii puni ɲaarae.»
13 Ŋka Kirisita à wuu laŋaŋke lwɔ́ wuu cyaga,
maa wuu shwɔ Saliyaŋi laŋaŋke na.
Lʼà sémɛ mú na:
«Shin maha shin pi à dùrugo cige e mà u bò ke,
urufolʼà láŋaf.»
14 Lirʼà pyi,
Kile à dùbabii mpiimu le Ibirayima á ke,
bà pire si mpyi si nɔ supyishiŋi sanŋi na mú Yesu Kirisita cye kurugo mɛ.
Kile à u Munaani ɲwɔmɛɛni ndemu lwɔ́ ke,
bà wuu si mpyi si lire ta dániyaŋi cye kurugo mɛ.
Musa Saliyaŋi ɲyɛ a Kile ɲwɔmɛɛni fyìinnɛ mɛ
15 Mii cìnmpyiibii,
mii sí kani là yyaha jwo yii á mà tàanna ná sùpyire karigii pyiŋkanni i.
Shiin shuunni ká tunmbyara le,
pire mú shuunni i,
shin niŋkin sì n‑jà tire kɛ̀ɛge mɛ,
u mú sì n‑jà yaaga le tire e mɛ.
16 Ɲyɛ amuni Kile à tunmbyara le ná Ibirayima ná u tùluge e.
Li ɲyɛ a sémɛ:
«Ibirayima ná u tùluyi i» mɛ.
Li nʼa mpyi a sémɛ amuni,
li mpyi na sí n‑pyi mu à jwo u tùluyʼà ɲyaha.
Ŋka lʼà sémɛ:
«Ibirayima ná u tùluge eg» kuru ku ɲyɛ Kirisita.
17 Mii jwumpe ɲwɔhe ku ɲyɛ ŋke:
Kile à tire tunmbyaare le,
yyee ŋkwuu sicyɛɛre ná yyee beɲjaaga ná kɛ (430) kàntugo,
ka Musa Saliyaŋi si nta a pa.
Uru Saliyaŋi sì n‑jà Kile ɲwɔmɛɛni fyìinnɛ,
si nta raa ŋko,
mà li shi bò mɛ.
18 Kàmpyi Kile mpyi a sùpyire pyi u koolyii mà tàanna ná Saliyaŋi kuni ɲaaraŋi i,
li sàha mpyi na sì n‑pyi ɲwɔmɛɛni kayaala mɛ.
Mà li ta Kile à ɲwɔ Ibirayima na ɲwɔmɛɛni cye kurugo.
Ɲaha kurugo Kile à Saliyaŋi kan yɛ?
19 Lʼaha mpyi amuni,
ɲaha kurugo Kile à Saliyaŋi kan yɛ?
U à u kan bà wuu si mpyi si u kafuunŋkii cè mɛ.
Lʼà pyi si yaa ná Ibirayima tùluge mpaŋi i,
kurʼá Kile à nde ɲwɔmɛɛni lwɔ́.
Ɲyɛ Kile mɛ̀lɛkɛɛbii ná pi toromayyahafooŋi cye kurugo Saliyaŋi à nɔ sùpyire na.
20 Ŋka tèni i Kile à lire ɲwɔmɛɛni lwɔ́ Ibirayima á ke,
u kuro ɲyɛ a mpyi toromayyahafooŋi i mɛ.
Kile yabiliŋi ye niŋkin u à tílʼa yi jwo Ibirayima á.
21 Tá lirʼà li cyêe na Saliyaŋi à kàntugo wà Kile ɲwɔmyahigilʼá?
Mà byanhara bá la!
Kàmpyi Saliyaŋi mpyi na sí n‑jà shin pyi Kile sùpya,
u mpyi na sí n‑jà sùpyire pyi ti tíi mú Kile yyahe taan.
22 Ŋka Kile Jwumpe Semɛŋi à jwo na kapegigii mpyiŋʼà fànha ta sùpyire puni na.
Lire e ke yaayi ɲwɔmɛɛni Kile à lwɔ́ ke,
pyiŋkanni niŋkinŋi na wà sí n‑jà yire ta ke,
lire li ɲyɛ mà dá Yesu Kirisita na.
23 Mà uru dániyaŋi tèni yaha li sàha nɔ mɛ,
Musa Saliyaŋi u mpyi a tɛ̀ɛn sùpyire puni ɲuŋʼi mà wuu pyi kàsujyii fiige.
U à tɛ̀ɛn wuu ɲuŋʼi fo mà sà nɔ tèni i Kile kunʼà cyêe wuu na,
ka wuu u dá Kirisita na ke.
24 Lire pyiŋkanni na,
Musa Saliyaŋi à wuu le kuni i fo mà sà ŋkan Kirisita á,
bà wuu si mpyi sʼa ntɔ̀re ná shintiibilʼe Kile yyahe taan dániyaŋi cye kurugo mɛ.
25 Numɛ mà wuu yaha wuu à dá Kirisita na,
wuu saha ɲyɛ Musa Saliyaŋi cye e mɛ.
Kile pyìfente taŋkanni
26 Yii punʼà pyi Kile pyìi dániyaŋi cye kurugo Yesu Kirisita wwoɲɛɛge e.
27 Yii mpii pi à batize Yesu Kirisita wwoɲɛɛge e ke,
yii à Kirisita yabiliŋi pyiŋkanni lwɔ́.
28 Lire e mu à pyi Yahutu yo,
mu à pyi supyishiŋi sanŋi yo,
mu à pyi biliwe yo,
mu ɲyɛ a pyi biliwe mà yo,
mu à pyi nɔ̀ yo,
mu à pyi ceewe yo,
sùpya ɲyɛ a wwû sùpya e mɛ.
Yii puni na ɲyɛ niŋkin Yesu Kirisita wwoɲɛɛge cye kurugo.
29 Ɲyɛ yii aha nta Kirisita wuu,
yii mú na ɲyɛ Ibirayima tùluge shiin.
Yaage ɲwɔmɛɛni Kile à lwɔ́ Ibirayima á ke,
yii sí kuru ta mú.