7
Mii ntàannamacinmpyiibii,
ná Kile sʼà cyire ɲwɔmyahigii lwɔ́ wuu á,
lire kurugo wuu wuu cyeere ná wuu zòmpyaagii fíniŋʼa yige kaɲwɔhɔyi puni i,
wuu wuye waha wuu raa sì yyaha na fyìnmpe karigilʼe,
wuu raa ɲaare Kile yyahafyagare e.
Poli funntange ɲùŋke
2 Wuu na li caa yii á,
yii ɲɛɛ wuu na.
Wuu ɲyɛ a kapyimbaala pyi wà na mɛ,
wuu ɲyɛ a wà wuu kɛ̀ɛge mɛ,
wuu mú ɲyɛ a wà yaaga nàɲwɔhɔrɔ mɛ.
3 Puru kajwuuni bà li ɲyɛ si yii cɛ̂ɛgɛ mà dɛ!
Mii à fyânha a yi jwo yii á,
na yii kyalʼà táan wuu á sèlʼe.
Yafyin sì n‑jà wuu láha wuye na diɲyɛŋi i mɛ,
ali kwùŋi mú sì n‑jà mɛ.
4 Mii à sàa dá yii na,
maa naye pêe ná yii kani i sèlʼe.
Numɛ,
mii yákiliŋʼà tɛ̀ɛn sèlʼe.
Wuu mɛ́ɛ ɲyɛ yyefuge e ke,
mii funŋkʼà táan sèlʼe.
5 Sèeŋi na,
mà lwɔ́ wuu à nɔ Masedoni kùluni i ke,
wuu ɲyɛ a yyeɲiŋɛ ta mɛ.
Yyefuge shiŋi puni na ɲyɛ wuu na.
Pi mpyi na yoge kwùun wuu na kàmpanɲyi puni na,
fyagare sí mpyi wuu e.
6 Ŋka Kile u maha cwɔ̀nrɔmɔfeebii fɔ̀ɔnŋi ke,
uru u à wuu fɔ̀ɔnŋɔ Titi mpaŋi cye kurugo.
7 Ɲyɛ Titi mpaŋi kanni bà mɛ,
ŋka yii kanʼà u funŋke ɲíŋɛ ɲiŋɛŋkanni ndemu na ke,
lirʼà wuu puni funɲyi ɲíŋɛ mú.
U à yi jwo wuu á na mii seepɛnge na wá yii na,
na kani li mpyi a pyi ke,
na lirʼà yii yyahayi tanha,
na numɛ yii à mii kani cû ná yii cyeyi shuunniŋi i.
Lirʼà là bâra mii funntange na.
8 Lɛtɛrɛŋi mii à tùugo yii á ke,
u jwumpe mɛ́nʼà yii yyahayi tanha ke,
mii ɲyɛ a naye cɛ̂ɛgɛ mɛ.
Mii mpyi na ŋko si naye cɛ̂ɛgɛ tèni lʼe li mpyiŋi i,
ɲaha na yɛ mii à li cè na u mpyi a yii yyahayi tanha,
ŋka lirʼà pyi tère nimbilere funŋʼi kanna.
9 Lire e mii funntanga wu u ɲyɛ numɛ.
Yii yyetanhare bà tʼà mii funŋke táan mɛ,
ŋka lʼà pyi kaɲuŋɔ mà yii pyi yii à yii toroŋkanni kɛ̂ɛnŋɛ ke,
lire lʼà mii funŋke táan.
Yii yyahayʼà tanha mà tàanna ná Kile ɲyii wuuni i,
lire e ke,
nde wuu à pyi yii na ke,
lire ɲyɛ a para mɛ.
10 Yii li cè na yyetanhare tʼà sùpyaŋi ta mà tàanna ná Kile ɲyii wuuni i ke,
tire maha u pyi u à u toroŋkanni kɛ̂ɛnŋɛ maa shwɔ.
Maye ɲcɛ̀ɛgɛ ɲyɛ lire e mɛ.
Ŋka yyetanhare ntemu ká mpyi ŋge diɲyɛŋi woro ke,
tire maha kwùŋi nɔ sùpyaŋi na.
11 Yyetanha kani lʼà yii ta mà tàanna ná Kile ɲyii wuuni i ke,
lirʼà ŋkɛ̀ɛnŋi ŋgemu lèŋɛ yii karigilʼe numɛ ke,
yii uru kàanmucya.
Kani lʼà pyi yii shwɔhɔlʼe ke,
yii à li lwɔ́ yiye e si weŋkuro kwɔ̀n lire na numɛ.
Lire kanni bà mɛ,
yii à li cyêe na yii saha ɲyɛ a ɲɛɛ lire kapiini pyifooŋi na yiye shwɔhɔlʼe mɛ.
Lire kanʼà sàa yii lùuni yîrige.
Yii mú à fyá sèlʼe.
Yii la mpyi a sìi si núru mii ɲya,
yii à yii pɛ̀rɛge pyi maa lire kani pyifooŋi tùn.
Yii à li cyêe pyiŋkannigii puni na,
na yii à yiye fíniŋʼa yige lire kani i.
12 Lire e mii ɲyɛ a mpyi a lɛtɛrɛŋi tùugo yii á,
kapiini pyifooŋi,
lire ɲyɛ mɛ lʼà pyi ŋgemu na ke,
pire wà kurugo mɛ.
Yii à wuu kani cû ná yii cyeyi shuunniŋi i pyiŋkanni ndemu na Kile yyahe taan ke,
mii mpyi a u tùugo yii á,
yii puni si lire cè.
13 Lire lʼà wuu funɲyi pyi yʼà ɲíŋɛ.
Lire kanni bà mɛ,
ŋka yii à Titi yákiliŋi tìŋɛ tiŋɛŋkanni ndemu na,
ka u u yîri yii yyére ná funntange ŋkemu i ke,
lirʼà wuu funɲyi pyi yʼà táan sèe sèlʼe mú.
14 Mii à yii mɛtanga yyere u á,
yii mú ɲyɛ a mii sílege mɛ.
Yaaga maha yaaga wuu à jwo yii á ke,
yirʼà pa nta sèe.
Amuni,
ɲje wuu à jwo Titi á yii kyaa na ke,
yire mú à pa nta sèe.
15 Tèni i u à shà yii yyére ke,
yii à u ɲwɔmɛɛni cû,
maa u cùmu lemɛ ɲwɔ pèente funŋke e pyiŋkanni ndemu na ke,
u funŋɔ ɲyɛ à wwɔ̀ lire na mɛ,
lirʼà là bâra u tàange na mà yyaha tíi ná yii e.
16 Mii funntanga wu u ɲyɛ,
ɲaha na yɛ mii sí n‑jà n‑dá yii na karigii puni i.