Lɛtɛrɛŋi Poli à tun Galati kùluni dánafeebilʼá ke
Poli à fwù kan Galati dánafeebii kuruɲyʼá
1
Mii Poli u ɲyɛ Yesu Kirisita tùnntunŋɔ ke,
mii u à ŋge lɛtɛrɛŋi tùugo yii á.
Mii u pyi Yesu Kirisita tùnntunŋɔ,
sùpya bà u à lire yaa mɛ,
sùpya bà u à mii tun mɛ.
Yesu Kirisita u à ɲɛ̀ a fworo kwùŋi i Tufooŋi cye kurugo ke,
uru ná Tufooŋi Kile u à wwɔ̀ lire na.
2 Mii cìnmpyiibii puni pi naha ná mii i ke,
mii ná pire pi à wwɔ̀ maa ŋge lɛtɛrɛŋi tùugo Galati kùluni dánafeebii kuruɲyʼá.
3 Wuu Tuŋi Kile ná Kafooŋi Yesu Kirisita pi ɲwɔ yii na,
pi yyeɲiŋke kan yii á.
4 Yesu Kirisita u à uye kan mà pyi sáraga si wuu kapegigii yàfa wuu na,
bà wuu si mpyi si fworo ŋge diɲyɛŋi nimpiŋi karigii puni i mà tàanna ná Tufooŋi Kile ɲyii wuuni i mɛ.
5 Pèente ti taha Kile na tèrigii puni i,
fo tèekwombaa.
Amiina!
Lʼà Poli pâa, u lógo na Galati dánafeebilʼà kuni labɛrɛ lwɔ́
6 Lʼà mii pâa sèlʼe mà lógo na yii à wyɛ̀rɛ na ŋko raa kàntugo wàa Kile á,
uru ŋgemu u à yii yyere maa ɲwɔ yii na maa yii shwɔ ke,
mpii pi ɲyɛ na yii shwoŋkanni jwumpe labali na yu ke,
maa ntaha pire jwumpe ɲwɔhʼi,
7 mpemu ná Jwumpe Nintanmpe ɲyɛ niŋkin mɛ.
Tire sùpyire na yii wuruge,
Jwumpe Nintanmpe pu ɲyɛ na Kirisita kyaa yu ke,
marii ɲcaa sʼa puru kɛ̂ɛnŋi.
8 Wuu à ɲjemu jwo yii á Yesu kyaa na ke,
lʼà pyi wuu yabilimpii yo,
lʼà pyi Kile mɛ̀lɛkɛ mà yîri nìɲyiŋi na yo,
wà ha mpa yabɛrɛ jwo yii á,
Kile u urufoo láŋa.
9 Mii à yi jwo yii á mà kwɔ̀,
mii sí núru yi taha,
Jwumpe Nintanmpe yii à lógo wuu ɲwɔ na,
maa ɲɛɛ pu na ke,
shin maha shin ká puru labala a jwo yii á jwuŋkanni labɛrɛ na ke,
Kile u urufoo láŋa.
10 Ɲaha yii na sɔ̂nŋi numɛ bɛ?
Mii na ɲcaa si ntáan sùpyirʼá laa,
mii na ɲcaa si ntáan Kile á?
Sùpyire ɲyii wuuni mii na mpyi bɛ?
Mii nʼa mpyi na sɔ̂nŋi si ntáan sùpyirʼá,
mii mpyi na sì n‑pyi Kirisita báarapyi mɛ.
Pyiŋkanni na Poli à pyi Yesu tùnntunŋɔ ke
11 Mii la ɲyɛ yii li cè mii cìnmpyiibii,
Jwumpe Nintanmpe mii à jwo yii á ke,
pu ɲyɛ a fworo sùpya e mɛ.
12 Mii ɲyɛ a pu ta sùpya á mɛ,
wà mú sí ɲyɛ a mii kâla pu na mɛ,
ŋka Yesu Kirisita yabiliŋi u à pu cyêe mii na.
13 Yii à mii pyiŋkanni kyaa lógo mà mii yaha Yahutuubii Kile kuni i.
Yii mú sʼà cè na mii à Kile dánafeebii kuruŋke kyérege fo mà tòro.
Mii mpyi na li kɔ̀re si ku jya.
14 Yahutuubii Kile kuni ɲaaraŋi i,
mii mpyi na yyeɲwɔge shiinbii puni yyaha na.
Mii tiibii làdaabii kani mpyi a sàa waha mii na.
15 Ŋka Kile à ɲwɔ mii na mà mii ta mii sàha si mɛ,
maa mii cwɔɔnrɔ,
mii a báare urʼá.
16 Amuni,
li mú à pyi,
lʼà sàa bɛ̂ u á mà u Jyaŋi cyêe mii na,
mii sʼa u kyaa yu supyishiŋi sanŋʼá,
mpii pi ɲyɛ pi ɲyɛ Yahutuu mɛ,
mii ɲyɛ a sùpya yíbe si nta li pyi mɛ.
17 Mpii pi à pyi Yesu tùnntunmii mii yyaha na ke,
mii ɲyɛ a shà Zheruzalɛmu i si pi ɲya mɛ.
Mii à tílʼa kàre Arabubii kìni i,
maa yîri wani mà kàre Damasi kànhe e.
18 Yyee taanre kàntugo na,
mii à kàre Zheruzalɛmu kànhe e,
mà sà canmpyaa kɛ ná kaŋkuro pyi Pyɛri yyére si u cè.
19 Ŋka uru ná Kafooŋi Yesu cìnmpworoŋi Yakuba baare e,
mii saha ɲyɛ a Yesu tùnntunŋi wabɛrɛ ɲya mɛ.
20 Kampyi kafinara mii na sémɛni na ntùuge yii á,
Kile u ɲyɛ mii shɛ̀rɛfooŋi.
21 Lire kàntugo mii à kàre Siri kìni i,
maa yîri wani mà kàre Silisi kùluni i.
22 Ŋka fo mà sà nɔ lire tèni na,
Zhude kùluni dánafeebii kuruɲyi mpyi na sàha ŋkwɔ̀ a mii cè mɛ.
23 Pi mpyi a lógo kanna na ŋge u mpyi na pi kyérege si nta pi sige pi àha ndá Jwumpe Nintanmpe na mɛ,
na uru u na pu yu sùpyirʼá numɛ.
24 Lire e ke pi na Kile mɛtange yiri mii kurugo.