Jwumpe Nintanmpe Poli mpyi na yu ke, Yesu tùnntunmpii sanmpilʼà ɲɛɛ puru na
2
Ɲyɛ yyee kɛ ná sicyɛɛrʼà tòro ke,
ka mii i núrʼa kàre Zheruzalɛmu kànhe e ná Barinabasi i.
Titi mpyi a kàre ná wuu e mú.
2 Mii à nde kùluni tɔɔge lwɔ́,
ɲaha na yɛ Kile yabiliŋi u à li cyêe mii na.
Mii à nɔ wani ke,
maa bínnʼa tɛ̀ɛn ná dánafeebii ɲùŋufeebilʼe.
Jwumpe Nintanmpe mii na yu supyishiŋi sanŋʼá,
mpii pi ɲyɛ pi ɲyɛ Yahutuu mɛ,
ka mii i jyè puru yyahe e mà jwo dánafeebii ɲùŋufeebilʼá.
Mii la ɲyɛ a mpyi tafɛɛre mii à fê taɲjaa ná niɲjaa Yesu Kirisita kurugo ke,
tire ti kwôro kaɲwɔɔ baa mɛ.
3-5 Ɲyɛ mà mii yaha wani,
kafinivinibii pìi mpyi a piye pyi dánafee fiige maa ŋwɔhɔ a jyè wuu shwɔhɔlʼe si nta ɲcè pyiŋkanni na Yesu Kirisita à wuu shwɔ Musa Saliyaŋi bilere na ke,
si lire kɛ̀ɛge si nta wuu yaha bilere e sahaŋki.
Ali mà li ta mii ɲaaraɲɛɛŋi Titi mpyi Yahutu mɛ,
pi la mpyi u u ŋkwɔ̀n fànhe e mà tàanna ná Musa Saliyaŋi i.
Ŋka wuu ɲyɛ a ɲɛnʼa wuye yaha pi cye e tère niŋkin i,
maa lógo pi ɲwɔ na mɛ,
Jwumpe Nintanmpe pu ɲyɛ sèeŋi ke,
bà puru si mpyi si ŋkwôro yii á mɛ.
Wuu ná Zheruzalɛmu dánafeebii kacwɔnribii mpyi a wwɔ̀ ɲwɔmɛɛ niŋkin na,
pi ɲyɛ a ɲɛnʼa fànha cyán Titi na u u ŋkwɔ̀n mɛ.
6 Jwumpe Nintanmpe wuu na yu ke,
pi sí ɲyɛ a ɲɛnʼa yaaga bâra puru na mɛ.
(Sèeŋi na,
pi tayyérege mpyi ŋkemu ke,
kuru ɲyɛ yaaga mii á mɛ,
ɲaha kurugo yɛ Kile ɲyɛ a sùpya pwɔ́ɔŋɔ sùpya na mɛ.)
7 Sèeŋi na,
pi à li ta na Kile à mii tun mii u sà a Jwumpe Nintanmpe yu supyishiŋi sanŋʼá,
bà u à Pyɛri tun u sà a pu yu Yahutuubilʼá mɛ.
8 Kileŋi u à fànhe kan Pyɛri á maa u tun Yahutuubilʼá ke,
uru mú u à fànhe kan mii á maa mii tun supyishiŋi sanŋʼá.
9 Amuni,
Yakuba ná Pyɛri ná Yuhana pire pi ɲyɛ ɲùŋufeebii,
maa ntɛ̀ɛn li taan na Kile à ɲwɔ mii na,
mii u a nte tùnnture pyi.
Lire na pi à Barinabasi cyɛge ná ndoge cû,
si li cyêe na wuu ná pire na ɲyɛ wwoɲɛɛ.
Wuu à bínnʼa tɛ̀ɛn maa ɲwɔ li na na pire sí n‑sà a Jwumpe Nintanmpe yu Yahutuubilʼá.
Wuu pi ke,
wuu sí n‑sà a pu yu supyishiŋi sanŋʼá.
10 Pi à wuu ɲáare kanna na wuu àha funŋɔ wwɔ̀ dánafeebii fòŋɔfeebii na wani mɛ.
Mii sʼà fère sín maa lire pyi.
Poli à Pyɛri la wwû Antiyɔshi kànhe e
11 Ɲyɛ tèni i Pyɛri à pa Antiyɔshi kànhe e ke,
lʼà fworʼa yyére na u karigii pyiŋkanni mpyi a ɲwɔ mɛ,
lire e mii à u tìŋɛ maa u cɛ̂ɛgɛ sùpyire puni ɲyii na.
