5
Cyeere ti ɲyɛ wuu na ŋke ɲìŋke na ke,
tire na ɲyɛ mu à jwo vùnŋɔ.
Wuu à li cè na kuru ká ɲcwo,
Kile à baga niɲcɛnŋɛ yaha wuu yahare e nìɲyiŋi na,
sùpya cye bà kʼà kuru yaa mɛ,
kuru ɲyɛ na ŋkɛ̀ɛge mɛ.
2 Mà wuu yaha kuru vùnŋke e,
wuu na ŋkyɛ̀n,
ɲaha na yɛ wuu la à sìi si ŋkàre kuru bage e Kile yyére si cyere nivɔnnɔ ta.
3 Sèeŋi na,
wuu sí cyere nivɔnnɔ ta,
wuu cyere baa wuu sì n‑pyi mɛ.
4 Mà wuu yaha kuru vùnŋke e,
wuu na ŋkyaali maa ŋkyɛ̀n.
Li ɲyɛ mu à jwo na wuu la na ɲyɛ Kile u tire cyeere láha wuu na mà dɛ!
Wuu la na ɲyɛ u cyeere nivɔnnte bâra,
tire ntemu ti ɲyɛ ti ɲyɛ na fwɔ́nre mɛ,
bà tire si mpyi,
cyeere ti ɲyɛ na fwɔ́nre ke,
si tire fáa mɛ.
5 Kile yabiliŋi u à wuu dá tire cyeere nivɔnnte mɛɛ na.
U à u Munaani kan wuu á.
Lire e ke wuu à tɛ̀ɛn ná lʼe na u sí tire cyeere nivɔnnte kan wuu á.
6 Lire kurugo wuu yákilibilʼà tɛ̀ɛn tèrigii puni i,
ali mà li ta wuu à cè na mà wuu yaha nte cyeere e,
wuu ná Kafooŋi laagʼà tɔɔn wuye na.
7 Wuu ɲyɛ na u ɲaa mɛ,
ŋka wuu à dá u na,
maa ɲaare u kuni i.
8 Sèeŋi na,
wuu yákilibilʼà sàa tɛ̀ɛn,
wuu la mú sí ɲyɛ si fworo nte cyeere e si sà ntɛ̀ɛn Kafooŋi yyére.
9 Lire lʼà li ta,
wuu à kàre Kafooŋi yyére yo,
wuu ɲyɛ ɲìŋke na yo,
wuu maha wuye waha maa u ɲyii karigii pyi.
10 Ɲaha kurugo yɛ wuu punʼà yaa wuu sà yyére Kirisita yyahe taan,
u u shin maha shin sâra u tàanna ná urufoo kapyiŋkilʼe ɲìŋke na,
katiigii bâra kapegigii na.
Kirisita à wuu ná Kile shwɔ̀hɔŋi yaa
11 Lire kurugo wuu na fyáge Kafooŋi na,
maa Jwumpe Nintanmpe yu sùpyirʼá,
bà pi si mpyi si ɲɛɛ pu na mɛ.
Kile à wuu karigii puni cè.
Mii na sɔ̂nŋi na wuu kapyiiŋkii na ɲyɛ yii funŋʼi mú.
12 Wuu ɲyɛ na puru yu si wuye cyêe yii na sahaŋki mɛ,
ŋka wuu na pu yu si pyiŋkanna kan yii á,
bà yii si mpyi si ɲùɲjirire ta wuu báaraŋi nimpyiŋi kurugo mɛ.
Lire pyiŋkanni na,
karigii cyi ɲyɛ na ɲaa ke,
mpii pi ɲyɛ na piye pêre ná cyire e maa niɲyambaagii yaha ke,
pire ká a yà yu yii na,
yii sí tajwugo ta.
13 Lʼaha nta wuu funɲyi ɲyɛ wuu á mɛ,
kuru ɲyɛ tapege mɛ,
wuu ná Kile shwɔhɔlʼe yire ɲyɛ.
Li mú sí ká nta na wuu funɲyi na ɲyɛ wuu á,
yii kurugo lirʼà pyi.
14 Yii li cè na bà Kirisita à wuu kyaa táan uyʼá mɛ,
wuu na wuu karigii puni pyi kuru tàange kurugo.
Wuu à dá li na na uru niŋkinŋi u à kwû sùpyire puni cyaga,
lirʼà pyi mu à jwo ti punʼà kwû.
15 U à kwû sùpyire puni cyaga,
bà li si mpyi mpii pi ɲyɛ shì na ke,
pire kà ha raa pi ɲyii karigii pyi sahaŋki mɛ,
ŋka Kirisita u à kwû maa ɲɛ̀ pi kurugo ke,
pi a pi karigii pyi pi a ntàanni ná uru ɲyii wuuni i.
16 Lire kurugo numɛ,
wuu saha ɲyɛ na sùpya cwôre na ntàanni ná sùpyire sɔ̀nŋɔŋkanni i mɛ.
Tèni lʼe,
wuu mpyi a Kirisita cû mà tàanna ná sùpyire sɔ̀nŋɔŋkanni i.
Ŋka numɛ,
wuu saha ɲyɛ a u cû amuni mɛ.
17 Ŋgemu ká mpyi Kirisita wwoɲɛɛge e ke,
urufoo maha mpyi shinfɔnŋɔ.
U maha toroŋkanni niɲjyeeni yaha,
maa nivɔnnɔ lwɔ́.
18-19 Cyire karigii punʼà fworo Kile e.
U à wuu ná uye shwɔ̀hɔŋi yaa Kirisita cye kurugo,
maa uru báaraŋi le wuu cye e na wuu a yi yu sùpyirʼá,
na Kirisita cye kurugo Kile à u ná sùpyire shwɔ̀hɔŋi yaa.
U saha ɲyɛ a ti kapegigii wíi kyaa mɛ.
U à wuu tun na wuu a puru jwumpe yu sùpyirʼá.
20 Lire e ke wuu maha yu Kirisita cyaga numɛ.
Li ɲyɛ mu à jwo Kile yabiliŋi u ɲyɛ na yu wuu cye kurugo.
Kirisita mɛge na,
wuu na li caa yii á,
yii yii ná Kile shwɔ̀hɔŋi yaha u ɲwɔ.
21 Kirisita u ɲyɛ u ɲyɛ a kapii pyi mà ɲya mɛ,
Kile à uru pyi u à wuu kapegigii tugure lwɔ́,
bà wuu si mpyi si ntíi Kile yyahe taan Kirisita cye kurugo mɛ.