6
Wuu ná Kile na ɲyɛ báarapyiɲɛɛ.
Lire kurugo wuu na li caa yii á,
Kile à ɲwɔ yii na maa ndemu pyi yii á ke,
yii àha lire yaha li pyi kaɲwɔɔ baa mɛ.
2 Yii li cè na Kile à jwo:
«Tèni lʼà táan mii á ke,
lire e mii à mu ɲarege shwɔ,
zhwoŋi canŋke,
mii à mu tɛ̀gɛa.»
Ɲyɛ mii cìnmpyiibii,
yii lógo,
Kile ɲyii tèni li ɲyɛ numɛ,
zhwoŋi canŋke ku ɲyɛ niɲjaa.
3 Wuu la ɲyɛ sì wurugo sùpyaŋi wà tufiigʼá,
wà u kwɔ̀ a ɲcɛ̀ɛgɛ cyaga ta wuu báaraŋi na mɛ.
4 Lire e wuu maha li cyêre wuu kapyiiŋkii puni cye kurugo na wuu na ɲyɛ Kile báarapyii.
Wuu maha kyaage ná kanhare ná yyefuge kwú wuye e.
5 Bwɔɔnre yo,
kàsujyiini yo,
mà sùpyire sɔ̀n a yaha wuu na yo,
báarawayi yo,
ŋɔ́ɔmbaaŋi yo,
ɲjyìmbaaŋi yo,
wuu maha cyire puni kwú wuye e.
6 Wuu na báare ná zòvyinre e,
wuu à sèeŋi cè.
Wuu lùunʼà táan,
wuu zòŋʼà ɲwɔ.
Kile Munaani maha wuu tɛ̀re,
tàange sèe woge na ɲyɛ wuu e.
7 Wuu na sèeŋi jwumpe yu,
Kile sífente na ɲyɛ wuu á.
Wuu à ntìiŋi pyi wuu kàshikwɔnyaayi,
si wuu zàmpɛɛnbii tùn,
si wuye mâra.
8 Pìi maha wuu pêre,
pìi maha wuu fare,
pìi maha wuu mɛpɛnge yîri,
pìi maha wuu mɛtange yîri.
Pìi maha sɔ̂nŋi na wuu maha pire ɲwɔ fáanŋi,
mà li ta sèeŋi wuu maha yu.
9 Pi maha piye pyi mu à jwo pi ɲyɛ a wuu cè mɛ,
mà li ta sùpyire punʼà wuu cè.
Pi maha wuu wíi kwùu fiige,
mà li ta wuu ɲyɛ ɲyii na.
Pi maha wuu kyérege,
ŋka wuu ɲyɛ a kwû mɛ.
10 Pi maha sɔ̂nŋi na wuu yyahʼà tanha,
mà li ta wuu funntanga wuubii pi ɲyɛ tèrigii puni i.
Pi maha wuu sɔ̂nŋi fòŋɔfee,
mà li ta wuu à shinɲyahara pyi tʼà pyi yaarafee.
Pi maha sɔ̂nŋi na yaaga ɲyɛ wuu cye e mɛ,
mà li ta yaayi puni ɲyɛ wuu wuyo.
11 Kɔrɛnti shiinbii,
wuu à fíniŋʼa jwo yii á.
Wuu à yii kyaa táan wuyʼá sèlʼe.
12 Wuu ɲyɛ a cyé si yii kyaa táan wuyʼá mɛ,
ŋka yii à cyé si wuu kyaa táan yiyʼá.
13 Ɲyɛ mii na yu ná yii e mu à jwo mii pyìi.
Yii wuu kyaa táan yiyʼá,
bà wuu à yii kyaa táan wuyʼá mɛ.
Mpii pi ɲyɛ pi ɲyɛ Kile kuni i ná yii e mɛ, yii yii karigii pyiŋkanni cè ná pire e
14 Mpii pi ɲyɛ pi ɲyɛ Kile kuni i ná yii e mɛ,
yii ná pire ɲyɛ a yaa yii pyi pwoo mɛ.
Katiigii ná kapegigii sí n‑jà n‑shà kununi i la?
Bɛ̀ɛnmpe ná numpini sí n‑jà n‑shà siɲcyan la?
15 Wwoɲɛɛge ŋkire ku ɲyɛ Kirisita ná Sitaanniŋi shwɔhɔlʼe yɛ?
Mpii pi ɲyɛ pi ɲyɛ Kile kuni i mɛ,
wwoɲɛɛge ŋkire ku ɲyɛ pire ná Kile kuni ɲaarafeebii shwɔhɔlʼe yɛ?
16 Ŋgwòŋi ŋgire u ɲyɛ Kileɲaarebage ná kacyinmbage shwɔhɔlʼe yɛ?
Wuu pi ɲyɛ Kileŋi ɲyii wuŋi bage,
bà Kile à yi jwo na:
«Mii sí n‑tɛ̀ɛn pi shwɔhɔlʼe,
si mpyi ná pi e.
Mii sí n‑pyi pi Kileŋi,
pi sí n‑pyi mii shiinbiib.
17 Lire kurugo Kafooŋi Kile à jwo:
“Yii fworo pi shwɔhɔlʼe,
yii wâlʼa láha pi na,
yii àha mbwɔ̀n yaɲwɔhɔge kà tufiige na mɛ.
Lire ká mpyi,
mii sí ɲɛɛ yii nac,
18 si mpyi yii Tuŋi,
yii sí n‑pyi mii pùnampyire ná mii pùceepyire.”
Kafooŋi Kile Siŋi Punifoo u à jwo amuni.»