12 Pyɛri làwwuge ɲùŋke ku ŋke:
u mpyi a fyânha na lyî ná supyishiŋi sanŋi dánafeebilʼe,
lire mpyi a ɲwɔ,
ŋka pìlʼà yîri Yakuba yyérʼa pa,
pire mpyi maha jwo na supyishiŋi sanŋʼà yaa u kwɔ̀n Yahutuubii fiige,
u à fyá pire na,
maa li ɲwɔ cû na láre supyishiŋi sanŋi dánafeebii na,
fo mà pa kàntugo wà pi á.
13 Lirʼà pyi ke,
ka Antiyɔshi kànhe Yahutuubii dánafeebii sanmpii si mpyi ɲwɔmyahigii shuunnifee Pyɛri fiige.
Ali Barinabasi yabiliŋi mpyi a taha pi fye e.
14 Mii à pa li kàanmucya mà li ta Jwumpe Nintanmpe na sèeŋi ŋgemu yu ke,
pi ɲyɛ na ɲaare uru sèeŋi fye e mɛ,
ka mii i yi jwo Pyɛri á pi puni ɲyii na:
«Mu u ɲyɛ Yahutu ke,
Kile kuni yyahe yyére zhèŋi kurugo mu à ɲɛnʼa Yahutuubii làdaabii pìi yaha maa mpyi supyishiŋi sanŋi fiige,
lire mpyi a ɲwɔ,
ŋka numɛ,
ɲaha na mu la ɲyɛ si supyishiŋi sanŋi kɛ̂ɛnŋɛ fànhe e si mpyi Yahutuu yɛ?
15 Mii ná mu,
wuu à si Yahutuu,
wuu ɲyɛ supyishiŋi sanŋi fiige ŋge u ɲyɛ u ɲyɛ a Kile kuni cè mɛ.
16 Ŋka lire ná li wuuni mú i,
wuu à cè na sùpya sì n‑jà n‑tíi Kile yyahe taan mà lire ɲùŋke pyi na u à Musa Saliyaŋi kurigii ɲaara mɛ.
Dániyaŋi kanni cye kurugo Yesu Kirisita na,
sùpya maha ntíi Kile yyahe taan.
Lire kurugo wuu mú à dá Yesu Kirisita na,
bà wuu si mpyi si ntíi Kile yyahe taan mɛ.
Lire ɲyɛ Saliyaŋi kapyii mɛ,
ɲaha na yɛ sùpya sì n‑sìi n‑jà n‑tíi ka lire ɲùŋke si nta na u à Saliyaŋi kurigii ɲaara mɛ.»
17 Wuu pi ke,
wuu na ɲcaa si ntíi Yesu cye kurugo,
ŋka lʼaha mpa nta na wuu na kapegigii pyi,
lirʼà li cyêe na Kirisita e cyi à fworo la?
Mà byanhara bá la!
18 Mu aha fworo Musa Saliyaŋi kuni i mà pa Yesu Kirisita wuuni i,
kàntugo yyére maa núrʼa fworʼa jyè lire kuni niɲjyeeni i,
lire cye kurugo mu maha núrʼa pyi Saliyaŋi kɛ̀ɛgɛfoo.
19 Mii wi ke,
mii à fworo Musa Saliyaŋi i.
Lire e ke mii saha ɲyɛ uru Saliyaŋi ɲwɔhʼi mɛ.
Uru Saliyaŋi yabiliŋi ŋgahaŋi u à mii pyi mii à fworo u e.
Cyire punʼà pyi,
bà mii si mpyi si nta mpyi Kile sùpya mɛ.
20 Lʼà pyi mu à jwo mii ná Kirisita à kwòro siɲcyan kworokworocige na.
Lire kurugo mii yabiliŋi sàha bà u ɲyɛ na naye karigii cwɔɔnre mɛ.
Ŋka Kirisita na ɲyɛ mii i.
Kyaa maha kyaa mii na mpyi numɛ ke,
mii à na cyɛge taha Kile Jyaŋi na maa nta a li pyi.
Uru u à mii kyaa táan uyʼá,
maa uye kan sáraga mii kurugo.
21 Kile à ɲwɔ mii na maa yaage ŋkemu kan mii á ke,
mii sì n‑cyé kuru na mɛ.
Kàmpyi Kile mpyi a jwo na mu aha ntaha Musa Saliyaŋi fye e na mu à tíi uru yyahe taan,
lire tèni i ke,
Kirisita kwùŋi mpyi na sí n‑pyi kaɲwɔɔ baa dɛ!