Galati Shiinbii 4

Yii na yaha si yi yyaha jwo yii á. Li na ɲyɛ bà tufoo maha ɲwɔmɛɛ lwɔ́ u pyà á mɛ. Mà pyàŋi yaha nàŋkocyɛɛre e, u maha mpyi biliwe fiige, mà li ta u tuŋi yaayi puni ɲyɛ u wuyo. 2 U byífeebii ná mpii pi na u karigii cwɔɔnre ke, pire maha yaha u na, fo tèni kyaa u tuŋʼà jwo ke, lire ká nɔ.

3 Wuu mú pi ke, wuu mpyi mu à jwo nàŋkopyire mà wuu yaha diɲyɛŋi yasunɲyi làdaabii bilere e. 4 Ŋka Kile ɲwɔmɛɛni tènʼà fûnŋɔ ke, ka u u u Jyaŋi tun u à si sùpya mà yaha ɲwɔhʼi, 5 mpii pi ɲyɛ uru Saliyaŋi ɲwɔhʼi ke, bà u si mpyi si pire ɲùŋɔ wwû bilere e, Kile si pi pyi u pyìi mɛ. 6 Nde lʼà li cyêe na yii na ɲyɛ Kile pyìi ke, lire li ɲyɛ Kile à u Jyaŋi Munaani tun yii zòompii na, lire lʼà li ta yii aha Kile ɲáare yii maha jwo: «Baba, wuu Tu Kile!»

7 Ɲyɛ lirʼà li cyêe na yii à fworo bilere e. Yii à pyi numɛ Kile pyìi. Ná yii sʼà pyi u pyìi de, yaayi puni u à bégelʼa yaha u pyìibii mɛɛ na ke, yii pi ɲyɛ yire tafeebii.

Poli funŋkʼà pɛn ná Galati dánafeebilʼe

8 Ɲyɛ tèecyiini i, yii mpyi na sàha ŋkwɔ̀ a pyi ná Kile e mɛ, lire e yii mpyi a yiye le yasunɲyi bilere e, ɲjemu yi ɲyɛ yi ɲyɛ Kile sèe wuŋi mɛ. 9 Ŋka numɛ yii ɲyɛ ná Kile e, a fo Kile bà u ɲyɛ ná yii e, ɲaha na yii la ɲyɛ si núru yiye le yire diɲyɛŋi yasunɲyi làdaabii bilere e yɛ? Yire yasunɲyi ɲyɛ fànha ná kaɲwɔɔ baa dɛ! 10 Yii maha canmpyaagii cyìi tɔ̀re canntanya, yiɲyi yà na ɲyɛ amuni, tèrigii cyìi na ɲyɛ amuni, yyeegii cyìi na ɲyɛ amuni, ɲaha na bɛ? 11 Yii kapyiiŋkilʼà mii funŋɔ pɛn, fo mii na sɔ̂nŋi mii kanhare puni sí n‑pyi kaɲwɔɔ baa.

12 Mii cìnmpyiibii, mii à fworo Yahutuubii làdaabii bilere e maa mpyi yii fiige. Mii na yii ɲáare, yii i mpyi mii fiige, yii àha yiye le tire bilere e mɛ.

Mà mii yaha yii yyére yii ɲyɛ a mii mùmpɛnmɛ pyi mɛ. 13 Yii à li cè na yampe pʼà mii pyi mii à tɛ̀ɛn yii shwɔhɔlʼe na toɲcyiige, maa Jwumpe Nintanmpe jwo yii á. 14 Mii yampʼà yii tɛɛnmɛ pɛn, ŋka yii ɲyɛ a ɲjíge maa ɲcyé mii na mɛ, yii à mii cùmɔ lemɛ ɲwɔ mu à jwo Kile mɛ̀lɛkɛŋi wà, mu à jwo Yesu yabiliŋi wi. 15 Lire tèni i, yii yyahayi mpyi a táan ná mii i sèlʼe. Numɛ taa kuru yyetange de! Mii à dá li na na mii kyaa mpyi a táan yii á, kàmpyi li mpyi na sí n‑jà n‑pyi, yii mpyi na sí yii ɲyiigii wwû n‑kan mii á. 16 Lire e ke mii na sèeŋi yu yii á ke, lire lʼà mii pyi yii zàmpɛn bɛ?

17 Sùpyire ti na Jwumpe Nintanmpe labali na yu ke, tire na dìrili yii kurugo, ŋka sèeshiin bà mɛ. Pi la ɲyɛ si mii ná yii láha wuye na, bà yii si mpyi si zìi ntaha pire fye e mɛ. 18 Lʼà ɲwɔ yii kwôro kuni niɲcɛnni i tèrigii puni i, ali mii mɛ́ɛ ká mpyi mii ɲyɛ yii shwɔhɔlʼe tèni ndemu i mɛ. 19 Mii pyìibii, mii na ŋkànre yii kurugo sahaŋki layirilifoo fiige, fo Yesu Kirisita ká yii zòompii puni shwɔ a ta. 20 Cyage e mii ɲyɛ amɛ ke, li mpyi na sí n‑táan mii i mà pyi yii shwɔhɔlʼe nde tèni i, si jwuŋkanni kɛ̂ɛnŋɛ ná yii e, ɲaha na yɛ nde mii sí n‑pyi yii á ke, mii ɲyɛ a li cè mɛ.

Kile ɲwɔmɛɛni ná Kile Saliyaŋi na ɲyɛ Ibirayima cyeebii shuunniŋi fiige

21 Mii à jwo yo! Yii mpii la ku ɲyɛ si mpyi ɲwɔhʼi ke, ɲje Saliyaŋi Semɛŋi à jwo ke, yii ɲyɛ a yire lógo mà? 22 Lʼà sémɛ na à pùnampyire shuunni ta, wà à ta bilicwo á, wà sʼà ta u cileŋɛŋʼá. 23 Bilicwoŋi pyàŋʼà ta mà tàanna ná u sifeebii ɲyii wuuni i, ŋka cileŋɛŋi wuŋʼà ta mà tàanna ná Kile ɲwɔmɛɛni i.

24 Mpe jwumpe ɲwɔhʼà cûgo, mpii cyeebii shuunniŋi na ɲyɛ mu à jwo tunmbyara tatɛɛnyɛ shuunni Kile à ntemu pyi ke. Agari u ɲyɛ bilicwoŋi ke, uru u ɲyɛ mu à jwo Kile à le ná Musa e Sinayi ɲaŋke ɲuŋʼi ke, u pyìibii maha sini bilii. 25 Ɲyɛ Agari na ɲyɛ Sinayi ɲaŋke fiige Arabubii kìni i, maa mpyi naha Zheruzalɛmu kànhe fiige mú, kuru ná ku shiinbii na ɲyɛ bilere e. 26 Ŋka Zheruzalɛmu kànhe ku ɲyɛ nìɲyiŋi na ke, kuru ɲyɛ bilere e mɛ, kuru mú sí ku ɲyɛ wuu nuŋi. 27 Lʼà sémɛ na:

«Cijiriŋɛ, ta múgure sèlʼe,

mu u ɲyɛ mu sàha laa yaŋkanna cè mɛ, ta ŋkwúuli funntange e,

ɲaha na yɛ ceeŋi nɔ̀ŋʼà wâlʼa yaha ke,

uru pyìibii sí ɲyaha n‑tòro nɔ̀ɲyiicwoŋi wuubii na.»

28 Mii cìnmpyiibii, yii pi ke, yii à pyi Ishaka fiige, pyìibii ɲwɔmɛɛni Kile à lwɔ́ maa pi kan Ibirayima á ke, pire pi ɲyɛ yii.

29 Bilicwoŋi pyàŋʼà ta u sifeebii ɲyii taŋkanni na, cileŋɛŋi wuŋʼà ta sífente cye kurugo. Ŋka bilicwoŋi pyàŋʼà têe na cileŋɛŋi wuŋi yyahe fwɔ́hɔre, fo mà sà nɔ niɲjaa na. 30 Ɲyɛ ɲaha Kile Jwumpe Semɛŋi à jwo yɛ? Yʼà sémɛ:

«Ma bilicwoŋi ná u jyaŋi kɔ̀rɔ, ɲaha na yɛ u nàzhan ɲyɛ kɔɔge e ná cileŋɛŋi jyaŋi i mɛ.»

31 Lire kurugo mii cìnmpyiibii, wuu ɲyɛ bilicwoŋi pyìi mɛ, ŋka cileŋɛŋi pyìibii pi à sìi wuu.